Strait of Hormuz News: ઈરાન અને ઈઝરાયલ વચ્ચે 28 ફેબ્રુઆરીથી શરૂ થયેલા ભયાનક યુદ્ધમાં હવે રાહતના સમાચાર મળી રહ્યા છે. અમેરિકા પણ આ જંગમાં કૂદી પડતા સ્થિતિ ગંભીર બની હતી, જેની સૌથી મોટી અસર ઓઇલ અને ગેસના સપ્લાય પર પડી હતી. વિશ્વના કુલ 20% ઓઇલ અને ગેસનો પુરવઠો જે માર્ગેથી પસાર થાય છે તે હોર્મુઝ સ્ટ્રેટ તણાવનું કેન્દ્ર બની હતી. જોકે, હવે ઈરાનના વિદેશ મંત્રી અબ્બાસ અરાઘચીએ હોર્મુઝનો માર્ગ ફરીથી સંપૂર્ણપણે ખોલવાની જાહેરાત કરી છે. અમેરિકન પ્રમુખ ડોનાલ્ડ ટ્રમ્પે પણ આ નિર્ણયને આવકારતા સોશિયલ મીડિયા પર ઈરાનનો આભાર માન્યો છે. હોર્મુઝ ખુલવાના કારણે ભારત માટે આર્થિક અને વ્યુહાત્મક દ્રષ્ટિએ ત્રણ મોટી ખુશખબર સામે આવી છે.
1. ક્રૂડ ઓઇલના ભાવમાં મોટો કડાકો
હોર્મુઝ ખુલવાની જાહેરાત થતાની સાથે જ આંતરરાષ્ટ્રીય બજારમાં ક્રૂડ ઓઇલના ભાવમાં 12% જેટલો જંગી ઘટાડો જોવા મળ્યો છે. ક્રૂડ ઓઇલ ઘટીને 83 ડૉલર પ્રતિ બેરલ સુધી પહોંચી ગયું છે. ભારત પોતાની જરૂરિયાતનું 85% ઓઇલ આયાત કરે છે, તેથી ઓઇલ સસ્તું થવાથી ભારતનું આયાત બિલ ઘટશે અને સરકારી તિજોરી પરનો બોજ ઓછો થશે. ખાસ કરીને સાઉદી અરેબિયા અને યુએઈથી આવતા ઓઇલનો પુરવઠો હવે કોઈ પણ અડચણ વગર ભારત પહોંચી શકશે.
2. શેરબજારમાં તેજી
હોર્મુઝ માર્ગ ખુલતાની સાથે જ સપ્લાય ચેઈનની અડચણો દૂર થઈ છે, જેની સીધી અસર શેરબજાર પર જોવા મળી રહી છે. જોકે શુક્રવારે ભારતીય બજાર બંધ થયા બાદ આ સમાચાર આવ્યા હતા, પરંતુ ગિફ્ટ નિફ્ટી(Gift Nifty)માં 400 પોઈન્ટ્સ એટલે કે 2%નો ઉછાળો જોવા મળ્યો છે. આ સંકેત આપે છે કે સોમવારે જ્યારે ભારતીય શેરબજાર ખુલશે ત્યારે બમ્પર ઓપનિંગ થઈ શકે છે. ખાસ કરીને ઓઇલ માર્કેટિંગ કંપનીઓ(HPCL, BPCL, IOC), પેઈન્ટ, ટાયર અને એવિએશન સેક્ટરના શેરમાં જોરદાર લેવાલી નીકળવાની શક્યતા છે.
3. સોના-ચાંદીના ભાવમાં ઉછાળો
સામાન્ય રીતે તણાવ ઓછો થાય ત્યારે સોનાના ભાવ ઘટે છે, પરંતુ આ વખતે સ્થિતિ અલગ જોવા મળી છે. મધ્ય પૂર્વમાં યુદ્ધ ટળવાના સમાચારથી રોકાણકારોનો વિશ્વાસ વધ્યો છે અને તેઓ ફરી સોના-ચાંદીમાં રોકાણ તરફ વળ્યા છે. ગ્લોબલ માર્કેટની અસરથી ભારતમાં પણ ચાંદી 5% વધીને 2.61 લાખ રૂપિયા પ્રતિ કિલો અને સોનું 1.50% વધીને 1.55 લાખ રૂપિયા (10 ગ્રામ) પર ટ્રેડ થઈ રહ્યું છે. આમ, હોર્મુઝનું ખુલવું એ માત્ર રાજદ્વારી જીત નથી, પરંતુ ભારતીય અર્થતંત્ર માટે બૂસ્ટર ડોઝ સમાન છે.
