વરસાદી પાણીનો ભરાવો રોકવા ડ્રેનેજ સિસ્ટમ અપગ્રેડ કરાઈ

ચોમાસાની તુમાં શહેરમાં પાણી ભરાવો અને ડ્રેનેજ બેક મારવાની સમસ્યા અટકાવવા મ્યુનિ. કોર્પોરેશનના ઇલેક્ટ્રિકલ-મિકેનિકલ સુવેઝ વિભાગે ૭૪ ડ્રેનેજ પમ્પિંગ સ્ટેશન (એ.પી.એસ.) અને ૧૪ સુવેજ ટ્રીટમેન્ટ પ્લાન્ટ (એસ.ટી.પી)ને ભારે વરસાદ દરમિયાન સતત કાર્યરત રાખવા માટે બાયપાસ સિસ્ટમ, વધારાના હાઈ-કેપેસિટી પંપ અને પાવર બેકઅપની સુવિધા ઊભી કરાઈ છે.

ભારે વરસાદ દરમિયાન ડ્રેનેજ લાઈનોમાં વરસાદી પાણીનું પ્રમાણ વધી જતાં પમ્પિંગ સ્ટેશનના ભૂગર્ભ ટાંકા પર ભારણ વધે છે અને ઓવરફ્લો થવાની શક્યતા રહે છે. આ સ્થિતિને પહોંચી વળવા શહેરના ૧૨ સ્થળોએ બાયપાસ વાલ્વ સિસ્ટમ ઈન્સ્ટોલ કરાઈ છે, જેથી વધારાનું પાણી સીધું નદી અથવા કાંસમાં વાળીને ડ્રેનેજ નેટવર્ક પરનું દબાણ ઘટાડી શકાય.

આ ઉપરાંત શહેરના ૧૬ મુખ્ય પમ્પિંગ સ્ટેશનો પર વધારાના બાયપાસ પંપ સ્ટેન્ડબાય રખાયા છે. વેસ્ટ, ઇસ્ટ, સાઉથ અને નોર્થ ઝોનના વિવિધ પમ્પિંગ સ્ટેશનો પર જરૃરિયાત મુજબ હાઈ-કેપેસિટી પંપની ગોઠવણ કરાઈ છે.

વીજ પુરવઠો ખોરવાય તો ૭૪માંથી ૩૭ પમ્પિંગ સ્ટેશનો પર કાયમી ડીજી સેટ (ડીઝલ જનરેટર) ઉપલબ્ધ છે. ઉપરાંત ૨૧ મોબાઇલ ડીજી સેટ ( ટ્રોલી પરના જનરેટર) પણ તૈયાર રખાયા છે.  ચોમાસાને ધ્યાને લેતા તમામ પમ્પિંગ સ્ટેશનો પર ૨૪ કલાક સતત મોનિટરિંગ કરાશે, જેથી વરસાદ શરૃ થતાં જ જરૃરી મશીનરી અને પંપ તાત્કાલિક કાર્યરત કરી શકાય, તેમ મ્યુનિ.કોર્પોરેશન દ્વારા જણાવાયું છે.