વિદ્યાર્થી આંદોલન બાદ રાહુલ ગાંધીનો વીડિયો સંદેશ: ધર્મેન્દ્ર પ્રધાનના રાજીનામાની માંગ, શિક્ષણ વ્યવસ્થા પર ઉઠાવ્યા સવાલ

Rahul Gandhi Video Message : વિદ્યાર્થી આંદોલન, વિરોધ પ્રદર્શન અને અટકાયત બાદ લોકસભામાં વિપક્ષના નેતા રાહુલ ગાંધીએ પ્રથમ વખત વીડિયો સંદેશ જાહેર કરીને કેન્દ્ર સરકાર પર આકરા પ્રહારો કર્યા છે. તેમણે કેન્દ્રીય શિક્ષણમંત્રી ધર્મેન્દ્ર પ્રધાનના રાજીનામાની માંગ કરી, અને દેશની શિક્ષણ વ્યવસ્થા અંગે ગંભીર ચિંતા વ્યક્ત કરી. રાહુલ ગાંધીએ પોતાના સંદેશમાં કહ્યું કે, ભારતની શિક્ષણ વ્યવસ્થા સતત કમજોર બની રહી છે, અને તેને તાત્કાલિક સુધારવાની જરૂર છે. તેમણે ભારપૂર્વક જણાવ્યું કે, વિદ્યાર્થીઓના પ્રશ્નોને અવગણવાને બદલે સરકાર તેમની વાત સાંભળે અને યોગ્ય ઉકેલ લાવે.

વિદ્યાર્થીઓનો ઉઠાવીશું અવાજઃરાહુલ ગાંધી

તેમણે કહ્યું કે, વિદ્યાર્થી આંદોલન દરમિયાન વિદ્યાર્થીઓના મુદ્દાઓને દેશ સામે લાવવાનો પ્રયાસ કરવામાં આવ્યો હતો. આ મુદ્દે તેમણે લોકસભાના સ્પીકરને પણ અનુરોધ કર્યો હતો કે, વિદ્યાર્થીઓની ચિંતાઓ પર સંસદમાં ચર્ચા થવી જોઈએ. રાહુલ ગાંધીએ પોતાના વીડિયો સંદેશમાં વિદ્યાર્થીઓને સંબોધતા કહ્યું કે, તેઓ તેમના અધિકારો માટે અવાજ ઉઠાવતા રહે, અને લોકશાહી રીતે પોતાની વાત રજૂ કરે. સાથે જ વડાપ્રધાન નરેન્દ્ર મોદીને પણ સીધો સંદેશ આપતાં તેમણે દેશની શિક્ષણ વ્યવસ્થામાં જરૂરી સુધારા કરવા અને વિદ્યાર્થીઓના હિતમાં નિર્ણયો લેવા અપીલ કરી છે.

વિપક્ષ તરફથી શિક્ષણ સંબંધિત મુદ્દાઓને વધુ જોરશોરથી ઉઠાવવામાં આવી રહ્યા છે, ત્યારે રાહુલ ગાંધીના આ નિવેદનથી રાજકીય માહોલ વધુ ગરમાયો છે. હવે કેન્દ્ર સરકાર તરફથી આ મુદ્દે શું પ્રતિક્રિયા આવે છે તેના પર સૌની નજર છે.