CM વિજયને સમર્થન આપવું પડ્યું ભારે! AIADMKના 29 નેતાઓ પર પલાનીસ્વામીની મોટી કાર્યવાહી

Tamil Nadu Floor Test: તમિલનાડુ વિધાનસભામાં મુખ્યમંત્રી સી. જોસેફ વિજયની આગેવાની હેઠળની ટીવીકે (TVK) સરકારે વિશ્વાસનો મત જીતી લીધો છે. 234 સભ્યોની વિધાનસભામાં બહુમત સાબિત કરવા માટે 118 મતોની જરૂર હતી, જેની સામે વિજય સરકારને 144 ધારાસભ્યોનું સમર્થન મળ્યું હતું. આ ફ્લોર ટેસ્ટ દરમિયાન મુખ્ય વિરોધ પક્ષ ડીએમકે(DMK)એ સદનમાંથી વોકઆઉટ કર્યો હતો, જ્યારે પીએમકે (PMK) મતદાનથી દૂર રહી હતી અને ભાજપના એકમાત્ર ધારાસભ્ય તટસ્થ રહ્યા હતા.

AIADMKમાં મોટું ભંગાણ અને કડક કાર્યવાહી

આ બહુમત પરીક્ષણ દરમિયાન AIADMKમાં મોટું ભંગાણ જોવા મળ્યું હતું. પક્ષના આદેશની અવહેલના કરીને 25 બાગી ધારાસભ્યોએ ટીવીકે સરકારની તરફેણમાં 'ક્રોસ વોટિંગ' કર્યું હતું. આ ઘટના બાદ AIADMKના જનરલ સેક્રેટરી એડપ્પાદી કે. પલાનીસ્વામી (EPS) એક્શન મોડમાં આવ્યા છે. તેમણે સી.વી. શણમુગમ, એસ.પી. વેલુમણિ અને વિજયભાસ્કર સહિત કુલ 29 નેતાઓને પક્ષના વિવિધ હોદ્દા પરથી દૂર કરી દીધા છે. આ યાદીમાં 13 વર્તમાન ધારાસભ્યોનો પણ સમાવેશ થાય છે. પલાનીસ્વામીએ આ બાગી ધારાસભ્યોની જગ્યાએ નવા જિલ્લા સચિવોની નિમણૂક કરી છે.

બાગી નેતાઓનો દાવો: 'વિચારધારા સમાન છે'

બાગી નેતા સી.વી. શણમુગમે આ ક્રોસ વોટિંગ પાછળનું કારણ સમજાવતાં દાવો કર્યો હતો કે ટીવીકે (TVK) અને AIADMK બંનેની વિચારધારા સમાન છે. તેમણે કહ્યું કે બંને પક્ષો ડીએમકેને એક નબળી કે ખરાબ શક્તિ તરીકે જુએ છે, તેથી જ તેમણે સરકારને ટેકો આપ્યો છે. શણમુગમે પલાનીસ્વામીના એવા આરોપોને પણ ફગાવી દીધા હતા કે તેમને સરકારને સમર્થન આપવાના બદલામાં મંત્રી પદની લાલચ આપવામાં આવી છે.

આ પણ વાંચો: એકતરફી પ્રતિબંધો આંતરરાષ્ટ્રીય કાયદાનું ઉલ્લંઘન: બ્રિક્સની બેઠકમાં જયશંકરની અમેરિકાને આડકતરી ચેતવણી

વિપક્ષના ખરીદ-વેચાણના આરોપો

બીજી તરફ, વિપક્ષી નેતા અને ડીએમકે ધારાસભ્ય ઉદયનિધિ સ્ટાલિને ટીવીકે સરકાર પર ગંભીર આરોપો લગાવ્યા છે. તેમણે કહ્યું કે વિજય સરકાર 'ઉધાર'ના સાથીઓ અને AIADMKમાં ભાગલા પાડીને સત્તામાં આવી છે. તેમણે વિશ્વાસ પ્રસ્તાવ દરમિયાન ધારાસભ્યોની ખરીદ-વેચાણ (હોર્સ ટ્રેડિંગ) થઈ હોવાની શંકા પણ વ્યક્ત કરી હતી. નોંધનીય છે કે ટીવીકે પાસે પોતાના 105 ધારાસભ્યો હતા, પરંતુ બાગી ધારાસભ્યો અને AMMKના એક ધારાસભ્યના ટેકાથી આ આંકડો 144 સુધી પહોંચ્યો હતો.