સુરત એરપોર્ટ પર મોટી કાર્યવાહી: બેંગકોકથી આવેલી ફ્લાઇટની સીટ નીચેથી ગાંજો ઝડપાયો, ચારની ધરપકડ

Surat News: સુરતના આંતરરાષ્ટ્રીય એરપોર્ટ પર કસ્ટમ વિભાગે ડ્રગ્સ સ્મગલિંગના એક મોટા નેટવર્કનો પર્દાફાશ કર્યો છે. બેંગકોકથી આવેલી ફ્લાઇટમાં અત્યંત ચાલાકીપૂર્વક છુપાવીને લાવવામાં આવેલો આશરે 7 કિલોગ્રામ ઉચ્ચ ગુણવત્તાનો હાઇડ્રોપોનિક હાઈબ્રિડ ગાંજો અધિકારીઓએ જપ્ત કર્યો છે. આ મામલે ચાર શખસોની NDPS એક્ટ હેઠળ ધરપકડ કરવામાં આવી છે.

સીટ અને કુશન નીચે છુપાવ્યું હતું મોતનું સરેસામાન

મળતી માહિતી અનુસાર, કસ્ટમ વિભાગને બેંગકોકથી આવતી ફ્લાઇટમાં માદક દ્રવ્યો હોવાની ચોક્કસ બાતમી મળી હતી. જેને આધારે વિમાન લેન્ડ થતા જ સઘન સર્ચ ઓપરેશન હાથ ધરાયું હતું. તપાસ દરમિયાન અધિકારીઓ પણ ચોંકી ઉઠ્યા હતા કારણ કે, ગાંજાના પેકેટ્સ ફ્લાઇટની સીટની નીચે અને કુશન કવરના પાછળના ભાગે અત્યંત સાવધાનીપૂર્વક સંતાડવામાં આવ્યા હતા. જપ્ત કરાયેલા ડ્રગ્સનું કુલ વજન 6,933.56 ગ્રામ છે. આંતરરાષ્ટ્રીય બજારમાં આ હાઇડ્રોપોનિક ગાંજાની અંદાજિત કિંમત 6.9 લાખ રૂપિયા આંકવામાં આવી છે.

કસ્ટમ વિભાગે આ ગુનામાં સંડોવાયેલા ચાર આરોપીઓને ઘટનાસ્થળેથી જ ઝડપી લેવામાં આવ્યા છે, જેમાં હરિયાના પ્રવીણ કરમવીર, વિક્રમ ભૌકાલ, પ્રદીપ સુરજભાન અને ઉત્તર પ્રદેશના અંશુલ શિવકુમાર ગુપ્તાનો સમાવેશ થાય છે.

આ પણ વાંચો: દુબઈથી પકડાયેલ અનિલ પાંડ્યાને વડોદરા લવાશે, ગુજરાત-રાજસ્થાનમાં કુખ્યાત ગેંગસ્ટર સામે 50થી વધુ ગુના દાખલ

આંતરરાષ્ટ્રીય ડ્રગ નેટવર્કની તપાસ

કસ્ટમ અધિકારીઓ હવે એ દિશામાં તપાસ કરી રહ્યા છે કે, આ ડ્રગ્સનો સ્ત્રોત કોણ હતો? સુરતમાં આ જથ્થો કોને ડિલિવરી કરવાનો હતો? શું આની પાછળ કોઈ મોટું આંતરરાષ્ટ્રીય ડ્રગ કાર્ટેલ સક્રિય છે? આ ઘટના બાદ સુરત આંતરરાષ્ટ્રીય એરપોર્ટ પર, ખાસ કરીને બેંગકોક અને શારજાહ જેવી આંતરરાષ્ટ્રીય ફ્લાઇટ્સ માટે ચેકિંગ અને દેખરેખના નિયમો વધુ કડક બનાવી દેવામાં આવ્યા છે.