ICC Women's T20 World Cup 2026, India vs Pakistan : આઈસીસી વિમેન્સ ટી20 વર્લ્ડ કપ 2026માં ભારત અને પાકિસ્તાન વચ્ચેની મેચ દરમિયાન મેદાન પર ફરી એકવાર 'નો હેન્ડશેક' પોલિસી જોવા મળી છે. બર્મિંગહામના એજબેસ્ટન મેદાન પર રમાયેલા આ મુકાબલામાં ટૉસ જીત્યા બાદ ભારતીય કેપ્ટન હરમનપ્રીત કૌરે પાકિસ્તાનની કેપ્ટન ફાતિમા સના સાથે હાથ મિલાવ્યા નહોતા. ભારત અને પાકિસ્તાનના ખેલાડીઓ વચ્ચે હેન્ડશેક ન થવાની આ ઘટનાએ સોશિયલ મીડિયા અને ક્રિકેટ જગતમાં ભારે ચર્ચા જગાવી છે.
અગાઉ પણ હેન્ડશેક ન કરવાનો લેવાયો છે નિર્ણય
ભારતીય ટીમ દ્વારા પાકિસ્તાન સામે હેન્ડશેક ન કરવાનો આ કોઈ પ્રથમ કિસ્સો નથી. આ પહેલાં વર્ષ 2025માં કોલંબો ખાતે રમાયેલા મહિલા ક્રિકેટ વિશ્વ કપ દરમિયાન પણ ભારતીય ટીમે પાકિસ્તાન સામેની મેચમાં આ જ પ્રકારનું વલણ અપનાવ્યું હતું. ખેલાડીઓ વચ્ચે મેદાન પર અંતર જાળવવાનો આ સિલસિલો સતત બીજી આંતરરાષ્ટ્રીય ટૂર્નામેન્ટમાં પણ યથાવત રહ્યો છે.
પુરુષ એશિયા કપ 2025થી થઈ હતી શરૂઆત
આ વિવાદની વાસ્તવિક શરૂઆત પુરુષ એશિયા કપ 2025 દરમિયાન થઈ હતી. તે ટૂર્નામેન્ટમાં ભારત અને પાકિસ્તાન ત્રણ વખત આમને-સામને આવ્યા હતા અને ભારતીય ખેલાડીઓએ મેચ પહેલાં કે મેચ પૂરી થયા પછી પાકિસ્તાની ખેલાડીઓ સાથે હેન્ડશેક કરવાનું ટાળ્યું હતું. આ મામલો ત્યારે વધુ ચર્ચામાં આવ્યો જ્યારે ભારતીય ટીમે એશિયા કપ જીત્યા બાદ પાકિસ્તાન ક્રિકેટ બોર્ડ (PCB)ના અધ્યક્ષ મોહસિન નકવીના હાથે ટ્રોફી લેવાનો પણ ઇનકાર કરી દીધો હતો.
આ પણ વાંચો : VIDEO: ટી20 મુંબઈની ફાઈનલ મેચમાં ખેલાડીઓ વચ્ચે ઉગ્ર બોલાચાલી, મારપીટ થતાં રહી ગઈ!
સવાલ પૂછાતા પ્રેસ કોન્ફરન્સમાં ગરજી હરમનપ્રીત
આ હાઈવોલ્ટેજ મેચ પહેલાં યોજાયેલી પ્રેસ કોન્ફરન્સમાં જ્યારે ભારતીય કેપ્ટન હરમનપ્રીત કૌરને આ હેન્ડશેક વિવાદ અંગે સવાલ પૂછવામાં આવ્યો, ત્યારે તેણે સ્પષ્ટ શબ્દોમાં જડબાતોડ જવાબ આપ્યો હતો. હરમનપ્રીતે કહ્યું હતું કે, ‘અમે અહીં ક્રિકેટ રમવા આવ્યા છીએ. તમે આ સવાલ કેમ પૂછી રહ્યા છો?’ ભારતીય કેપ્ટનના આ મક્કમ જવાબને સોશિયલ મીડિયા પર ખૂબ જ સરાહવામાં આવ્યો હતો અને તેને ટીમનું માત્ર રમત પર જ ફોકસ હોવાનો સંકેત માનવામાં આવ્યો હતો.
આ પણ વાંચો : રન આઉટ થયા બાદ રોહિત શર્માએ શુભમન ગિલને શું કહ્યું? ખુદ કેપ્ટને આપ્યો જવાબ
