શ્રેયસની કૅપ્ટનશિપમાં ભારતની હારનો સિલસિલો યથાવત્, માન્ચેસ્ટર ટી20માં ઇંગ્લૅન્ડની 4 વિકેટે જીત

India vs England 2nd T20I 2026: ભારત અને ઇંગ્લૅન્ડ વચ્ચે પાંચ મેચોની ટી20 શ્રેણીનો આજે (4 જુલાઈ) બીજો મુકાબલો માન્ચેસ્ટરના ઓલ્ડ ટ્રેફર્ડમાં રમાયો, જેમાં ભારતે પ્રથમ બેટિંગ કરતાં ઇંગ્લૅન્ડને 191 રનનો ટાર્ગેટ આપ્યો હતો, જેને ઇંગ્લૅન્ડે 19મી ઓવરમાં સરળતાથી હાંસલ કરી 4 વિકેટે મેચ જીતી લીધી. મહત્ત્વનું છે કે પહેલો મુકાબલો વરસાદને કારણે રદ રહ્યો હતો, હવે ત્રીજો મુકાબલો 7 જુલાઇએ રમાશે.

ઇંગ્લૅન્ડની ઇનિંગ

ઇંગ્લૅન્ડની શરૂઆત ખૂબ જ નબળી રહી હતી, જ્યાં ઓપનર ફિલિપ સોલ્ટ (0) અને કૅપ્ટન જોસ બટલર (0) બંને અર્શદીપ સિંહનો શિકાર બની સસ્તામાં પેવેલિયન ભેગા થયા હતા. જો કે, મધ્યક્રમમાં જેકોબ બેથેલે શાનદાર ઇનિંગ રમીને ઇંગ્લૅન્ડની બાજી સંભાળી હતી. બેથેલે માત્ર 46 બોલમાં અણનમ 76 રન ફટકાર્યા હતા, જ્યારે હેરી બ્રૂક (15 બોલમાં 39 રન) અને ટોમ બેન્ટન (32 બોલમાં 39 રન) તરફથી સારો સાથ મળ્યો હતો. ભારત તરફથી અર્શદીપ સિંહે 3 વિકેટ ઝડપી હતી, જ્યારે વરુણ ચક્રવર્તી, અક્ષર પટેલ અને હર્ષિત રાણાને 1-1 વિકેટ મળી.

ભારતની ઇનિંગ

ભારતે પાવરપ્લેમાં સારી શરૂઆત કરતાં 1 વિકેટે 65 રન બનાવ્યા હતા અને 15 ઓવરમાં સ્કોર 144 રન સુધી પહોંચાડી દીધો હતો. જો કે, અંતિમ ઓવરોમાં રનની ગતિ ધીમી પડી હતી અને 16મીથી 18મી ઓવર વચ્ચે માત્ર 18 રન જ આવ્યા હતા, પરંતુ છેલ્લી ઓવરમાં ભારતીય બેટ્સમેનોએ 17 રન ફટકારીને 20 ઓવરમાં 7 વિકેટે 190 રનનો સ્કોર બોર્ડ પર મૂક્યો હતો. ભારત તરફથી ઇશાન કિશને સૌથી વધુ 49 રનનું યોગદાન આપ્યું હતું, જ્યારે કૅપ્ટન શ્રેયસ અય્યરે 37 રન અને ઓપનર અભિષેક શર્માએ 43 રનની ઉપયોગી ઇનિંગ્સ રમી હતી. અંતમાં તિલક વર્માએ 11 બોલમાં અણનમ 24 રન બનાવીને સ્કોરને 190 સુધી પહોંચાડ્યો હતો.

આ મેચમાં માત્ર 15 વર્ષ અને 99 દિવસની ઉંમરે ઇન્ટરનેશનલ ક્રિકેટમાં ડેબ્યૂ કરીને વૈભવ સૂર્યવંશીએ ઇતિહાસ રચી દીધો છે. તે ભારત તરફથી આંતરરાષ્ટ્રીય ક્રિકેટમાં ડેબ્યૂ કરનાર સૌથી યુવા ખેલાડી બની ગયો છે, સાથે જ ટી20 આંતરરાષ્ટ્રીય મેચમાં સિક્સર મારનાર સૌથી નાની ઉંમરનો ભારતીય પણ બન્યો છે. જો કે, તે મોટી ઇનિંગ રમવામાં નિષ્ફળ રહ્યો હતો અને 10 બોલમાં 2 સિક્સરની મદદથી 14 રન બનાવી આઉટ થયો હતો. ઇંગ્લૅન્ડ તરફથી બોલિંગમાં સેમ કરને શાનદાર પ્રદર્શન કરતા 4 ઓવરમાં 33 રન આપીને સૌથી વધુ 3 વિકેટ ઝડપી હતી, જ્યારે જોફ્રા આર્ચર, વિલ જેક્સ (જેણે વૈભવને આઉટ કર્યો) અને લિયામ ડોસનને એક-એક સફળતા મળી હતી.

ભારત અને ઇંગ્લૅન્ડની પ્લેઇંગ ઇલેવન

• ટીમ ઇન્ડિયા: વૈભવ સૂર્યવંશી, અભિષેક શર્મા, ઈશાન કિશન, શ્રેયસ અય્યર, તિલક વર્મા, શિવમ દુબે, હર્ષિત રાણા, અક્ષર પટેલ, રવિ બિશ્નોઈ, અર્શદીપ સિંહ અને વરુણ ચક્રવર્તી.
• ટીમ ઇંગ્લૅન્ડ: ફિલ સોલ્ટ, જોસ બટલર, હેરી બ્રુક, જેકબ બેથલ, ટોમ બેન્ટન, સેમ કરન, વિલ જેક્સ, લિયામ ડોસન, આદિલ રશીદ, જોફ્રા આર્ચર અને જોશ ટંગ.