CWG 2026ના ટ્રિપલ જમ્પમાં પ્રવીણ ચિત્રાવેલે જીત્યો સિલ્વર, તો સેલ્વા પ્રભુને મળ્યો બ્રોન્ઝ મેડલ

Praveen Wins Silver Selva Bags Bronze: કૉમનવેલ્થ ગેમ્સ 2026ના ટ્રેક એન્ડ ફિલ્ડ કોમ્પિટિશનમાં ભારત માટે સફળતાનો સિલસિલો 1 ઓગસ્ટના રોજ પણ ચાલુ રહ્યો. પુરુષોની ટ્રિપલ જમ્પ સ્પર્ધામાં ભારતે ડબલ મેડલ પર કબ્જો જમાવ્યો છે. ભારતના નંબર-1 ટ્રિપલ જમ્પર પ્રવીણ ચિત્રાવેલે સિલ્વર મેડલ જીત્યો છે, જ્યારે પ્રથમ વખત આ ગેમ્સમાં ભાગ લઈ રહેલા સેલ્વા પ્રભુ તિરૂમારને બ્રોન્ઝ મેડલ જીતીને દેશની ખુશી બમણી કરી દીધી છે.

પ્રવીણે પૂરી કરી 4 વર્ષ જૂની કસર

પ્રવીણ ચિત્રાવેલ માટે આ જીત ખૂબ જ ખાસ હતી, કારણ કે 4 વર્ષ પહેલા બર્મિંગહામ ગેમ્સમાં તે ખૂબ જ ઓછા અંતરથી બ્રોન્ઝ મેડલથી ચૂકી ગયો હતો, અને ચોથા સ્થાને રહ્યો હતો. આ વખતે પ્રવીણે 16.58 મીટરની શ્રેષ્ઠ છલાંગ લગાવીને સિલ્વર મેડલ પોતાના નામે કર્યો. જમૈકાના જોર્ડન સ્કોટે 16.72 મીટરની છલાંગ લગાવીને ગોલ્ડ મેડલ જીત્યો.

ડેબ્યૂ CWGમાં જ મેળવ્યો મેડલ

બીજી તરફ 21 વર્ષીય સેલ્વા પ્રભુ તિરૂમારને પોતાના ડેબ્યૂ કૉમનવેલ્થ ગેમ્સમાં જ 16.52 મીટરની જમ્પ લગાવીને બ્રોન્ઝ મેડલ પોતાના નામે કર્યો. સેલ્વા પ્રભુની કારકિર્દીનો આ અત્યાર સુધીનો સૌથી મોટો મેડલ છે. આ પહેલા તેમણે વર્ષ 2022માં અંડર-20 વર્લ્ડ એથ્લેટિક્સ ચેમ્પિયનશિપમાં સિલ્વર મેડલ જીત્યો હતો.