સુરતમાં બરફ વર્ષા વચ્ચે ગણપતિ બાપ્પા, નાનપુરાના ‘સ્નો સિટી’ ગણેશ પંડાલમાં સ્વિત્ઝર્લેન્ડનો અનુભવ

Surat Ganeshotsav: સુરતના નાનપુરામાં બહુમાળી ભવન પાછળ સેલર ક્લબની ગલીમાં આ વર્ષનો ગણેશ પંડાલ ખાસ આકર્ષણનું કેન્દ્ર છે. ગત વર્ષે ‘કેન્ડી લેન્ડ’ની સફળતા બાદ આ વર્ષે આયોજકોએ મુલાકાતીઓ માટે સીધો બરફીલા વાતાવરણનો રોમાંચક અનુભવ પૂરો પાડતી ‘સ્નો સિટી’ થીમ આધારિત ગણેશ પંડાલ તૈયાર કર્યો છે.

26મા વર્ષમાં પ્રવેશ અને 6 મહિનાની મહેનત સેલર બાલ ગણેશ મંડળે આ વર્ષે પોતાના આયોજનના 25 વર્ષ પૂર્ણ કરી 26મા વર્ષમાં મંગલ પ્રવેશ કર્યો છે.

આ અંગે આયોજક રવિ સાંડેસરા અને મિતેશ સાંડેસરાના જણાવ્યાનુસાર, દર વર્ષે કંઈક નવું રજૂ કરવાના હેતુથી આ વખતે સ્વિત્ઝર્લેન્ડના સ્નો સિટીની થીમ પસંદ કરાઈ હતી. જેની તૈયારીઓ છેલ્લા 6 મહિનાથી ચાલતી હતી અને અંતિમ 20 દિવસમાં તેને આખરી ઓપ અપાયો હતો.

કૃત્રિમ બરફવર્ષા અને ઠંડોગાર માહોલ પંડાલમાં પ્રવેશતા જ મુલાકાતીઓને સ્વિત્ઝર્લેન્ડના બરફીલા પ્રદેશમાં હોવાનો અહેસાસ થાય છે. વાતાવરણને એકદમ વાસ્તવિક અને ઠંડુ રાખવા માટે અમે ઘણી તૈયારી કરી છે. જેમ કે...

• પંડાલમાં કુલ 8 AC મૂકવામાં આવ્યા છે.
• સ્નો મશીનની મદદથી કૃત્રિમ બરફવર્ષા (Snowfall) કરાય છે.
• પંડાલમાં ઈગ્લુ, પેંગ્વિન, આઈસમેન, બરફીલા પ્રદેશના પ્રાણીઓ અને કૃત્રિમ લેક (તળાવ) તૈયાર કરાયા છે.

મહાદેવના અવતારમાં બાપ્પાના દર્શન બરફીલા વાતાવરણની સાથે બાપ્પાની પ્રતિમા પણ અનોખી રીતે કંડારવામાં આવી છે. આ વર્ષે ગણેશજીને મહાદેવના અવતાર સ્વરૂપે બિરાજમાન કરાયા છે, જેમાં તેમની જટા, માથે ચંદ્ર અને ગળામાં નાગ જેવી વિશેષતાઓ સ્પષ્ટપણે જોઈ શકાય છે. ધાર્મિક આસ્થાની સાથે આ અનોખો અનુભવ સુરતવાસીઓ માટે યાદગાર બની રહ્યો છે.