OBC અનામતનો અમલ થતાં અમદાવાદમાં પક્ષોએ નવા મુરતીયા શોધવા પડશે, જાણો કઈ બેઠકો પર સમીકરણ બદલાશે

AMC Election: અમદાવાદ મ્યુનિસિપલ કોર્પોરેશનની સામાન્ય ચૂંટણી આડે હવે ગણતરીના સમય બાકી રહ્યા છે. 192 બેઠકમાં 27 ટકા ઓ.બી.સી. રોટેશનનો અમલ કરવાનો નિર્ણય કરાયો છે. આ કારણથી શહેરના 48 પૈકી 17 વોર્ડમાં રાજકીય પક્ષોને નવા મુરતિયા શોધવા પડશે. વર્ષ-2021ની ચૂંટણીમાં સામાન્ય ઉમેદવારો માટેની બેઠક 76 હતી. જે ઘટીને 59 થશે એમાં પણ પુરૂષ સામાન્ય અને મહિલા સામાન્ય એમ બંને કેટેગરીના ઉમેદવારોની પસંદગી કરાશે. જેને લઈને સામાન્ય કેટેગરીમાં આવતા રાજકીય પક્ષોના ટિકિટ વાંચ્છુઓની દોડધામ વધી જશે.

આ પણ વાંચોઃ પાક નુકસાનીના ડિજિટલ સર્વેનો વિરોધ: સિહોરમાં પાક બાળીને હવન, ગાંધીનગરમાં ઢોલ વગાડયાં

AMCની ચૂંટણીમાં તમામ પાર્ટીઓ થઈ સક્રિય

મ્યુનિસિપલ કોર્પોરેશનની આગામી ચૂંટણી ભાજપ, કોંગ્રેસ સહિતના રાજકીય પક્ષો માટે ખૂબ મહેનત કરાવનારી બની રહેશે. આ પાછળનું મુખ્ય કારણ 27 ટકા મુજબ બેઠકોની વહેંચણી કરાતા ઘાટલોડિયા, થલતેજ, વટવા, અસારવા અને શાહીબાગ ઉપરાંત સરસપુર-રખિયાલ, ખાડીયા, સરખેજ, મકતમપુરા તેમજ બહેરામપુરા, દાણીલીમડા, ગોમતીપુર, ઓઢવ, વસ્ત્રાલ અને ઈન્દ્રપુરી વોર્ડમાં રાજકીય સમીકરણ પણ બદલાઈ જશે. ઘાટલોડિયા વોર્ડ એ રાજયના મુખ્યમંત્રીનો વિધાનસભા વિસ્તાર છે. આ ઉપરાંત વર્તમાન ડેપ્યુટી મેયર ઘાટલોડિયા વોર્ડમાંથી ચૂંટાઈને કોર્પોરેટર બન્યા છે.

સામાન્ય કેટેગરીના ઉમેદવાર શોધવામાં થશે મુશ્કેલી

અગાઉ આ વોર્ડમાં ચાર બેઠક સામાન્ય હતી. નવા માળખા મુજબ મહિલાઓ માટે બે બેઠક અનામત હશે. આ ઉપરાંત બે પૈકી એક પુરૂષ બેઠક ઉપરથી ઓ.બી.સી.માંથી આવનાર ઉમેદવાર ચૂંટણી લડશે. આ પ્રકારે દાણીલીમડા વોર્ડમાં પણ હવે પછીની કોર્પોરેશનની ચૂંટણીમાં મહિલા માટે એક ઓ.બી.સી., એક સામાન્ય ઉપરાંત પુરૂષ માટેની બે પૈકીની એક બેઠક ઓ.બી.સી. ઉમેદવારને ફાળવવી પડશે. આ કારણથી આ વોર્ડમાં સામાન્ય કેટેગરીની હવે એક જ બેઠક રહેશે. હવે પછીની કોર્પોરેશનની ચૂંટણીમાં સૌથી વધુ મુશ્કેલી પડશે તો સામાન્ય કેટેગરીના ઉમેદવાર શોધવાની. કારણકે, બેઠકોની સંખ્યા 59 થઈ ગઈ છે. સામે દાવેદારો અત્યારથી જ પ્રેસર ટેક્નિકનો ઉપયોગ કરવા માંડયા છે.

આ પણ વાંચોઃ 20 પડતર માંગણીઓને લઈ જિલ્લાના 700 રેશન ડીલરો વિતરણ વ્યવસ્થાથી અળગા રહ્યાં

વર્ષ-2020થી શરૂ થયેલી મ્યુનિસિપલ કોર્પોરેશનની વર્તમાન ટર્મમા રામોલ હાથીજણના ભાજપના એક કોર્પોરેટર સામે પોલીસ ફરિયાદો થઈ છે. સૂત્રો પાસેથી મળતી માહિતી મુજબ, આ પ્રકારના ખરડાયેલા કે વિવિધ પ્રકારના ભ્રષ્ટાચારના આક્ષેપ જે કોર્પોરેટરો ઉપર થયેલા છે તેવા કોર્પોરેટરોને ભાજપ ફરી રિપિટ નહીં કરે.

45 વર્ષમાં 8 ચૂંટણીમાં 6 વખત ભાજપ સત્તામાં 

અમદાવાદ મ્યુનિસિપલ કોર્પોરેશનમાં 45 વર્ષમાં 8 ચૂંટણી યોજાઈ છે. આ પૈકી 6 વખત ભાજપ જયારે બે વખત કોંગ્રેસ સત્તામાં આવી છે. વર્ષ-2005થી એટલે કે છેલ્લા વીસ વર્ષથી કોર્પોરેશનમાં ભાજપ સત્તા સ્થાને છે.