'કોકરોચ' પર ભડક્યો 'શક્તિમાન', કહ્યું - 'PM ને ગાળો આપે છે અને પછી પાર્ટીઓ કરે છે...'

Mukesh Khanna CJP Protest Statement : દિલ્હીના જંતર-મંતર પર કોકરોચ જનતા પાર્ટી (CJP) અને વિદ્યાર્થીઓ દ્વારા કરવામાં આવેલા વિરોધ પ્રદર્શનને લઈને બોલિવૂડ ઈન્ડસ્ટ્રીમાં ચર્ચાઓ તેજ થઈ ગઈ છે. કંગના રાણૌતે પ્રદર્શનકારીઓ પર પ્રહાર કર્યા બાદ હવે અભિનેતા મુકેશ ખન્નાએ પણ 'જેન-ઝી' (Gen-Z) ના વિરોધ પ્રદર્શન પર ખુલીને પોતાની પ્રતિક્રિયા આપી છે.

મુકેશ ખન્નાએ CJP અને પ્રદર્શનમાં સામેલ લોકોની ભાષાની કડક શબ્દોમાં નિંદા કરી છે. તેમણે પોતાના સોશિયલ મીડિયા હેન્ડલ પર એક વીડિયો શેર કરીને જણાવ્યું કે તેઓ ભલે દેશની બહાર છે, પરંતુ સોશિયલ મીડિયાના માધ્યમથી દરેક ગતિવિધિ પર ઝીણવટભરી નજર રાખી રહ્યા છે.

વિદ્યાર્થીઓને ભવિષ્યને લઈને ચેતવણી

મુકેશ ખન્નાએ વિદ્યાર્થીઓને સમજાવતા કહ્યું કે આજે તમે જે બોલીને આવ્યા છો, તેની માઠી અસર તમારા ભવિષ્ય પર પડશે. આ લોકો તમારા નામે પોતાનો સ્વાર્થ સધી રહ્યા છે. આનાથી સાવધાન થઈ જાઓ, નહીં તો ભવિષ્યમાં નોકરી મેળવવામાં કે વીઝા મેળવવામાં મોટી મુશ્કેલીઓનો સામનો કરવો પડશે. કરિયર બરબાદ થાય તે પહેલાં આ લોકોથી દૂર થઈ જાઓ.

ગેરમાર્ગે દોરતા તત્વોને બહાર ફેંકી દો

તેમણે વીડિયોના કેપ્શનમાં ઉમેર્યું કે આ તત્વોને બહાર ફેંકી દો, તે પહેલાં કે બહુ મોડું થઈ જાય. જે યુવાનો કોઈના દોરવણીમાં આવીને વિરોધ પ્રદર્શનમાં મર્યાદા ચૂકી ગયા છે, તેમને ચેતવણી આપતા તેમણે કહ્યું કે તમારું સ્ટેટમેન્ટ રેકોર્ડ થઈ ચૂક્યું છે અને તેનો ભવિષ્યમાં ભારે નુકસાન ભોગવવું પડી શકે છે.

શું છે સમગ્ર મામલો?

દિલ્હીના જંતર-મંતર પર કોકરોચ જનતા પાર્ટી (CJP) એ વિદ્યાર્થીઓ સાથે મળીને વિરોધ પ્રદર્શન શરૂ કર્યું હતું, જેમાં શિક્ષણ મંત્રી ધર્મેન્દ્ર પ્રધાનના રાજીનામા સહિતની માંગણીઓ રજૂ કરવામાં આવી હતી. આ દરમિયાન 20 જૂનના રોજ સંસદ માર્ચ વખતે માહોલ તંગ બન્યો હતો અને પોલીસે કાર્યવાહી કરવી પડી હતી.