અમદાવાદ: પિક-અપમાં ચોરખાનું બનાવી વિદેશી દારૂ સંતાડ્યો, રૂ.11.64 લાખના મુદ્દામાલ સાથે 2 શખસોની ધરપકડ

Ahmedabad Sarkhej Police Liquor Raid: અમદાવાદના સરખેજ પોલીસે બાતમીના આધારે સરખેજ-સાણંદ સર્કલ પાસેના એક ગોડાઉનમાં દરોડો પાડીને ભારતીય બનાવટના વિદેશી દારૂ અને બીયરના જંગી જથ્થા સાથે બે શખસોની ધરપકડ કરી છે. પોલીસે વિદેશી દારૂની બોટલો, મોબાઈલ અને વાહન સહિત કુલ રૂ.11,64,620નો મુદ્દામાલ જપ્ત કર્યો છે.

પિક-અપમાં ચોરખાનું બનાવી વિદેશી દારૂ સંતાડ્યો

મળતી માહિતી મુજબ, પોલીસને બાતમી મળી હતી કે સાણંદ સર્કલ પાસે આવેલા આનંદ એસ્ટેટમાં સિગ્નેચર-02 બિલ્ડીંગની પાછળના ગોડાઉનમાં દારૂનું કટીંગ ચાલી રહ્યું છે. પોલીસે ત્યાં પહોંચીને બોલેરો મેક્સ પિક-અપની તપાસ કરી હતી. વાહન ખાલી હતું, પરંતુ પાછળનું ડાલુ ખસેડીને જોતા કેબિન અને ડાલાની વચ્ચે દારૂ સંતાડવા માટે બનાવેલું એક ગુપ્ત ચોરખાનું મળી આવ્યું હતું.

રૂ.11.64 લાખનો મુદ્દામાલ જપ્ત

ગોડાઉનમાં પણ તપાસ કરતા પ્લાસ્ટિકની થેલીઓમાંથી કુલ 2668 વિદેશી દારૂની બોટલો અને 144 બીયરના ટીન મળી આવ્યા હતા. પોલીસે કુલ 2812 નંગ તેમજ બે મોબાઈલ અને બોલેરો ગાડી સહિત કુલ રૂપિયા 11.64 લાખથી વધુનો મુદ્દામાલ કબ્જે કરવામાં આવ્યો હતો.

આ પણ વાંચો: અમદાવાદની આઇટી કંપનીમાં 1.56 કરોડની ઉચાપત કરનાર માસ્ટરમાઇન્ડ સુરતથી ઝડપાયો, સતત લોકેશન બદલી ચકમો આપતો

2 આરોપીની ધરપકડ

આ દરોડા દરમિયાન પોલીસે બોલેરોના ડ્રાઈવર દિનેશકુમાર મુકનારામ બિશ્નોઈ (ઉં.વ.27, રહે. સેડવા, બાડમેર, રાજસ્થાન) અને ગોડાઉન પર હાજર મોહમંદ ફરૂક અબ્દુલશાહ શાહમદાર (ઉં.વ.37, રહે. જુહાપુરા, અમદાવાદ)ને રંગેહાથ ઝડપી પાડ્યા હતા. જ્યારે આ ગુનામાં સામેલ અને માલ મંગાવનાર અન્ય બે આરોપીઓ હારૂન અબ્દુલશાહ શાહમદાર (હાલ રહે. કડી) અને સાંચોરના બાંગુડા નામના શખસને વોન્ટેડ જાહેર કરવામાં આવ્યા છે.