- કૂદકે અને ભૂસકે વધતા ભાવ છતાં લોકો બેફિકર : સીએનજીમાં રૂ. બેનો વધારો
- પેટ્રોલ-ડીઝલમાં મે 2022 પછી પહેલો અને સૌથી મોટો રૂ. ત્રણનો ભાવવધારો : ક્રૂડ ઓઈલના ભાવ અઢી મહિનામાં બમણા થઈ ગયા
- સરકારી ઓઈલ કંપનીઓને હજુ પેટ્રોલ પર રૂ. 11 અને ડીઝલ પર રૂ. 39નું નુકસાન
- પાંચ રાજ્યોની ચૂંટણી પછી પેટ્રોલ અને ડીઝલમાં રૂ. 3, સીએનજીમાં રૂ. 2નો વધારો થયો
નવી દિલ્હી: દેશમાં પાંચ રાજ્યોની વિધાનસભા ચૂંટણી પૂરી થયા પછી ૧૨ દિવસે અંતે શુક્રવારે પેટ્રોલ, ડીઝલ અને સીએનજીમાં ભાવ વધારો કરાતા સામાન્ય જનતાને મોટો ફટકો પડયો છે. મધ્ય-પૂર્વમાં અમેરિકા, ઈઝરાયેલ અને ઈરાન યુદ્ધના કારણે ક્રૂડના ભાવ બમણા થવાના પગલે સરકારી ઓઈલ કંપનીઓને દૈનિક ધોરણે થઈ રહેલું રૂ. ૧૭૦૦ કરોડનું નુકસાન ભરપાઈ કરવા ઓઈલ કંપનીઓએ ચાર વર્ષ કરતાં વધુ સમય પછી પેટ્રોલ અને ડીઝલના ભાવમાં રૂ. ૩નો વધારો કર્યો છે. બીજીબાજુ દિલ્હી અને મુંબઈ જેવા શહેરોમાં સીએનજીના ભાવમાં પણ પ્રતિ કિલો રૂ. ૨નો વધારો કરાયો છે. કેટલાક દિવસોથી પેટ્રોલ-ડીઝલમાં ભાવવધારાની આશંકા વ્યક્ત થઈ રહી હતી.
અમેરિકા, ઈઝરાયેલ અને ઈરાન યુદ્ધના કારણે અઢી મહિનાથી દુનિયાભરમાં પેટ્રોલ-ડીઝલના ભાવ વધી રહ્યા છે ત્યારે ભારતમાં પેટ્રોલ અને ડીઝલના ભાવ સ્થિર રહ્યા હતા. જોકે, વૈશ્વિક સ્તરે ક્રૂડ ઓઈલના ભાવ પ્રતિ બેરલ ૧૧૦ ડોલરની આસપાસ રહેતા સરકારી ઓઈ કંપનીઓને જંગી નુકસાન થઈ રહ્યું હતું.
ભાવ સ્થિર રાખવા માટે એક્સાઈઝમાં રૂ. ૧૦નો ઘટાડો કરાયો હતો
સૂત્રો મુજબ ઓઈલ કંપનીઓને માસિક રૂ. ૩૦,૦૦૦ કરોડનું નુકસાન થઈ રહ્યું હતું. કંપનીઓ પેટ્રોલ પર પ્રતિ લિટર રૂ. ૨૬ અને ડીઝલ પર અંદાજે ૮૨નું નુકસાન વહન કરી રહી હતી. વધુમાં સરકારે પેટ્રોલ અને ડીઝલના ભાવ સ્થિર રાખવા માટે એક્સાઈઝમાં પ્રતિ લીટર રૂ. ૧૦નો ઘટાડો કર્યો હતો. પરંતુ અંતે સરકારી ઓઈલ કંપનીઓએ શુક્રવારે પેટ્રોલ અને ડીઝલમાં પ્રતિ લીટર રૂ. ૩નો વધારો જાહેર કર્યો હતો.
ત્રણ મેટ્રો મુંબઈ, કોલકાતા, ચેન્નઈમાં પેટ્રોલનો ભાવ રૂ. ૧૦૦ને પાર
આ સાથે દિલ્હીમાં પેટ્રોલનો ભાવ પ્રતિ લીટર રૂ. ૯૪.૭૭થી વધીને રૂ. ૯૭.૭૭ જ્યારે ડીઝલનો ભાવ પ્રતિ લીટર રૂ. ૮૭.૬૭થી વધીને રૂ. ૯૦.૬૭ થયો હતો. મુંબઈમાં પેટ્રોલનો ભાવ વધીને રૂ. ૧૦૬.૬૮ જ્યારે ડીઝલની કિંમત રૂ. ૯૩.૧૪ થઈ ગઈ છે.
દિલ્હીમાં સીએનજીનો ભાવ પ્રતિ કિલો રૂ. ૭૯.૦૯, મુંબઈમાં રૂ. ૮૪
વિવિધ ટેક્સ અને રાજ્ય સરકારોના વેટના પગલે દેશભરમાં પેટ્રોલ અને ડીઝલના ભાવ અલગ અલગ છે. આ સાથે સીએનજીના ભાવમાં પણ વધારો કરાયો છે. દિલ્હીમાં સીએનજીનો ભાવ પ્રતિ કિલો રૂ. ૭૯.૦૯ અને મુંબઈમાં રૂ. ૮૪ થયો છે. જોકે, પાઈપ નેચરલ ગેસ અને ઘરેલુ રાંધણ ગેસ એલપીજીના ભાવમાં કોઈ વધારો કરાયો નથી.
યુદ્ધના અઢી મહિનામાં દુનિયામાં ભાવ વધ્યા પરંતુ ભારતમાં સ્થિર રહ્યા
અમેરિકા અને ઈઝરાયેલે ૨૮ ડિસેમ્બરે ઈરાન પર આક્રમણ કરતા ફાટી નીકળે યુદ્ધ અને તહેરાનના ત્વરિત જવાબ તથા હોર્મુઝની નાકાબંધીના કારણે વૈશ્વિક સ્તરે ક્રૂડ ઓઈલનો ભાવ ૫૦ ટકાથી વધુ વધી ગયો છે. ક્રૂડ ઓઈલના ભાવ વધારાના પગલે દુનિયાભરના દેશોએ પેટ્રોલ અને ડીઝલના ભાવમાં વધારો કરવાની ફરજ પડી હતી. આમ છતાં ભારતમાં પેટ્રોલ અને ડીઝલના ભાવ સ્થિર રહ્યા હતા. જોકે, આ સ્થિરતાને વિપક્ષે દેશમાં રાજ્ય રાજ્યોની વિધાનસભા ચૂંટણી સાથે જોડી હતી અને દાવો કરાયો હતો કે ચૂંટણી પૂરી થયા પછી તુરંત પેટ્રોલ અને ડીઝલમાં ભાવ વધારો આવશે.
લોકસભા ચૂંટણી પહેલાં ૨૦૨૪માં પેટ્રોલ-ડીઝલના ભાવ ઘટયા હતા
સરકારી ઓઈલ કંપનીઓએ શુક્રવારે કરેલો ભાવ વધારો મે ૨૦૨૨ પછી પહેલો અને સૌથી મોટો ભાવવધારો હતો. કેન્દ્ર સરકારે એપ્રિલ ૨૦૨૨માં પેટ્રોલ અને ડીઝલના ભાવ ફ્રીઝ કરી દીધા હતા અને લોકસભા ચૂંટણી પહેલાં માર્ચ ૨૦૨૪માં પેટ્રોલ અને ડીઝલના ભાવમાં પ્રતિ લીટર રૂ. ૨નો ઘટાડો કરાયો હતો. ઓઈલ ઈન્ડસ્ટ્રીના સૂત્રો મુજબ ક્રુડ ઓઈલમાં થયેલા ભાવવધારાની સરખામણીમાં પેટ્રોલ અને ડીઝલના ભાવમાં એકંદરે ઓછો વધારો કરાયો છે. આ વધારા છતાં ઓઈલ કંપનીઓને હજુ પેટ્રોલ પર પ્રતિ લીટર રૂ. ૧૧ અને ડીઝલ પર પ્રતિ લીટર રૂ. ૩૯નું નુકસાન થઈ રહ્યું છે.
નાયરા એનર્જીએ માર્ચમાં, શેલે એપ્રિલમાં વધારો કર્યો હતો
બીજીબાજુ ખાનગી ફ્યુઅલ રીટેલ કંપનીઓએ આ પહેલાં જ ભાવ વધારો કર્યો હતો. દેશની સૌથી મોટી ખાનગી ફ્યુલ રીટેલ કંપની નાયરા એનર્જીએ માર્ચમાં પેટ્રોલમાં પ્રતિ લીટર રૂ. ૫ અને ડીઝલમાં રૂ. ૩ જ્યારે શેલે ૧ એપ્રિલથી પેટ્રોલમાં રૂ. ૭.૪૧ અને ડીઝલમાં રૂ. ૨૫નો ભાવ વધારો કર્યો હતો. બેંગ્લુરુમાં શેલનો ભાવ પેટ્રોલમાં પ્રતિ લીટર રૂ. ૧૧૯.૮૫ અને ડીઝલમાં રૂ. ૧૨૩.૫૨ છે.
