Appointment Of Election Officers : રાજ્ય ચૂંટણી આયોગ દ્વારા ગુજરાતની વિવિધ નગરપાલિકાઓની આગામી સામાન્ય, મધ્યસત્ર અને પેટા ચૂંટણીઓ માટે તૈયારીઓ તેજ કરી દેવામાં આવી છે. આયોગ દ્વારા તાજેતરમાં એક મહત્ત્વનો હુકમ બહાર પાડીને વિવિધ જિલ્લાઓની નગરપાલિકાઓ માટે ચૂંટણી અધિકારીઓ(RO) અને મદદનીશ ચૂંટણી અધિકારીઓની(ARO) નિમણૂક કરવામાં આવી છે.
ચૂંટણી અધિકારીઓની નિમણૂક
ભારતના સંવિધાનના અનુચ્છેદ 243 વ-ક અને ગુજરાત નગરપાલિકા અધિનિયમ, 1963ની કલમ-6 (4) હેઠળ મળેલી સત્તાની રૂએ આ નિમણૂકો કરવામાં આવી છે. આ આદેશ મુજબ, અમદાવાદ, અમરેલી, આણંદ, કચ્છ અને ખેડા સહિત રાજ્યના અનેક જિલ્લાઓની નગરપાલિકાઓ માટે જવાબદાર અધિકારીઓની યાદી જાહેર કરવામાં આવી છે.
જિલ્લાવાર નિમણૂકોમાં બારેજા નગરપાલિકા(વોર્ડ 1 થી 6) માટે દસક્રોઇના નાયબ કલેક્ટરને ચૂંટણી અધિકારી તરીકે નિયુક્ત કરાયા છે. વિરમગામ અને ધોળકા નગરપાલિકા માટે પણ સંબંધિત નાયબ કલેક્ટરોને જવાબદારી સોંપાઈ છે.
અમરેલી શહેર(વોર્ડ 1 થી 11) માટે આંકડા અધિકારીને ચૂંટણી અધિકારી અને શહેર મામલતદારને મદદનીશ ચૂંટણી અધિકારી બનાવવામાં આવ્યા છે. આ ઉપરાંત બાબરા, બગસરા, અને સાવરકુંડલા જેવી નગરપાલિકાઓ માટે પણ અધિકારીઓની વરણી થઈ છે.
ઉમરેઠ, બોરસદ, પેટલાદ અને ખંભાત જેવી નગરપાલિકાઓમાં પ્રાંત અધિકારીઓ અને જિલ્લા પુરવઠા અધિકારીઓને ચૂંટણી પ્રક્રિયાની કમાન સોંપવામાં આવી છે. ભુજ નગરપાલિકાના વિવિધ વોર્ડ માટે પ્રાંત અધિકારી અને નાયબ કલેક્ટર (સ્ટેમ્પ ડ્યુટી)ને ચૂંટણી અધિકારી તરીકેની જવાબદારી સોંપાઈ છે.
આ નિમણૂકો સાથે જ જે-તે વિસ્તારોમાં ચૂંટણીલક્ષી વહીવટી પ્રક્રિયાઓનો પ્રારંભ થશે. આયોગે આ તમામ અધિકારીઓને તાત્કાલિક અસરથી પોતાની જવાબદારીઓ સંભાળવા અને જરૂરી કાર્યવાહી કરવા સૂચના આપી છે.
