'આગામી વર્ષથી NEETની પરીક્ષા કોમ્પ્યુટર બેઝ્ડ યોજાશે..', કેન્દ્રીય શિક્ષણ મંત્રીની મોટી જાહેરાત
Summarized by AI; it may make mistakes. Check important info
Summarized by AI; it may make mistakes. Check important info
NEET Exam News : NEET 2026ની પરીક્ષાનું પણ પેપર ફૂટી ગયા બાદ હવે નીટની નવી પરીક્ષાની તારીખ જાહેર થઈ ગઈ છે. ત્યારે આ મામલે ખુદ શિક્ષણ મંત્રી ધર્મેન્દ્ર પ્રધાને પ્રેસ કોન્ફરન્સ યોજીને એક મોટું એલાન કર્યું છે. તેમણે કહ્યું કે હવેથી આગામી વર્ષથી NEETની પરીક્ષા ઓનલાઇન એટલે કે કોમ્પ્યુટર બેઝ્ડ યોજાશે. OMR શીટનો વિકલ્પ હવે હટી જશે. દરેક વિદ્યાર્થીઓએ કોમ્પ્યુટર પર પરીક્ષા આપવાની રહેશે.
દોષિતોને પાતાળમાંથી પણ શોધી કાઢીશું: શિક્ષણ મંત્રી
શિક્ષણ મંત્રી ધર્મેન્દ્ર પ્રધાને મીડિયા સમક્ષ કડક શબ્દોમાં જણાવ્યું કે, જે પણ લોકો આ પેપર લીક કાંડમાં સામેલ છે તેમને છોડવામાં આવશે નહીં, તેમને 'પાતાળમાંથી પણ શોધી કાઢવામાં આવશે'. તેમણે સ્પષ્ટ કર્યું કે સરકારની લડાઈ પરીક્ષા માફિયાઓ સામે છે. સોશિયલ મીડિયા પર ફેલાતી અફવાઓથી બચવા તેમણે અપીલ કરી હતી અને જણાવ્યું હતું કે આ મામલે CBI તપાસ સોંપવામાં આવી છે જે આ કૌભાંડના મૂળ સુધી જશે.
21 જૂને લેવાશે નવી પરીક્ષા, 14 જૂને એડમિટ કાર્ડ
NTA દ્વારા સોશિયલ મીડિયા પર નવી તારીખોની જાહેરાત કરવામાં આવી છે. હવે NEET 2026ની નવી પરીક્ષા 21 જૂનના રોજ યોજાશે. આ પરીક્ષા માટેના એડમિટ કાર્ડ 14 જૂન સુધીમાં જારી કરી દેવામાં આવશે. આ વખતે વિદ્યાર્થીઓને પેપર લખવા માટે 15 મિનિટનો વધારાનો સમય પણ આપવામાં આવશે. વિદ્યાર્થીઓ પર આર્થિક બોજ ન પડે તેની જવાબદારી પણ સરકાર લેશે અને વિદ્યાર્થીઓને તેમની પસંદગીના શહેરમાં પરીક્ષા કેન્દ્ર પસંદ કરવા માટે એક અઠવાડિયાનો સમય અપાશે.
આગામી વર્ષથી પરીક્ષા ઓનલાઇન લેવાનો મોટો નિર્ણય
શિક્ષણ મંત્રીએ એક ઐતિહાસિક નિર્ણયની જાહેરાત કરતાં જણાવ્યું કે, પેપર લીક જેવી ઘટનાઓ પર કાયમી લગામ લગાવવા માટે આગામી વર્ષથી NEET UGની પરીક્ષા ઓનલાઇન (Computer Based) આયોજિત કરવામાં આવશે. ઓનલાઇન મોડને કારણે સુરક્ષા વધુ મજબૂત બનશે અને ગેરરીતિની શક્યતાઓ નહીંવત થઈ જશે.
ભારે હૈયે લીધો પરીક્ષા રદ કરવાનો નિર્ણય
ધર્મેન્દ્ર પ્રધાને સ્વીકાર્યું કે પરીક્ષા રદ કરવાનો નિર્ણય ખૂબ જ દુઃખદાયક હતો, પરંતુ લાખો મહેનતુ વિદ્યાર્થીઓના હિત અને ન્યાય માટે આ જરૂરી હતું. તપાસમાં બહાર આવ્યું હતું કે 12 મે સુધીમાં 'ગેસ પેપર'ના નામે અસલી પ્રશ્નપત્રના સવાલો બહાર આવી ગયા હતા. NTAમાં 'ઝીરો એરર' સિસ્ટમ લાગુ કરવી એ સરકારની પ્રાથમિકતા છે તેમ તેમણે ઉમેર્યું હતું.
