'હજુ મારું કામ પૂરું થયું નથી...', 2027 ના વર્લ્ડ કપ અગાઉ રોહિત શર્માનું મોટું નિવેદન

Rohit Targets 2027 World Cup: ભારતીય ક્રિકેટ ટીમના દિગ્ગજ બેટ્સમેન રોહિત શર્માએ 2027ના આઈસીસી વનડે વર્લ્ડ કપ અંગે પોતાના ભવિષ્યને લઈને મહત્ત્વનો અને મોટો સંકેત આપ્યો છે. ટેસ્ટ અને T20 ઇન્ટરનેશનલ ક્રિકેટમાંથી પહેલેથી જ નિવૃત્તિ લઈ ચૂકેલા રોહિત હાલ માત્ર વનડે ક્રિકેટમાં ભારતનું પ્રતિનિધિત્વ કરી રહ્યા છે. વેસ્ટ ઈન્ડિઝ સામેની વનડે શ્રેણી શરૂ થવા પૂર્વે તેમણે સ્પષ્ટ કર્યું છે કે તેમના માટે ક્રિકેટની સફર હજી સમાપ્ત થઈ નથી અને ઘણું બધું હાંસલ કરવાનું બાકી છે.

'મારા મગજમાં ક્યારેય એ વિચાર નહીં આવે કે મારું કામ પૂરું થઈ ગયું'

એક ખાસ વાતચીતમાં રોહિત શર્માએ જણાવ્યું હતું:

"મારા મગજમાં ક્યારેય એ વિચાર નહીં આવે કે મારે જે કામ કરવાનું હતું તે પૂરું થઈ ગયું છે. જ્યાં સુધી તમે ક્રિકેટ રમી રહ્યા છો, ત્યાં સુધી સામે જોવા માટે હંમેશાં કંઈક ને કંઈક લક્ષ્ય ચોક્કસ હોય છે. હું 2027 વર્લ્ડ કપની રાહ જોઈ રહ્યો છું અને જોઈ રહ્યો છું કે ભવિષ્યમાં મારા માટે શું રહેલું છે."

રોહિતે એમ પણ ઉમેર્યું કે આઈસીસી ટુર્નામેન્ટ્સ સામાન્ય દ્વિપક્ષીય શ્રેણીઓ કરતાં તદ્દન અલગ પ્રકારના પડકારો લઈને આવે છે. અલગ-અલગ મજબૂત હરીફ ટીમો સામે અને જુદી જુદી પરિસ્થિતિઓમાં રમવા માટે ખાસ તૈયારી તેમજ વિચારસરણીમાં મોટો બદલાવ લાવવો જરૂરી બને છે.

2023માં અધૂરું રહેલું સપનું 2027માં પૂરું કરવાનો લક્ષ્યાંક

રોહિત શર્માની કેપ્ટનશીપ હેઠળ ભારતીય ટીમ 2023ના વનડે વર્લ્ડ કપની ફાઇનલ સુધી અજેય રહીને પહોંચી હતી, પરંતુ અમદાવાદ ખાતે ઓસ્ટ્રેલિયા સામે હાર થતાં ટ્રોફી જીતવાનું સપનું તૂટી ગયું હતું. રોહિત હવે 2027ના વર્લ્ડ કપમાં આ અધૂરા સપનાને પૂરું કરવાનો પ્રયાસ કરતા જોવા મળી શકે છે.

સાઉથ આફ્રિકામાં રમાશે વર્લ્ડ કપ 2027, 'રો-કો'ની જોડી ફરી મચાવશે ધમાલ

વર્ષ 2027નો વનડે વર્લ્ડ કપ ઓક્ટોબર-નવેમ્બર મહિનામાં સાઉથ આફ્રિકા, ઝિમ્બાબ્વે અને નામિબિયાની સંયુક્ત યજમાની હેઠળ રમાવાનો છે. વિરાટ કોહલી પણ અગાઉ 2027ના વર્લ્ડ કપને પોતાની કારકિર્દીનો છેલ્લો વિશ્વકપ ગણાવી ચૂક્યા છે. આવી સ્થિતિમાં રોહિત શર્મા અને વિરાટ કોહલી (Ro-Ko)ની લોકપ્રિય જોડી ફરી એકવાર વનડે ક્રિકેટના આ સૌથી મોટા વૈશ્વિક મંચ પર ધમાલ મચાવતી જોવા મળશે.