‘...તો બોમ્બ ફેંકીને પાવર પ્લાન્ટ અને પુલ ઉડાવી દઈશું’, ટ્રમ્પે ફરી ઈરાનને ધમકી આપી

Donald Trump Warning to Iran : મધ્ય પૂર્વમાં વધતા તણાવ વચ્ચે અમેરિકાના રાષ્ટ્રપ્રમુખ ડોનાલ્ડ ટ્રમ્પે ઈરાનને ખુલ્લી ધમકી આપી છે. તેમણે સ્પષ્ટ કર્યું છે કે જો ઈરાન હોર્મુઝ જળમાર્ગમાંથી પસાર થતાં કોઈપણ જહાજ પર હુમલો કરશે, તો અમેરિકા તેના જવાબમાં ઈરાનના મહત્ત્વના ઇન્ફ્રાસ્ટ્રક્ચરને નિશાન બનાવીને તબાહ કરી દેશે.

‘…તો ઈરાનનો પાવર પ્લાન્ટ અને પુલ ઉડાવી દઈશું’

ટ્રમ્પે સોશિયલ મીડિયા પ્લેટફોર્મ પર પોસ્ટ કરીને ચેતવણી આપી છે. તેમણે જણાવ્યું હતું કે, 'હવેથી જ્યારે પણ ઈરાન હોર્મુઝ જળમાર્ગમાં કોઈપણ જહાજ પર મિસાઇલ, રોકેટ, ડ્રોન કે અન્ય હથિયારથી હુમલો કરશે, ત્યારે અમેરિકા તેના એક પુલ અથવા પાવર પ્લાન્ટને બોમ્બ ફેંકીને તબાહ કરી દેશે.' આ નિશાનાઓમાં રાજધાની તેહરાનમાં કે તેની આસપાસ આવેલા સ્થળો પણ સામેલ હશે.

અમેરિકાના ઈરાન પર સતત હુમલા જારી

ટ્રમ્પની આ ધમકી વચ્ચે અમેરિકી સેનાએ ઈરાન સામે સતત 11મી રાત્રે સૈન્ય અભિયાન ચલાવ્યું હતું. યુએસ સેન્ટ્રલ કમાન્ડના જણાવ્યા અનુસાર, મંગળવારે મોડી રાત્રે થયેલા આ હુમલા 75 મિનિટ સુધી ચાલ્યા હતા, જેમાં ઈરાનના ઓપરેશન સેન્ટરો, ડ્રોન સ્ટોરેજ અને સૈન્ય લોજિસ્ટિક્સને નિશાન બનાવાયા હતા.

30થી વધુ જહાજો પર હુમલાનો આરોપ

અમેરિકાનો આક્ષેપ છે કે ઈરાને છેલ્લા 3 મહિનામાં હોર્મુઝ ક્ષેત્રમાંથી પસાર થતાં 30થી વધુ વેપારી જહાજો પર હુમલા કર્યા છે. અમેરિકી સેનાનું કહેવું છે કે આ જવાબી કાર્યવાહીનો મુખ્ય હેતુ હોર્મુઝમાં વેપારી જહાજો માટે જોખમ ઊભું કરવાની ઈરાનની ક્ષમતાને નબળી પાડવાનો છે.

28 ફેબ્રુઆરીથી શરૂ થયેલો સંઘર્ષ વધુ વિકરાળ બન્યો

આ વર્તમાન સંઘર્ષની શરૂઆત 28 ફેબ્રુઆરીના રોજ થઈ હતી, જ્યારે અમેરિકા અને ઈઝરાયલે ઈરાન પર હુમલા શરૂ કર્યા હતા. તેના જવાબમાં ઈરાને પણ ઈઝરાયલ અને ખાડી દેશોમાં આવેલા અમેરિકી લશ્કરી ઠેકાણાઓ પર હુમલા કર્યા હતા. રિપોર્ટ મુજબ, આ યુદ્ધમાં અત્યાર સુધીમાં હજારો લોકોના મોત થયા છે અને લાખો લોકો વિસ્થાપિત થયા છે.