હવે ઈન્ટરનેટ વગર પણ થઈ શકશે UPI પેમેન્ટ, સાદા ફોનમાં SMS દ્વારા થશે ટ્રાન્ઝેક્શનની સુરક્ષિત પ્રક્રિયા

PhonePe UPI 123Pay: PhonePe એ ફીચર ફોન માટે નવી UPI સર્વિસ લોન્ચ કરી છે. આ ફીચરનો હેતુ ડિજિટલ પેમેન્ટની સુવિધાને સ્માર્ટફોનથી આગળ વધારવાનો છે. આ સર્વિસની મદદથી યુઝર્સ કમ્પેટીબલ ફીચર ફોન પર UPIની જરૂરી સુવિધાઓનો ઉપયોગ કરી શકશે. કંપનીના જણાવ્યા મુજબ આગામી મહિનાઓમાં વધુ ડિવાઇસને પણ આ સર્વિસનો સપોર્ટ મળવાની આશા છે. આ લોન્ચ સાથે તે યુઝર્સ માટે ડિજિટલ પેમેન્ટના નવા ઓપ્શન ઉપલબ્ધ થશે જે રોજના કોમ્યુનિકેશન માટે ફીચર ફોન પર નિર્ભર છે.

20 કરોડથી વધુ યુઝર્સ માટે ઇન્ટરનેટ વગર UPI ચુકવણી

PhonePe એ જણાવ્યું કે તેની UPI 123Pay સર્વિસ હવે સમગ્ર ભારતમાં સપોર્ટેડ ફીચર ફોન પર ઉપલબ્ધ છે. આ સર્વિસ ઇન્ટરનેટ કનેક્શન વગર પણ કામ કરે છે. તે SMS દ્વારા ટ્રાન્ઝેક્શન પ્રોસેસ કરે છે. તેમાં મની ટ્રાન્સફર અને મર્ચેન્ટ પેમેન્ટ જેવી સુવિધાઓ શામેલ છે. તેને એવી રીતે તૈયાર કરવામાં આવ્યું છે કે લિમિટેડ 2G કનેક્ટિવિટી વાળા વિસ્તારોમાં પણ તેનો ઉપયોગ કરી શકાય. જેનાથી ભારતના 20 કરોડથી વધુ ફીચર ફોન યુઝર્સ સુધી UPI સર્વિસ પહોંચાડવામાં મદદ મળશે.

HMD, Nokia અને અન્ય બ્રાન્ડ્સના પસંદગીના ફોનમાં સપોર્ટ

તમને જણાવી દઈએ કે HMD એ કન્ફર્મ કર્યું છે કે PhonePe UPI 123Pay નો સપોર્ટ HMD 105 2G, HMD 110 2G, Nokia 105 Classic, Nokia 105 Single SIM, Nokia 105 Dual SIM, Nokia 106 અને Nokia 123 Shield પર ઉપલબ્ધ છે. આવનારા સમયમાં HMD અને Nokia ના અન્ય મોડલ્સને પણ આનો સપોર્ટ મળવાની આશા છે. PhonePe UPI 123Pay હાલમાં HMD, Nokia, Lava International અને Itel Mobile ના પસંદગીના ફીચર ફોન પર ઉપલબ્ધ છે.

ફીચર ફોનમાં UPI સર્વિસ શરૂ કરવાની સરળ પ્રક્રિયા

ફીચર ફોનમાં UPI સર્વિસ શરૂ કરવા માટે પહેલા ફોનપેની 123UPI સર્વિસ ઓપન કરવી પડશે. ત્યારબાદ બેંક સિલેક્ટ કરવાની રહેશે. પછી ડેબિટ કાર્ડના છેલ્લા 6 ડિજિટ અને કાર્ડની એક્સપાયરી ડેટ જેવી માહિતી નાખવી પડશે. ત્યારબાદ UPI PIN સેટ કરવાનો રહેશે. એકવાર રજીસ્ટ્રેશન પૂર્ણ થયા પછી ફીચર ફોનથી પણ ઇન્ટરનેટ વગર UPI ટ્રાન્ઝેક્શન કરી શકાશે. એટલે કે જે લોકો પાસે સ્માર્ટફોન કે ઇન્ટરનેટની સુવિધા નથી, તેમના માટે પણ હવે ડિજિટલ પેમેન્ટ કરવું પહેલા કરતાં સરળ બની શકે છે.