જૂના સોફ્ટવેરવાળા ફોનમાં WhatsApp લોગિન બ્લોક: યુઝર્સ માટે OS અપડેટ ફરજિયાત, જાણો વિગત

WhatsApp Mandates OS Update For Login: વોટ્સએપે સુરક્ષા વધારવાના હેતુથી જૂના ઓપરેટિંગ સિસ્ટમ (OS) પર ચાલતા સ્માર્ટફોન્સમાં યુઝર્સના લોગિન બ્લોક કરવાનું શરૂ કર્યું છે. આ ફેરફાર માત્ર વોટ્સએપ પૂરતો સીમિત ન રહેતાં સમગ્ર મોબાઈલ એપ્સ ઇકોસિસ્ટમની સુરક્ષા મજબૂત કરવાના પ્રયાસરૂપે લાગુ કરવામાં આવી રહ્યો છે. કંપની આ નવો નિયમ એપ અપડેટ દ્વારા નહીં, પરંતુ પોતાની બેકએન્ડ સિસ્ટમ્સ મારફતે સીધો લાગુ કરી રહી છે.

Android અને iOS બંને પર નવી સિસ્ટમ

જ્યારે કોઈ યુઝર જૂની OS ધરાવતા ફોન પર લોગિન કરવાનો પ્રયાસ કરે છે, ત્યારે વોટ્સએપ સ્ક્રીન પર વોર્નિંગ મેસેજ દર્શાવે છે. આ મેસેજ યુઝરને સીધા ફોનના સેટિંગ્સમાં જઈને ઉપલબ્ધ સોફ્ટવેર અપડેટ ઇન્સ્ટોલ કરવાનું કહે છે. એકવાર ઓપરેટિંગ સિસ્ટમ અપડેટ થઈ જાય પછી જ યુઝર સાઇન-ઇન પ્રક્રિયા પૂર્ણ કરી શકે છે. આ નવો સિક્યોરિટી ચેક હાલ એન્ડ્રોઇડ અને આઇઓએસ બંને પ્લેટફોર્મ પર જોવા મળ્યો છે, જોકે તે હજુ તબક્કાવાર રીતે રોલઆઉટ થઈ રહ્યો છે.

આ કડક પગલું કેમ લેવામાં આવ્યું?

જૂની ઓપરેટિંગ સિસ્ટમમાં રહેલી સુરક્ષા ખામીઓનો લાભ લઈને હેકર્સ કે એટેકર્સ સરળતાથી ડિવાઇસ હેક કરી શકે છે. વોટ્સએપમાં એન્ડ-ટુ-એન્ડ એન્ક્રિપ્શન હોવા છતાં, જો ફોનમાં જૂના સોફ્ટવેરના કારણે પહેલેથી જ કોઈ માલવેર પ્રવેશી ચૂક્યું હોય, તો તે મેસેજ એન્ક્રિપ્ટ થાય તે પહેલાં કે ડિક્રિપ્ટ થયા બાદ ડેટા ચોરી શકે છે. આથી વોટ્સએપે હવે ઉપકરણની ઓપરેટિંગ સિસ્ટમને પોતાની મુખ્ય સુરક્ષા શૃંખલાનો ભાગ બનાવી દીધી છે.

જૂના સ્માર્ટફોન યુઝર્સ માટે મોટી મુશ્કેલી

• બાયપાસ કરવાનો કોઈ વિકલ્પ નથી: જે યુઝર્સની સ્ક્રીન પર આ નવો બ્લોક સ્ક્રીન દેખાશે, તેમની પાસે આ પ્રક્રિયાને બાયપાસ કે સ્કીપ કરીને વોટ્સએપ વાપરવાનો કોઈ રસ્તો રહેતો નથી.
• જૂના ફોનમાં કાયમી બંધ થઈ શકે છે સેવા: જે સ્માર્ટફોન્સ જૂના થઈ ગયા છે અને કંપનીઓએ તેના માટે નવા OS અપડેટ્સ આપવાનું બંધ કરી દીધું છે, તેવા યુઝર્સ માટે મોટો પ્રશ્ન ઊભો થશે. જો ફોનને નવું અપડેટ નહીં મળે, તો આખરે તેવા ઉપકરણો પર વોટ્સએપ એક્સેસ સંપૂર્ણપણે બંધ થઈ જશે.