આઇકોનિક શો 'Jeena Isi Ka Naam Hai 2.0' સાથે આર. માધવનનું ધમાકેદાર કમબેક, જણાવ્યું કેમ આજે પણ ખાસ છે આ શો

Madhavan Revives Human Stories: બોલિવૂડના દિવંગત અભિનેતા ફારૂક શેખના હોસ્ટિંગ હેઠળ 2000ના દાયકાની શરૂઆતમાં ભારે લોકપ્રિયતા મેળવનાર આઇકોનિક ટોક શો 'Jeena Isi Ka Naam Hai' ફરી એકવાર નવા અંદાજમાં પરત ફરી રહ્યો છે. ઓટીટી પ્લેટફોર્મ ZEE5 પર આ શો 'Jeena Isi Ka Naam Hai 2.0' ના નામે ધમાકેદાર વાપસી કરવા માટે તૈયાર છે. ઓરિજિનલ શોમાં સેલિબ્રિટીઝના અંગત અને વ્યાવસાયિક જીવનની રસપ્રદ વાતો દર્શકો સમક્ષ લાવવામાં આવતી હતી. હવે આ નવા અને અપગ્રેડેડ વર્ઝનને હોસ્ટ કરવાની જવાબદારી લોકપ્રિય અભિનેતા આર. માધવન સંભાળશે.

"આપણે જાણીએ છીએ તેઓ ક્યાં જાય છે… પરંતુ તેઓ વાસ્તવમાં કોણ છે?"

આ શોના હોસ્ટિંગ અંગે આર. માધવને એક સત્તાવાર નિવેદનમાં જણાવ્યું હતું કે,

"આજના સમયમાં આપણે જે લોકોને પસંદ કરીએ છીએ અથવા જેમના ફેન છીએ, તેમના જીવન સુધી આપણી અભૂતપૂર્વ પહોંચ છે. તેઓ શું કરે છે, ક્યાં જાય છે અને સોશિયલ મીડિયા પર શું શેર કરે છે તે બધું જ આપણને ખબર હોય છે, પરંતુ તેઓ વાસ્તવિક જીવનમાં કોણ છે, તે જાણવાની તક ભાગ્યે જ મળે છે. આ જ બાબત 'Jeena Isi Ka Naam Hai'ને આજે પણ એટલો જ પ્રાસંગિક બનાવે છે."

માધવને વધુમાં ઉમેર્યું કે, આ આઇકોનિક શોને હોસ્ટ કરવો એ તેમના માટે સન્માનની સાથે એક મોટી જવાબદારી પણ છે.

ગ્લોબલ સ્ટેજ પર ભારતનું નામ રોશન કરનાર દિગ્ગજો બનશે મહેમાન

'Jeena Isi Ka Naam Hai 2.0'માં આવનારા મહેમાનો અંગે હિન્ટ આપતા માધવને જણાવ્યું કે, "આ સીઝનમાં અમે એવા અસાધારણ વ્યક્તિત્વો અને દિગ્ગજોને એકસાથે લાવવાના છીએ જેમણે ભારતને વૈશ્વિક મંચ પર એક અલગ ઓળખ અપાવી છે. અમે તેમના જીવનની એવી ક્ષણો, સંબંધો અને વણકહી વાર્તાઓને ઉજાગર કરીશું જેણે તેમની સફરને આ નવો આકાર આપ્યો છે. દરેક સિદ્ધિ અને હેડલાઇન્સ પાછળ એક માનવીય સંઘર્ષની વાર્તા છુપાયેલી હોય છે, અને આ એવી વાર્તાઓ છે જે હંમેશાં આપણી સાથે રહે છે."

ક્યારથી સ્ટ્રીમ થશે 'Jeena Isi Ka Naam Hai 2.0'?

ZEE5 દ્વારા આ શોની સત્તાવાર જાહેરાત તેમના મલ્ટિ-લેંગ્વેજ કન્ટેન્ટ સ્લેટના ભાગરૂપે કરવામાં આવી છે. આ શોને એક એવી "સાંસ્કૃતિક ઘટના” ગણાવવામાં આવી છે જેણે પેઢીઓ સુધી દર્શકોના દિલ પર ઊંડી છાપ છોડી છે. દિવંગત ફારૂક શેખના શાનદાર સંચાલન હેઠળ આ શો હૃદયસ્પર્શી અને માનવીય સંવાદોનો પર્યાય બની ગયો હતો. જોકે, 'Jeena Isi Ka Naam Hai 2.0'ની સત્તાવાર સ્ટ્રીમિંગ ડેટ હજુ સુધી જાહેર કરવામાં આવી નથી, પરંતુ ફેન્સમાં આ શોને લઈને ભારે ઉત્સુકતા જોવા મળી રહી છે.