Sanand News: અમદાવાદના સાણંદ GIDC વિસ્તારમાં ખુલ્લેઆમ દારૂનો કાળો કારોબાર ધમધમતો હોવા છતાં સ્થાનિક પોલીસ ઘોર નિંદ્રામાં રહી અને SMCની ટીમે રેડ પાડી મોટી કાર્યવાહી કરી છે. SMCએ સાણંદ-વિરમગામ હાઈવે પર છારોડી ગામ પાસે આવેલા માનસી ઈન્ડસ્ટ્રીઝના ખુલ્લા પ્લોટમાં રેડ પાડીને ચાલી રહેલું વિદેશી દારૂનું કટિંગ ઝડપી પાડ્યું છે. મહત્ત્વનું છે કે, SMCની આ કરવાહીથી બુટલેગરોની સાથે સાથે પોલીસ બેડામાં પણ ભારે ખળભળાટ મચી ગયો છે.
છારોડીમાં ₹1.15 કરોડનો દારૂનો જથ્થો ઝડપાયો
SMCને મળેલી બાતમીના આધારે જ્યારે આ છારોડી પાસે આવેલા ઈન્ડસ્ટ્રીયલ પ્લોટમાં દરોડો પાડવામાં આવ્યો, ત્યારે આરોપીઓ પંજાબ અને રાજસ્થાનથી મંગાવેલો વિદેશી દારૂનો મોટો જથ્થો ઉતારીને અન્ય વાહનોમાં સગેવગે કરી રહ્યા હતા.
પોલીસે ઘટનાસ્થળેથી અલગ અલગ બ્રાન્ડની કુલ 11,332 વિદેશી દારૂની બોટલો જપ્ત કરી છે, જેની અંદાજિત કિંમત 81.92 લાખ રૂપિયા જેટલી થાય છે. આ ઉપરાંત, દારૂની હેરાફેરી માટે ઉપયોગમાં 3 વાહનો, રોકડ રકમ અને મોબાઈલ ફોન સહિત કુલ 1.15 કરોડ રૂપિયાથી વધુનો મુદ્દામાલ સ્થળ પરથી કબજે કરવામાં આવ્યો છે.
આ પણ વાંચો: અમદાવાદ: ક્રિપ્ટો રોકાણના નામે 58 લાખની ઠગાઈ, ચાઈનીઝ ગેંગના 6 સાગરીત ઝડપાયા
પોલીસની અચાનક પડેલી આ રેડથી દારૂનું કટિંગ કરી રહેલા શખ્સોમાં ભારે નાસભાગ મચી ગઈ હતી. આ ઓપરેશન દરમિયાન પોલીસે છારોડીના સ્થાનિક શખ્સ જુમ્માખાન ભાલજીખાન પઠાણને દારૂના જથ્થા સાથે રંગેહાથ ઝડપી પાડી તેની ધરપકડ કરી છે. જોકે, આ મોટા નેટવર્કનો મુખ્ય સૂત્રધાર અને સુરેન્દ્રનગરનો ઈમરાન ઉર્ફે ઓબામા દિલાવરખાન મલેક, બિલ્કિશબાનુ મલેક, સોહિલ વાઘેલા, અબ્બાસ વાઘેલા, વાહનોના માલિકો તેમજ 5થી 6 અજાણ્યા શખ્સો સહિત કુલ 9 આરોપીઓ ઘટનાસ્થળેથી ફરાર થઈ જવામાં સફળ રહ્યા છે. પોલીસે તમામ વિરુદ્ધ ગુનો નોંધી, વોન્ટેડ આરોપીઓને ઝડપી પાડવા કાર્યવાહી હાથ ધરી છે.
