સ્કેમર્સના ઈરાદાઓને ક્ષણવારમાં જાણી જશે વોટ્સએપનું આ નવું અનોખું ફીચર, યૂઝર્સને મોટો ફાયદો

Smarter Safety Against Cyber Scams: આજના ડિજિટલ યુગમાં સાયબર છેતરપિંડીના કિસ્સાઓ સતત વધી રહ્યા છે, જ્યાં ઠગો અજાણ્યા નંબર પરથી મેસેજ મોકલીને નિર્દોષ લોકોને પોતાની જાળમાં ફસાવે છે. સામાન્ય રીતે સાયબર સ્કેમર્સ સૌથી વધુ વોટ્સએપનો સહારો લઈને ભોગ બનનાર વ્યક્તિનો સંપર્ક કરતા હોય છે. આ વધતા જતા સાયબર ક્રાઈમ અને ઓનલાઈન ફ્રોડ સામે મોટો પ્રહાર કરતાં વોટ્સએપની પેરન્ટ કંપની મેટા દ્વારા એક અત્યંત મહત્ત્વપૂર્ણ અને સિક્યોરિટીથી સજ્જ ટૂલ લાવવાની જાહેરાત કરવામાં આવી છે. આ નવું ‘Scam Alert’ ફીચર શંકાસ્પદ મેસેજિસની ઓળખ કરીને યુઝર્સને તુરંત જ ચેતવણી આપશે.

ઓન-ડિવાઇસ મશીન લર્નિંગ પર કરશે કામ

વોટ્સએપનું આ લેટેસ્ટ સ્કેમ એલર્ટ ફીચર હાલ બીટા વર્ઝનમાં ટેસ્ટિંગ ફેઝ હેઠળ છે. તમામ સફળ ટેસ્ટિંગ બાદ તેને સામાન્ય યુઝર્સ માટે સ્ટેબલ વર્ઝનમાં લોન્ચ કરવામાં આવશે. ખાસ વાત એ છે કે આ ટૂલ ઓન-ડિવાઇસ મશીન લર્નિંગ મોડલ પર કામ કરે છે. જેના કારણે યુઝર્સની પ્રાઇવસી સંપૂર્ણપણે સુરક્ષિત રહેશે.

આ મોડલ સંપૂર્ણપણે તમારા પોતાના સ્માર્ટફોન પર જ પ્રોસેસ કરશે. મેસેજનો કોઈપણ ડેટા કે તેની કોઈ પણ માહિતી વોટ્સએપ સર્વર, મેટા અથવા અન્ય કોઈ ત્રીજા પ્લેટફોર્મ સુધી પહોંચશે નહીં, જેથી યુઝર્સની એન્ડ-ટુ-એન્ડ એન્ક્રિપ્શન અને ગોપનીયતા અકબંધ રહેશે.

શંકાસ્પદ મેસેજિસ પર મળશે 'વોર્નિંગ બેનર'

આ એડવાન્સ એલર્ટ સિસ્ટમ સ્માર્ટફોનના બેકગ્રાઉન્ડમાં સક્રિય રહીને કામ કરશે. જ્યારે કોઈ અજાણ્યા નંબર પરથી મેસેજ આવશે, ત્યારે સિસ્ટમ તે મેસેજની પેટર્નને સ્કેન કરશે. જો મેસેજનો પ્રકાર સાયબર સ્કેમ જેવો લાગશે—જેમ કે કોઈ તાત્કાલિક કામનું બહાનું કાઢવું, ખોટા દબાણ હેઠળ પૈસા માંગવા કે અંગત ડેટા માંગવો—તો આ ફીચર તાત્કાલિક સક્રિય થઈને ચેટ સ્ક્રીન પર રેડ ફ્લેગ સાથે એક મોટું ‘વોર્નિંગ બેનર’ ડિસ્પ્લે કરશે.

આ વોર્નિંગ બેનર જોયા પછી યુઝરને સાવચેત થવાની તક મળશે. યુઝર એક જ ક્લિકથી તે શંકાસ્પદ ચેટને સીધી બ્લોક કે રિપોર્ટ કરી શકશે. જો યુઝરને લાગે કે મેસેજ સુરક્ષિત છે, તો તે આ ચેતવણી બેનરને રિમૂવ પણ કરી શકે છે.

મેન્યુઅલી ઓન કરવું પડશે આ ફીચર

વોટ્સએપમાં સુરક્ષા આપનારું આ નવું સ્કેમ એલર્ટ ટૂલ ડિફોલ્ટ ઓન નહીં હોય, પરંતુ યુઝર્સે તેને પોતાની સેટિંગ્સમાં જઈને મેન્યુઅલી એક્ટિવેટ કરવું પડશે.

• તેના માટે યુઝરે વોટ્સએપના સેટિંગ્સ મેન્યુમાં જવાનું રહેશે.
• ત્યાંથી આ AI સિક્યોરિટી ટૂલ આપોઆપ ડાઉનલોડ થઈને સેટ થઈ જશે.
• યુઝર્સ પોતાની અનુકૂળતા મુજબ ગમે ત્યારે આ ફીચરને ઓન કે ઓફ કરી શકશે.

સાયબર ક્રિમિનલ્સ જ્યારે "Hi, હું…" કહીને અથવા વિવિધ લાલચો આપીને વોટ્સએપ દ્વારા લોકોને છેતરવાનો પ્રયાસ કરે છે, ત્યારે આ નવું AI બેઝ્ડ સ્કેમ પ્રોટેક્શન ફીચર યુઝર્સ માટે એક મજબૂત ઢાલ સાબિત થશે.