રેમ્પ વૉક બાદ લેપટોપ અને કોડિંગ: મિસ યુનિવર્સ ઇન્ડિયા ફિનાલે પછી ગૂગલ ક્લાઉડ એન્જિનિયર બની ઓફિસ પહોંચી

Beauty Queen Resumes Google Job: મોટાભાગના સ્પર્ધકો માટે મિસ યુનિવર્સ ઇન્ડિયા જેવા મોટા મંચ પર પહોંચવું એ ગ્લેમર અને મોડેલિંગ ક્ષેત્રે નવી કારકિર્દીની શરૂઆત સમાન હોય છે. જોકે, મિસ યુનિવર્સ ઇન્ડિયા 2026ની ફાઇનલિસ્ટ ઉમંગા કુમાવત માટે આ સફર બાદ ફરીથી પોતાના લેપટોપ, કોર્પોરેટ મીટિંગ્સ અને દૈનિક ઓફિસ રૂટિન તરફ પાછા ફરવાની ક્ષણ રહી છે. જયપુર ખાતે યોજાયેલી નેશનલ ફિનાલેમાં ભાગ લીધાના ગણતરીના દિવસોમાં જ ઉમંગા ગૂગલની બેંગલુરુ ઓફિસમાં ક્લાઉડ એન્જિનિયર તરીકે પોતાના ટેબલ પર કામ કરતી જોવા મળી છે.

આ બ્યુટી પેજન્ટમાં ઉમંગાએ મધ્યપ્રદેશનું પ્રતિનિધિત્વ કર્યું હતું અને દેશભરમાંથી આવેલી 52 ફાઇનલિસ્ટ્સમાંથી ટોપ-20માં સ્થાન મેળવ્યું હતું. ઉલ્લેખનીય છે કે 23 ઓગસ્ટના રોજ યોજાયેલી ફિનાલેમાં કેરળની કાઝિયા લિઝ મેજિયા એ મિસ યુનિવર્સ ઇન્ડિયા 2026નો ખિતાબ જીત્યો હતો.

બેંગલુરુ કેમ્પસમાંથી શેર કર્યો 1 મિનિટનો વ્લોગ

14 સપ્ટેમ્બરના રોજ ઉમંગાએ સોશિયલ મીડિયા પર તેના ફોલોઅર્સ માટે એક મિનિટનો "Day In My Life" વીડિયો શેર કર્યો હતો, જેમાં તેણે સૌંદર્ય સ્પર્ધા બાદ એક સામાન્ય ગૂગલ કર્મચારી તરીકેનો પોતાનો આખો દિવસ દર્શાવ્યો છે:

દિવસની શરૂઆત: સવારે 9:30 વાગ્યે દિવસની શરૂઆત થાય છે, જ્યાં સામાન્ય લોકોની જેમ કપડાંની પસંદગી તેની પ્રથમ મૂંઝવણ હોય છે. વીડિયોમાં તે બ્લેક ટોપ અને બ્રાઇટ રેડ ટ્રાઉઝર પહેરીને લેપટોપ સ્લીવ, બેગ અને ઇયરબડ્સ સાથે ઓફિસ જવા નીકળે છે.

વેલનેસ સેન્ટર અને વર્કઆઉટ: ઓફિસ પહોંચ્યા બાદ તે ગૂગલના વેલનેસ સેન્ટરમાં જઈ ટ્રેડમિલ, સ્ટ્રેચિંગ અને લેગ એક્સરસાઇઝ સાથે ફિટનેસ સેશન પૂરું કરે છે.

ડેસ્ક પર કામ: વર્કઆઉટ બાદ તે સંપૂર્ણ પ્રોફેશનલ મોડમાં આવી જાય છે અને લેપટોપ, નોટબુક અને ઓફિસ ડોક્યુમેન્ટ્સ સાથે પોતાની કામગીરી શરૂ કરે છે.

લંચ બ્રેક: ગૂગલ કેફેટેરિયામાં બિરયાની, ફળો અને મીઠાઈઓ જેવા વિકલ્પો હોવા છતાં, ઉમંગાએ હેલ્ધી ડાયેટ જાળવી રાખતાં નૂડલ સૂપ અને ગ્રીન્સનો હળવો ખોરાક પસંદ કર્યો હતો.

સાંજનો સમય અને દિવસનો અંત: બપોરે 3 વાગ્યે ડેસ્ક પર પરત ફર્યા બાદ 4:30 વાગ્યે તે શાંત વાતાવરણવાળા કેમ્પસ લાઉન્જમાં જઈ કામ કરે છે. ત્યારબાદ 5:30 વાગ્યે કિઓસ્ક પરથી હોટ કોફી માણીને લિફ્ટ તરફ આગળ વધતાં તેનો ઓફિસ વર્ક-ડે પૂર્ણ થાય છે.

સામાન્ય રીતે આવી સ્પર્ધાઓ બાદ મોટાભાગની પ્રતિસ્પર્ધીઓ એક્ટિંગ કે ફેશન તરફ વળતી હોય છે, ત્યારે ઉમંગા પોતાની ટેક કારકિર્દી અને ગ્લેમર પેશન વચ્ચે સંતુલન જાળવીને યુવાનો માટે એક નવો દાખલો બેસાડી રહી છે.