થર્મલ ચિત્રો પ્રમાણે અમદાવાદમાં દીપડાની હાજરીની કોઈ પુષ્ટિ નહીં, નિષ્કર્ષ પર પહોંચવા 30થી વધુ ટીમો તૈનાત: વન વિભાગ

Ahmedabad Leopard Sighting Reports: અમદાવાદના ઘુમા, શીલા અને બોપલ વિસ્તારમાં દીપડાની હિલચાલ હોવાના અહેવાલો મળ્યા બાદ વન વિભાગે સર્વેલન્સ વધારી દીધું છે. વિસ્તારમાં વન્યજીવની હાજરીની પુષ્ટિ કરવા અને જરૂરી પુરાવા એકત્ર કરવા માટે 30થી વધુ ટીમોને ક્ષેત્રીય તપાસ માટે મેદાનમાં ઉતારવામાં આવી છે.

24 કલાક રાઉન્ડ-ધ-ક્લોક મોનિટરિંગ

સામાજિક વનીકરણ વિભાગ, અમદાવાદના જણાવ્યા મુજબ પરંપરાગત અને આધુનિક ટૅક્નોલૉજી આ બંને પદ્ધતિઓનો ઉપયોગ કરીને અલગ-અલગ સ્થળોએ 24 કલાક રાઉન્ડ-ધ-ક્લોક મોનિટરિંગ કરવામાં આવી રહ્યું છે. અધિકારીઓએ સ્પષ્ટ કર્યું છે કે દીપડો ખરેખર આ વિસ્તારમાં આવ્યો છે કે નહીં તે સુનિશ્ચિત કરવા માટે પગમાર્ક(પગલાંના નિશાન), મળ, કેમેરા ટ્રેપના ફૂટેજ અને પ્રત્યક્ષદર્શીઓની માહિતી જેવા પ્રત્યક્ષ અને પરોક્ષ પુરાવા એકત્ર કરવામાં આવી રહ્યા છે.

અફવાઓ ન ફેલાવવા અપીલ

ઘુમા, શીલા અને બોપલમાં 30થી વધુ ટીમો સિસ્ટમેટિકલી ખુલ્લી જમીનો, ઝાડી-ઝાંખરાવાળા વિસ્તારો અને અન્ય સંભવિત વન્યજીવ નિવાસસ્થાનોનું સર્વેક્ષણ કરી રહી છે. વન વિભાગ દરેક પુરાવાનું ઝીણવટથી વિશ્લેષણ કરી રહ્યું છે અને કોઈ છેલ્લા નિષ્કર્ષ પર પહોંચતા પહેલા સંપૂર્ણ તપાસ કરી રહ્યું છે. આ સાથે જ વિભાગે રહીશોને ભયભીત ન થવા અને સોશિયલ મીડિયા પર કોઈ પણ બિન-ચકાસાયેલ અફવાઓ કે માહિતી ન ફેલાવવા અપીલ કરી છે.: નાયબ વન સંરક્ષક (DCF), અમદાવાદ કચેરી

થર્મલ ચિત્રોમાં દીપડાની હાજરીની કોઈ પુષ્ટિ થઈ નથી: વન વિભાગ, અમદાવાદ કચેરી

સર્વેલન્સ કામગીરી દરમિયાન વન વિભાગ દ્વારા તૈનાત કરાયેલા એક થર્મલ ડ્રોનમાં આ વિસ્તારમાં નીલગાય(રોઝ) ફરતી હોવાનું કેપ્ચર થયું હતું. અધિકારીઓએ જણાવ્યું હતું કે આ ઘટના દર્શાવે છે કે શહેરની સીમા પાસેના વિસ્તારોમાં વન્યજીવોની અવરજવર રહે છે, પરંતુ અત્યાર સુધી મળેલા થર્મલ ચિત્રોમાંથી દીપડાની હાજરીની કોઈ પુષ્ટિ થઈ નથી.

હાલમાં સર્ચ ઓપરેશન ચાલુ છે અને અહેવાલોની સંપૂર્ણ ચકાસણી ન થાય ત્યાં સુધી આ મોનિટરિંગ ચાલુ રહેશે. વન વિભાગે સ્થાનિક રહીશોને સતર્ક રહેવા, રાત્રિના સમયે કે અંધારામાં એકલવાયા વિસ્તારોમાં જવાનું ટાળવા અને જો કોઈ વન્ય પ્રાણી નજરે પડે તો તુરંત વન વિભાગનો સંપર્ક કરવા વિનંતી કરી છે. દક્ષિણ-પશ્ચિમ અમદાવાદના વિસ્તારોમાં શંકાસ્પદ દીપડો જોયાના અહેવાલો સામે આવ્યા બાદ જાહેર સુરક્ષા સુનિશ્ચિત કરવા અને સત્યતા ચકાસવા માટે વન વિભાગે આ કાર્યવાહી ઝડપી બનાવી છે.