અજમાવી જૂઓ

પાઉની સ્લાઈસની કાપેલી કિનારીઓ ફેંકી ન દેતાં પરોઠા કે નાન બનાવવાના લોટમાં ભેળવી દેવાથી તેમાંનું પોષક તત્ત્વો વેડફાઈ નહીં જાય.

ફણસી, વટાણા અને કોબીમાં મીઠું નાખ્યા વગર રાંધવાથી તેનો રંગ જળવાઈ રહેશે.

દહીં બહુ ખાટું થઈ ગયું છે? મૂંઝાશો નહીં. મખમલના કપડામાં બાંધી પાણી નિતારી દેવાથી ખટાશ નીકળી જશે. નિતરેલા દહીંમાં થોડું દૂધ ભેળવી દેવું. દહીંનું નીતરેલું પાણી ફેંકી ન દેતાં પરોઠાના લોટ બાંધવાના ઉપયોગમાં લેવું. અથવા તાંબાના વાસણો ઘસવાથી ચળકતા થઈ જશે.

કૉબીફ્લાવર રંધાતુ હોય ત્યારે તેમાં લીંબુની છાલ નાખવાથી, શાકની સફેદાઈ જળવાઈ રહેશે.

કૉબીનું શાક બનાવતી વખતે તેમાં અડધી સ્લાઈસ પાઉંની મલમલના કપડામાં મૂકી દેવાથી શાકની ગંધ નહીં આવે.

સાબુદાણાને નહીં જેવા શેકી ઠંડા પડે ઉપયોગમાં લેવાથી સાબુદાણા એકબીજાને ચોંટી નહીં જાય.

ઘરે પનીર બનાવતી વખતે દૂધ ફાડતી વખતે લીંબુનો રસ નાખવાને બદલે દહીંથી દૂધ ફાડવાથી પનીરનું પ્રમાણ વધુ નીકળશે.

ખસખસને હળવી શેકી તેમાં ચપટી સાકર ભેળવી દળવાથી ખસખસ સરળતાથી દળાશે.

મિનાક્ષી તીવારી