રોહિત-કોહલીની હવે જરૂર નથી? દિગ્ગજ ખેલાડીના દાવાએ ફેન્સને ચોંકાવ્યા, વર્લ્ડ કપ પહેલા નવી ચર્ચા

Sandeep Patil On Rohit Virat Future: ભારતીય ક્રિકેટ ટીમના બે દિગ્ગજ ખેલાડીઓ રોહિત શર્મા અને વિરાટ કોહલીના ભવિષ્યને લઈને ક્રિકેટ જગતમાં સતત ચર્ચાઓ થઈ રહી છે. 2027ના વનડે વર્લ્ડ કપમાં આ બંને સ્ટાર્સ રમશે કે નહીં તે અંગે અનિશ્ચિતતા પ્રવર્તી રહી છે, કારણ કે તે સમયે રોહિત 40 વર્ષનો અને કોહલી 39 વર્ષનો હશે. આ દરમિયાન 1983ની વિશ્વ વિજેતા ટીમના સભ્ય અને ભારતના પૂર્વ ઓલરાઉન્ડર સંદીપ પાટિલે ટીમ ઇન્ડિયાની મજબૂત બેન્ચ સ્ટ્રેન્થની પ્રશંસા કરતાં મોટું નિવેદન આપ્યું છે. તેમણે સ્પષ્ટપણે માન્યું છે કે આ બંને અનુભવી ખેલાડીઓ ટીમમાં હોય કે ન હોય, હવે ભારતીય ટીમના પ્રદર્શન પર તેની કોઈ નકારાત્મક અસર નહીં પડે.

વર્લ્ડ કપ 2027માં રમવા પર સંદીપ પાટિલની સીધી વાત

એક વાતચીતમાં સંદીપ પાટિલે બંને વરિષ્ઠ ખેલાડીઓની ઉપલબ્ધિ અને ભવિષ્ય વિશે જણાવ્યું:

"2027ના વનડે વર્લ્ડ કપમાં રોહિત અને કોહલીનું રમવું ઘણી બાબતો પર નિર્ભર રહેશે, જેમ કે તેમની રમવાની ઇચ્છા, તેમની ફિટનેસ અને સિલેક્ટર્સની વિચારસરણી. આ બંને ખેલાડીઓ પર નિર્ભર કરે છે કે શું તેઓ રમવાનું ચાલુ રાખવા માંગશે? શું તેઓ પોતાની ફિટનેસ જાળવી શકશે? સિલેક્ટર્સની શું રણનીતિ છે અને શું તેઓ ભવિષ્ય તરફ જોઈ રહ્યા છે? વર્તમાન ખેલાડીઓની સાથે સાથે આપણે હંમેશાં એ પણ વિચારવું પડશે કે જો તેમને ટીમમાંથી બહાર કરવાનો સમય આવે, તો શું આપણી પાસે તેમની જગ્યા લઈ શકે તેવા મજબૂત ખેલાડીઓ છે. અને ભારતીય ટીમની બેન્ચ સ્ટ્રેન્થને જોતાં મને નથી લાગતું કે કોઈ સમસ્યા થશે, ભલે વિરાટ અને રોહિત ટીમમાં હોય કે ન હોય."

બંને મહાન ખેલાડીઓના પ્રદાનની કરી પ્રશંસા

પોતાની વાત આગળ વધારતાં સંદીપ પાટિલે બંને સિનિયર ક્રિકેટરોના લાંબા યોગદાનને બિરદાવતા કહ્યું:

"બંને ખેલાડીઓ લાંબા સમયથી ટીમ સાથે છે અને તેમને દિગ્ગજ માનવામાં આવશે. રોહિત શર્મા વ્હાઇટ બોલ ક્રિકેટમાં શાનદાર ખેલાડી રહ્યા છે. જ્યાં સુધી વિરાટની વાત છે, તેમના વિશે જેટલું પણ કહું તેટલું ઓછું પડશે."

વેસ્ટ ઇન્ડિઝ સામેની વનડે શ્રેણીમાં સાથે રમશે

આ ચર્ચાઓ વચ્ચે બંને દિગ્ગજો વેસ્ટ ઇન્ડિઝ સામે રમાનારી ત્રણ મેચની વનડે શ્રેણીમાં ભારતીય ટીમ તરફથી મેદાનમાં સાથે રમતા જોવા મળશે. આ શ્રેણીનો પ્રારંભ 27 સપ્ટેમ્બરથી થશે. શ્રેણીની બીજી વનડે મેચ 30 સપ્ટેમ્બરે અને ત્રીજો તથા અંતિમ મુકાબલો 3 ઓક્ટોબરના રોજ રમાશે, જેમાં ચાહકો ફરી એકવાર આ બંને સિનિયર બેટ્સમેનોને ક્રિઝ પર સાથે રમતા જોઈ શકશે.