8 છગ્ગા, 6 ચોગ્ગા અને 63 બોલમાં સદી... વૈભવ સૂર્યવંશી દ.આફ્રિકાના બોલર્સ પર તૂટી પડ્યો

Vaibhav Suryavanshi News : ભારત અને સાઉથ આફ્રિકા વચ્ચે રમાઈ રહેલી ત્રીજી U19 યુથ વનડેમાં ભારતીય કેપ્ટન વૈભવ સૂર્યવંશીનું બેટ ફરી એકવાર ગરજ્યું હતું. તેણે માત્ર 63 બોલમાં વિસ્ફોટક સદી ફટકારીને દક્ષિણ આફ્રિકાના બોલરોને દબાણમાં મૂકી દીધા હતા. આ મેચમાં દક્ષિણ આફ્રિકાએ ટોસ જીતીને પ્રથમ બોલિંગ કરવાનો નિર્ણય લીધો હતો.

વૈભવ સૂર્યવંશીની શાનદાર ઇનિંગ્સ

ટોસ હારીને પ્રથમ બેટિંગ કરવા ઉતરેલી ભારતીય અંડર-19 ટીમની શરૂઆત વૈભવ સૂર્યવંશી અને એરોન જ્યોર્જે કરી હતી. શરૂઆતમાં, વૈભવે સાઉથ આફ્રિકાની ઝડપી બોલિંગ સામે સાવચેતીભરી રમત રમી હતી, પરંતુ એકવાર સેટ થયા પછી તેણે આક્રમક વલણ અપનાવ્યું હતું.

તેણે માત્ર 24 બોલમાં 4 છગ્ગા અને 5 ચોગ્ગાની મદદથી પોતાની અડધી સદી પૂરી કરી હતી. ત્યારપછી પણ તેણે પોતાની આક્રમક રમત ચાલુ રાખી અને 63 બોલમાં 8 છગ્ગા અને 6 ચોગ્ગાની મદદથી શાનદાર સદી ફટકારી. તેની સાથે ઓપનર એરોન જ્યોર્જે પણ શાનદાર ઇનિંગ રમી હતી.

ક્લીન સ્વીપ પર ભારતની નજર

આ મેચ પહેલા જ સિરીઝમાં 2-0ની અજેય સરસાઈ મેળવી ચૂકેલી ભારતીય ટીમ આ મેચ જીતીને ક્લીન સ્વીપ કરવાના ઈરાદાથી મેદાનમાં ઉતરી છે. જ્યારે દક્ષિણ આફ્રિકા માટે આ મેચ ઘરેલુ પરિસ્થિતિમાં પોતાનું સન્માન બચાવવાનો છેલ્લો મોકો છે.

બંને ટીમોની પ્લેઈંગ XI:

ભારત U19: એરોન જ્યોર્જ, વૈભવ સૂર્યવંશી (કેપ્ટન), વેદાંત ત્રિવેદી, અભિજ્ઞાન કુંડુ (વિકેટકીપર), હરવંશ પંગાલિયા, આરએસ અંબરીશ, કનિષ્ક ચૌહાણ, મોહમ્મદ ઈનાન, હેનિલ પટેલ, ઉદ્ધવ મોહન, કિશન સિંહ.

સાઉથ આફ્રિકા U19: જોરિચ વૈન શાલ્કવિક, અદનાન લગાડિએન, મુહમ્મદ બુલબુલિયા (કેપ્ટન), જેસન રોઉલ્સ, પૉલ જેમ્સ, લેથાબો ફહલામોહલાકા (વિકેટકીપર), કોર્ન બોથા, ડેનિયલ બોસમેન, જેજે બૈસન, માઈકલ ક્રુઈસ્કૈમ્પ, ન્તાન્ડો સોની.