Gujarat Panchayat Dept Promoted-Transferred : ગુજરાત સરકારના પંચાયત, ગ્રામ ગૃહનિર્માણ અને ગ્રામ વિકાસ વિભાગ દ્વારા તાલુકા વિકાસ અધિકારી(TDO) સંવર્ગના અધિકારીઓની બદલી અને વર્ગ-3ના કર્મચારીની બઢતીના આદેશો જારી કરવામાં આવ્યા છે. જેમાં રાજ્યના વિવિધ જિલ્લાઓમાં ફરજ બજાવતા વર્ગ-2ના અધિકારીઓની આંતરિક બદલી કરવામાં આવી છે. તેમજ વર્ગ-3ના કર્મચારીઓને વર્ગ-2માં બઢતી આપી નવી નિમણૂક આપવામાં આવી છે.
પંચાયત વિભાગમાં બદલી-બઢતીનો હુકમ
રાજ્યના વિવિધ જિલ્લામાં કાર્યરત કુલ 35 TDOની બદલી કરવામાં આવી છે. જ્યારે વર્ગ-3ના કુલ 118 જેટલા કર્મચારીઓને ગુજરાત વિકાસ સેવા, વર્ગ-2 TDOમાં બઢતી આપવામાં આવી છે. આ અધિકારીઓને રૂ.44,900 થી રૂ. 1,42,400ના પે-સ્કેલ (લેવલ-8)માં તાલુકા વિકાસ અધિકારી તરીકે નિયુક્ત કરવામાં આવ્યા છે.
વર્ગ-3ના 118 કર્મચારીઓની TDOમાં બઢતી
સુરેન્દ્રનગરના નાયબ ચીટનીશ એસ.આઇ. ઝીંઝુવાડીયાને બોટાદના બરવાળાના TDO તરીકે બઢતી આપવામાં આવી છે. તેવી જ રીતે, રાજકોટના નાયબ ચીટનીશ રાકેશ રાઠોડને મોરબીના માળીયામીયાણાના ટીડીઓ તરીકે નવી જવાબદારી સોંપાઈ છે.
આ પણ વાંચો: પંચમહાલ: ગુરુ ગોવિંદ યુનિવર્સિટીનો છબરડો, બી.કોમ સેમ-4ના પેપરમાં સેમ-2ના પ્રશ્નો પૂછાયા!
આ અગાઉ ફેબ્રુઆરી મહિનામાં કરવામાં આવેલી કેટલીક બદલીઓ મૂળ અસરથી રદ કરવામાં આવી છે. જેમાં સુરેન્દ્રનગર જિલ્લાના વઢવાણના TDO ગીતાબેન ધીરૂભાઈ શીરોયા, પંચમહાલના શહેરાના TDO પાર્થકુમાર પટેલ સહિત પાંચ TDOનો સમાવેશ થાય છે.
સૂત્રો અનુસાર, રાજ્યમાં પંચાયત વિભાગમાં ઘણા સમયથી પ્રમોશનના ઓર્ડર બાકી હતા, જેમાં હાલ પણ 100 જેટલી TDOની જગ્યાઓ ખાલી હોવાનું જણાય છે.
