ફ્રિડા પિન્ટો અને સિદ્ધાર્થ અભિનિત અનએકસ્ટમ્ડ અર્થ સિરિઝનું પ્રિમીયર

મુંબઇ : જગવિખ્યાત બંગાળી સાહિત્યકાર ઝુમ્પા લાહિરીના વાર્તાસંગ્રહ અનએકસ્ટમ્ડ અર્થ પરથી પ્રેરિત આજ નામની વેબ સિરિઝનું ઓટીટી પર ૧૭ ડિસેમ્બરે પ્રિમિયર યોજાશે.
મધુરી શેખર દ્વારા રૂપાંતરિત આ વેબસિરિઝમાં પારૂલ ચૌધરીની મુખ્ય ભૂમિકા ફ્રિડા પિન્ટોએ ભજવી છે જ્યારે અમિતનું પાત્ર સિદ્ધાર્થે ભજવ્યું છે. આ ઉપરાંત તેમાં ઇન્દ્રનીલ સેનગુપ્તા, પ્રવિણ કૌર, સરાયુ બ્લુ અને જસ્ટિન બર્થાએ પણ મહત્વની ભૂમિકાઓ ભજવી છે જ્યારે પીઢ અભિનેતા જયંત ક્રિપલાની પ્રણબની ભૂમિકામાં જોવા મળશે. આ સિરિઝના પહેલાં બે એપિસોડ રિતેશ બાત્રાએ ડાયરેક્ટ અને પ્રોડયુસ કર્યાં છે.
વોર્નર્સ બ્રધર્સ દ્વારા નિર્મિત આ વેબસિરિઝમાં બંગાળી પરિવારની પેઢીઓની વાત રજૂ કરવામાં આવશે. આ સિરિઝ કેમ્બ્રિજ અને બોસ્ટન તથા માસાચ્યુસેટ્સમાં બંગાળી પરિવારોમાં આકાર લે છે. આ સિરિઝ નેટફલિક્સ પર ૧૭ ડિસેમ્બરથી સ્ટ્રીમ થશે.