ટ્રમ્પે આપેલી છૂટ ખતમ થતાં હવે ભારત ક્યાંથી ખરીદશે ક્રૂડ ઓઇલ? જાણો કયા વિકલ્પ ઉપલબ્ધ

India Crude Oil Strategy: મિડલ ઈસ્ટમાં ચાલી રહેલા યુદ્ધ અને ઓઇલની વધતી કિંમતો વચ્ચે અમેરિકાએ રશિયન અને ઈરાની ઓઇલ પરના પ્રતિબંધોમાં આપેલી છૂટ હવે પૂરી થઈ રહી છે. અમેરિકન નાણા મંત્રી સ્કોટ બેસેન્ટે સ્પષ્ટ કર્યું છે કે, રશિયન ઓઇલ માટે આપવામાં આવેલ સામાન્ય લાયસન્સ રિન્યુ કરવામાં આવશે નહીં, જ્યારે ઈરાની ઓઇલ માટેની છૂટ પણ 19 એપ્રિલે સમાપ્ત થઈ જશે. આ નિર્ણયથી ભારત સામે ઓઇલ પુરવઠાનો નવો પડકાર ઊભો થયો છે, કારણ કે માર્ચ 2026માં ભારતનો રશિયન ક્રૂડ ઓઇલનો આયાત આંકડો નવ મહિનાની ટોચે એટલે કે પ્રતિદિન 1.96 મિલિયન બેરલ સુધી પહોંચી ગયો હતો.

લૅટિન અમેરિકાના દેશો પર ભારતની નજર

અમેરિકાના આ કડક વલણ બાદ હવે ભારત ઓઇલ માટે અન્ય વિકલ્પો પર ધ્યાન કેન્દ્રિત કરી રહ્યું છે. ભારત સરકારે હંમેશા ઓઇલની આયાતમાં વિવિધતા લાવવા પર ભાર મૂક્યો છે અને હાલમાં ભારત 40થી વધુ દેશોમાંથી ઊર્જા સ્ત્રોતોની આયાત કરી રહ્યું છે. હોર્મુઝ જેવા સંવેદનશીલ રૂટ પર નિર્ભરતા ઘટાડવા માટે ભારત હવે લૅટિન અમેરિકાના દેશો જેવા કે બ્રાઝિલ, કોલંબિયા અને ઈક્વાડોર તરફ નજર દોડાવી રહ્યું છે. આ ઉપરાંત, ગુયાના પણ ઓઇલ નિકાસકાર તરીકે ઝડપથી ઉભરી રહ્યું છે, જે ભારત માટે મહત્ત્વનું સાબિત થઈ શકે છે.

આ પણ વાંચો: રાજ્યસભામાં હરિવંશ સિંહની 'હેટ્રિક': ઈતિહાસમાં પહેલીવાર રાષ્ટ્રપતિએ નિમેલા સાંસદ બન્યા ઉપાધ્યક્ષ

આફ્રિકન દેશો ઓઇલ પુરવઠામાં બનશે મદદરૂપ

આગામી સમયમાં પશ્ચિમ આફ્રિકાના દેશો જેવા કે નાઈજીરિયા અને અંગોલા પાસેથી ઓઇલની આયાત વધવાની શક્યતા છે. આ દેશો ભારતને ખાડી દેશોના વિકલ્પ તરીકે સ્થિર જથ્થો પૂરો પાડી શકે તેમ છે. આ સાથે જ ભારત અમેરિકા પાસેથી પણ ક્રૂડ ઓઇલની ખરીદી વધારી શકે છે. જોકે, આ નવા વિકલ્પો રશિયા પાસેથી મળતા સસ્તા ઓઇલની પૂરેપૂરી ખોટ ભરી શકે તેમ નથી, જેના કારણે ભારતની આયાત પાછળ થતો ખર્ચ વધી શકે છે. તેમ છતાં, વિવિધ દેશો સાથેના વેપારને કારણે ભારત પ્રતિબંધોથી થતા નુકસાનને મહદઅંશે ઘટાડી શકશે.