રામ મંદિર દાન ચોરી કેસ: 3 આરોપીઓને કોર્ટનો ઝટકો, જામીન અરજી ફગાવાઈ

Ayodhya Ram Mandir Donation Theft: અયોધ્યાના રામ મંદિરમાં ચઢાવાની ચોરીના મામલાની સુનાવણી દરમિયાન મંગળવારે કોર્ટે વધુ ત્રણ આરોપીઓની જામીન અરજી નાંજૂર કરી છે. આરોપીઓમાં અનૂપ મિશ્રા, લવકુશ અને કરુણેશ પાંડે સામેલ છે. આ પહેલા પણ ત્રણ અન્ય આરોપીઓની અરજીઓ ફગાવી દેવામાં આવી હતી, અને તેના જ આધારે કોર્ટે આ ત્રણેયની અરજીઓ પણ ફગાવી દીધી છે.

કુલ 8 આરોપીઓમાંથી 6ની અરજી ફગાવાઈ

આ સમગ્ર મામલામાં કુલ 8 આરોપીઓ સામેલ છે, જેમાંથી અત્યાર સુધીમાં 6 આરોપીઓની જામીન અરજી ફગાવાઈ ચૂકી છે. હવે માત્ર બે આરોપીઓ, સુભાષ ચંદ્ર શ્રીવાસ્તવ અને ટીનૂ યાદવ બચ્યા છે, જેમની જામીન અરજી પર બુધવારે સુનાવણી થવાનું નક્કી થયું છે. બીજી તરફ, બચાવ પક્ષના વરિષ્ઠ વકીલે જણાવ્યું કે, નીચલી અદાલતમાંથી અરજી ફગાવી દેવાયા બાદ હવે તેઓ હાઈકોર્ટમાં જામીન અરજી દાખલ કરવાની તૈયારી કરી રહ્યા છે.

ચાર્જશીટનો અભ્યાસ કરાશે

આ સાથે જ, તપાસ અધિકારી દ્વારા દાખલ કરવામાં આવનારી ચાર્જશીટનો અભ્યાસ કરવામાં આવશે કે, શું તેમાં કલમોમાં કોઈ ફેરફાર કરવામાં આવ્યો છે, જેના આધારે આગળની કાનૂની વ્યૂહરચના ઘડવામાં આવશે. બચાવ પક્ષે દલીલ કરી હતી કે, ભ્રષ્ટાચાર સંબંધિત જોગવાઈઓ અને સરકારી કર્મચારી દ્વારા વિશ્વાસઘાત સંબંધિત કલમો આ કેસમાં લાગુ પડતી નથી, કારણ કે આરોપીઓ સરકારી કર્મચારી નથી. તેમણે તર્ક આપ્યો હતો કે, જો આ બે જોગવાઈઓને હટાવી દેવામાં આવે તો બાકીના ગુનાઓ માટે મહત્તમ સાત વર્ષની જેલની સજાની જોગવાઈ છે, અને કોઈ વિશેષ પરિસ્થિતિ ન હોય તો આરોપીઓને જામીન આપી શકાય છે.

બિનઅધિકૃત રીતે પૈસા કાઢવા કે છુપાવવાના 105 કિસ્સા

આ પહેલા આ કેસમાં સ્પેશિયલ ઇન્વેસ્ટિગેશન ટીમ (SIT) એ સોમવારે સુપ્રીમ કોર્ટને જણાવ્યું હતું કે, તેને મંદિરના કાઉન્ટિંગ રૂમમાંથી પરવાનગી વગર પૈસા કાઢવા અથવા છુપાવવાના 105 કિસ્સા મળી આવ્યા છે. SIT એ આઠ આરોપીઓની ઓળખ કરી હતી, અને જાણવા મળ્યું હતું કે, કેટલાક કેસોમાં કાઉન્ટિંગ પ્રોસેસમાં સામેલ અન્ય લોકોની પણ મદદ લેવામાં આવી હતી.

જંગમ અને સ્થાવર મિલકતોની ઓળખ કરી

ટીમે દરેક આરોપી દ્વારા કથિત રીતે હડપ કરવામાં આવેલી રકમનો અંદાજ પણ લગાવ્યો હતો. SIT ના સ્ટેટસ રિપોર્ટ અનુસાર, આઠેય આરોપીઓના બેંક ખાતામાં કોઈ સ્પષ્ટ કારણ વગર પૈસા જમા થયેલા જોવા મળ્યા હતા. ટીમે તે જંગમ અને સ્થાવર મિલકતોની ઓળખ કરી છે, જેમાં કથિત રીતે ચોરીના પૈસા રોકવામાં આવ્યા હતા અને અત્યાર સુધીની રિકવરીના પ્રયાસો અંગે માહિતી આપી હતી.