PM મોદીના વીડિયો મામલે ‘મેટા’ પર થશે મોટી કાર્યવાહી ! સંસદીય સમિતીએ કહ્યું, ‘માત્ર માફીથી કામ નહીં ચાલે’
Summarized by AI; it may make mistakes. Check important info
Summarized by AI; it may make mistakes. Check important info
PM Modi Video Meta : આજના ડિજિટલ યુગમાં આપણી જિંદગીનો એક મોટો હિસ્સો સોશિયલ મીડિયા પર વીતી રહ્યો છે, પરંતુ હવે આ પ્લેટફોર્મ્સ પર નિયમોની અવગણના સાંખી લેવામાં નહીં આવે. સંચાર અને માહિતી પ્રૌદ્યોગિકી સંબંધી સંસદીય સ્થાયી સમિતિની તાજેતરની બેઠકમાં આ વાત સ્પષ્ટ કરવામાં આવી છે. BJP સાંસદ નિશિકાંત દુબેની અધ્યક્ષતામાં યોજાયેલી આ મહત્વની બેઠકમાં સોશિયલ મીડિયા અને ડિજિટલ પ્લેટફોર્મ્સના રેગ્યુલેશન અંગે ગંભીર ચર્ચા થઈ હતી. આ બેઠકમાં ઈલેક્ટ્રોનિક્સ અને આઈટી મંત્રાલય (MeitY) તેમજ ગૃહ મંત્રાલયના ઉચ્ચ અધિકારીઓ અને દિગ્ગજ ટેક કંપનીના પ્રતિનિધિઓ હાજર રહ્યા હતા. આ બેઠકનો સૌથી મોટો મુદ્દો મેટા દ્વારા વડાપ્રધાન નરેન્દ્ર મોદીનો એક વીડિયો હટાવી દેવાનો હતો, જેના પર સમિતિએ ખૂબ જ આકરૂં વલણ અપનાવ્યું છે.
સમન્સ બાદ ટેક કંપનીઓના પ્રતિનિધિઓ હાજર
આ હાઈ-પ્રોફાઈલ બેઠકમાં સ્નેપચેટ, ગૂગલ, એક્સ, મેટા (ફેસબુક, વોટ્સએપ, ઈન્સ્ટાગ્રામ) અને યુટ્યુબ જેવી વિશ્વની સૌથી મોટી ડિજિટલ કંપનીઓના પ્રતિનિધિઓને બોલાવવામાં આવ્યા હતા. બેઠકમાં આઈટી મંત્રાલય અને ગૃહ મંત્રાલયના ટોચના અધિકારીઓની હાજરી એ વાતનો સ્પષ્ટ સંકેત આપે છે કે સરકાર ડિજિટલ સુરક્ષાને લઈને અત્યંત ગંભીર છે.
PM મોદીનો વીડિયો હટાવવો સંવેદનશીલ મામલો
સંસદીય સભ્યોએ મેટાના પ્લેટફોર્મ પરથી વડાપ્રધાન નરેન્દ્ર મોદીનો વીડિયો હટાવવાનો મુદ્દો પ્રમુખતાથી ઉઠાવ્યો હતો. આ ઘટનાને માત્ર એક સામાન્ય ટેકનિકલ ભૂલ ગણી શકાય નહીં, તેથી સાંસદોએ મેટાના ઉચ્ચ અધિકારીઓ સામે સીધા અને તીખા સવાલો કર્યા હતા. બીજી તરફ, મેટાના અધિકારીઓએ સમિતિ સમક્ષ પોતાનો પક્ષ રજૂ કરતા જણાવ્યું હતું કે PMનો વીડિયો ભૂલથી હટી ગયો હતો અને તેમણે આ માટે સત્તાવાર રીતે માફી પણ માંગી હતી. જોકે, સમિતિના સભ્યોએ એકસૂરે સ્પષ્ટ કરી દીધું હતું કે આટલા સંવેદનશીલ મામલામાં માત્ર 'સોરી' કહી દેવાથી વાત નહીં બને.
કડક કાનૂની કાર્યવાહીના આદેશ
મોટી ડિજિટલ કંપનીઓને તેમની ભૂલો માટે પૂરેપૂરી જવાબદાર કેવી રીતે ઠેરવવી તે અંગે સભ્યો વચ્ચે વિગતવાર ચર્ચા થઈ હતી. અનેક સાંસદોએ કડક શબ્દોમાં કહ્યું કે આ મામલો માત્ર એક ભૂલ કે માફી સુધી સીમિત નથી, પરંતુ સિસ્ટમમાં જવાબદેહી નક્કી કરવાનો છે. સાંસદોનો તર્ક હતો કે જ્યારે દેશના વડાપ્રધાન સાથે જોડાયેલી સામગ્રી સાથે આવી બેદરકારી થઈ શકતી હોય, તો સામાન્ય યુઝર્સના કન્ટેન્ટની સુરક્ષાની ગેરંટી કોણ લેશે? આ બાબતને ધ્યાનમાં રાખીને સમિતિએ સ્પષ્ટ નિર્દેશ આપ્યો છે કે કંપનીએ આ સમગ્ર ઘટના માટે જવાબદાર વ્યક્તિની તાત્કાલિક ઓળખ કરવી જોઈએ અને તેની સામે કડક કાનૂની કાર્યવાહી કરવી જોઈએ.
