Asian Games 2026: ભારતને સાતમો 'ગોલ્ડ', તીરંદાજીમાં ચીનને હરાવી મહિલાઓએ કરી કમાલ

Asian Games 2026: એશિયન ગેમ્સ 2026 ના 11મા દિવસે ભારતીય મહિલા કમ્પાઉન્ડ તીરંદાજી ટીમે અદ્ભુત પ્રદર્શન કરીને સમગ્ર દેશનું માથું ગર્વથી ઊંચું કરી દીધું છે. ફાઇનલના રોમાંચક જંગમાં ચીનની ટીમને હાર આપીને ભારતે ગોલ્ડ મેડલ પર કબ્જો જમાવ્યો છે. આ સાથે જ ચાલુ એશિયન ગેમ્સમાં ભારતની ઝોળીમાં સાતમો સુવર્ણચંદ્રક આવી ગયો છે.

પરફેક્ટ 10 ના શૉટ્સ અને વર્લ્ડ રેકોર્ડની બરાબરી

ખિતાબી મુકાબલાની શરૂઆતથી જ ભારતીય મહિલા ખેલાડીઓએ ચીન પર દબાણ બનાવી દીધું હતું. પહેલા જ રાઉન્ડમાં ભારતની ત્રણેય તીરંદાજોએ અચૂક નિશાન સાધીને 10-10 ના પરફેક્ટ શૉટ્સ ફટકાર્યા હતા.

ચીને ફાઇનલ રાઉન્ડમાં 10 ના સ્કોરથી શરૂઆત કરી હતી, પરંતુ ત્યારબાદ બે વાર 9 નો સ્કોર થતાં તેઓ પાછળ ફેંકાઈ ગયા હતા. ભારતીય ટીમે સતત ત્રણ વાર પરફેક્ટ 10 નો સ્કોર કરીને જીત નક્કી કરી હતી. અંતિમ ક્ષણોમાં પણ સતત ત્રણ વાર પરફેક્ટ 10 નો સ્કોર સાધીને ભારતીય મહિલા ટીમે વર્લ્ડ રેકોર્ડની બરાબરી કરી હતી અને ગોલ્ડ મેડલ પોતાના નામે કરી લીધો હતો.

સેમીફાઇનલમાં દક્ષિણ કોરિયા સામે શ્વાસ થંભાવી દેનારો જંગ

ફાઇનલ પહેલાં સેમીફાઇનલમાં ભારત અને દક્ષિણ કોરિયા વચ્ચે શ્વાસ થંભાવી દેનારી ટક્કર જોવા મળી હતી. અત્યંત કટોકટીના સમયે ભારતીય મહિલા ખેલાડીઓ ચિખિથા તનીપ્રથી, પ્રિતિકા પ્રદીપ અને જ્યોતિ સુરેખા વેન્નમ ની ત્રિપુટીએ અદ્ભુત સંયમ અને કૌશલ્ય દાખવ્યું હતું.

દક્ષિણ કોરિયાની મજબૂત ટીમે આકરી નિશાનેબાજી કરી હતી, પરંતુ ચિખિથાની શાનદાર વાપસી, પ્રિતિકાના અચૂક નિશાના અને અનુભવી જ્યોતિ સુરેખાના આખરી ઓપના દમ પર ભારતે 234-233 ના રોમાંચક માર્જિનથી કોરિયાને હરાવીને ફાઇનલમાં પ્રવેશ કર્યો હતો.

ભારતીય તીરંદાજી વિશ્વની ટોચની શક્તિ બની

ચીન અને કોરિયા જેવા તીરંદાજીના મહારાથી દેશોને ધૂળ ચાટતી કરનાર ચિખિથા, પ્રિતિકા અને જ્યોતિ સુરેખાની આ સુવર્ણ ત્રિપુટીએ સાબિત કરી દીધું છે કે ભારતીય તીરંદાજી હવે વિશ્વની સર્વોચ્ચ શક્તિઓમાં સામેલ થઈ ચૂકી છે. આ ઐતિહાસિક ગોલ્ડ મેડલથી દેશભરના રમતપ્રેમીઓમાં જશ્નનો માહોલ છવાઈ ગયો છે.