મકાન જોવા ગયેલા દંપતી પર પિટબુલનો ઘાતક હુમલો, પતિએ કહ્યું- 'મારા આખા શરીર પર ટાંકા...'

Patiala Dog Attack : પટિયાલાના ઘુમ્મન નગર વિસ્તારમાં ભાડાનું મકાન જોવા ગયેલા એક દંપતી પર પાળેલા પિટબુલ શ્વાને જીવલેણ હુમલો કર્યો હતો. આ ભયાનક ઘટનામાં મહિલાની ગંભીર સર્જરી કરવી પડી છે અને પતિના શરીર પર અનેક ટાંકા આવ્યા છે. આ ઘટનાનો સીસીટીવી વીડિયો વાઇરલ થયા બાદ મેયરે આક્રમક શ્વાનો પર પ્રતિબંધ મૂકવાની જાહેરાત કરી છે.

ભયાનક આપવીતી

પીડિત અંકિત સભરવાલે જણાવ્યું હતું કે તેઓ પ્રોપર્ટી ડીલરના કહેવાથી સાંજના સમયે નવું ઘર જોવા ગયા હતા. જેવો મુખ્ય દરવાજો ખોલવામાં આવ્યો કે તરત જ અંદર રહેલા પિટબુલ શ્વાને કોઈ પણ પ્રકારની ચેતવણી વિના સીધો હુમલો કરી દીધો હતો. શ્વાને સૌથી પહેલા તેની પત્ની શેફાલીને નિશાન બનાવી હતી. જેના કારણે તેના બંને હાથ અને જાંઘ પર ગંભીર ઈજાઓ થતાં તેની તાત્કાલિક મેજર સર્જરી કરાવવી પડી હતી.

જીવ બચાવવા સંઘર્ષ

અંકિતે પોતાની પત્નીને બચાવવા માટે શ્વાનનો સામનો કર્યો હતો. જેના કારણે તેના પગ, પીઠ અને સમગ્ર શરીર પર ઊંડા ઘા પડ્યા છે અનેક જગ્યાએ ટાંકા આવ્યા છે. આસપાસના લોકો લાઠીઓ લઈને દોડી આવ્યા ન હોત તો પરિસ્થિતિ વધુ ગંભીર હોત. ઘટનાનો સીસીટીવી વીડિયો સોશિયલ મીડિયા પર ખૂબ જ વાઇરલ થઈ રહ્યો છે. જેમાં સ્થાનિક લોકો ભારે જહેમત બાદ દંપતીને છોડાવતા નજરે પડે છે.

પ્રશાસનનો મોટો નિર્ણય

આ ગંભીર ઘટના બાદ સ્થાનિક રહેવાસીઓમાં ભારે રોષ જોવા મળી રહ્યો છે. મામલાની ગંભીરતાને ધ્યાનમાં રાખીને પટિયાલાના પ્રમુખ કુન્દન ગોગિયાએ જણાવ્યું છે કે શહેરમાં પિટબુલ જેવી ખતરનાક અને આક્રમક નસ્લના શ્વાનોને પાળવા પર સંપૂર્ણ પ્રતિબંધ મૂકવામાં આવશે. નગર નિગમની આગામી હાઉસ મીટિંગમાં આ અંગેનો વિશેષ પ્રસ્તાવ લાવવામાં આવશે. હાલ પોલીસે પીડિતના નિવેદનના આધારે ગુનો નોંધીને બેદરકાર માલિક સામે કડક કાર્યવાહી શરૂ કરી છે.