Jamnagar News : જામનગરમાં સત્યમ કોલોની અંડરબ્રિજ નજીકની આસપાસની સોસાયટી વિસ્તારમાં એક કોન્ટ્રાક્ટર છેલ્લા બે મહિનાથી રોડનું કામ અધૂરું મૂકીને છૂમંતર થતાં સ્થાનિકોમાં રોષ જોવા મળ્યો હતો. અધૂરું કામ અને ખરાબ રસ્તાના કારણે સ્થાનિકોને અવર-જવરમાં ભારે હાલાકી વેઠવી પડી રહી છે.
અંડરબ્રિજ નજીકના ખરાબ રસ્તા મુદ્દે સ્થાનિકોનો હલ્લાબોલ
આ મામલે અનેક વાર રજૂઆતો કરવા છતાં કોઈ ન્યાય નહીં મળતાં આખરે સ્થાનિક વિસ્તારની મહિલાઓ આજે રણચંડી બની હતી, અને સત્યમ કોલોની અંડરબ્રિજ વાળો માર્ગ કે જેને આડે માનવ સાંકળ બનાવીને હલ્લાબોલ કર્યો હતો. જેથી વાહન વ્યવહાર થંભી ગયો હતો અને ભારે હોબાળો મચ્યો હતો.
કોન્ટ્રાક્ટર કામ અધૂરું મૂકી છૂમંતર થતાં સ્થાનિકોનો વિરોધ
મહિલાને રસ્તો ખુલ્લો કરવા માટે, અને હટી જવા માટે વાહન ચાલકોએ જણાવતાં મહિલાઓએ તમામ વાહન ચાલકોને ઘસીને ના પાડી દીધી હતી. આ દરમિયાન વિરોધ નોંધાવી રહેલી મહિલાઓએ કહ્યું હતું કે, ફરીને જવું હોય તો જઈ શકો છો, અહીંથી રસ્તો ખુલશે નહીં. અનેક રજૂઆતો કરવા છતાં અમારું કોઈ સાંભળતું નથી, માટે હારી-થાકીને આ પગલું ભરવું પડ્યું છે. સ્થાનિકો પણ રોડ પર આવી જતાં ચક્કાજામ સર્જાયો હતો.
આ મામલે જાણ થતાં સિટી સી. ડિવિઝનનો પોલીસ કાફ્લો તાબડતોબ ઘટનાસ્થળે પહોંચ્યો હતો, અને ભારે મથામણ અને રકઝક કર્યા પછી સ્થાનિકોને દૂર કર્યા હતા. જ્યારે મહાનગરપાલિકાના અધિકારીઓને પણ સ્થળ પર બોલાવીને સ્થાનિકોને પ્રશ્નોનું નિરાકરણ લાવવા માટે પોલીસે પ્રયાસ કર્યા હતા.
