નવાયાર્ડ વિસ્તારમાં રાત્રે બોલાચાલી બાદ બે મિત્રો ઉપર ચપ્પુથી હુમલો

Vadodara Crime : વડોદરાના નવા યાર્ડ વિસ્તારમાં ગઈ મધરાતે નજીવી બાબતે બોલાચાલી થયા બાદ ચપ્પુથી હુમલાનો બનાવ બનતા પોલીસે ચાર જણા સામે ગુનો નોંધ્યો છે.
નવા યાર્ડ રોશન પાર્કમાં રહેતા ફર્નિચરના વેપારી જમીલ પઠાણે પોલીસને કહ્યું છે કે, તા.બીજી એ રાત્રે દિવ્યા ગેસ એજન્સી પાસે હું મારા મિત્ર સલીમ અને મોહસીન બેઠા હતા ત્યારે સલીમ અને મોહસીન વચ્ચે કોઈ કારણસર બોલાચાલી થઈ હતી.
ત્યારબાદ મોહસીને સલીમ ઉપર ચપ્પુથી હુમલો કરતા તેને અંગુઠા પર ઈજા થઈ હતી. મોહસીને મારા પર પણ હુમલો કરતા મને કાનના ભાગે ઈજા થઈ હતી. આ દરમિયાન મોહસીને તેના મિત્ર પ્રકાશ ઉર્ફે પકિયા અને અન્ય બે જણાને બોલાવતા તેમને પણ ગાળો ભાંડી ઝઘડો કર્યો હતો. પકીયાએ પણ મોહસીનનું ચપ્પુ હાથમાં લઈને ધમકી આપી હતી. જેથી પોલીસે હુમલાખોરોની તપાસ કરી છે.