Khan Sir Surrenders at Patna Civil Court : બિહારની રાજધાની પટણામાં આવેલી પ્રખ્યાત કોચિંગ ઇન્સ્ટિટ્યૂટ 'ખાન ગ્લોબલ સ્ટડીઝ'(Khan Global Studies)માં થયેલી તોડફોડ અને કથિત ફાયરિંગના મામલે હવે કાનૂની ગરમાવો આવી ગયો છે. આ કેસમાં પટણા પોલીસ દ્વારા એફઆઇઆર (FIR) નોંધાયા બાદ, દેશભરમાં જાણીતા શિક્ષક ફૈઝલ ખાને(ખાન સર) કાનૂની રસ્તો અપનાવ્યો છે. તેઓ શનિવારે બપોરે પોતાના વકીલો સાથે આત્મસમર્પણ (સરેન્ડર) કરવા માટે પટણાની સિવિલ કોર્ટમાં પહોંચ્યા છે.
કોર્ટમાં મીડિયા પર પ્રતિબંધ, અંદરથી આવ્યા મોટા સમાચાર
કોર્ટ પરિસરમાં મીડિયાના પ્રવેશ પર પ્રતિબંધ હોવાને કારણે ખાન સરને અંદર જતાં કોઈ જોઈ શક્યું નહોતું. પરંતુ કોર્ટના અંદરના સૂત્રો પાસેથી મળતી માહિતી અનુસાર, ખાન સર સિવિલ કોર્ટમાં જજ અનુરાગ વર્માની અદાલતમાં વકીલો મારફતે આગોતરા જામીન (Anticipatory Bail) માટેની અરજી દાખલ કરી શકે છે. ધરપકડની લટકતી તલવાર વચ્ચે આ મોટું કાનૂની પગલું ભરવામાં આવ્યું છે.
શું હતો સમગ્ર વિવાદ?
આ સમગ્ર વિવાદની શરૂઆત મંગળવારે (2 જૂન) રાત્રે થઈ હતી, જ્યારે 15થી 20 અજ્ઞાત લોકોના એક જૂથે પટણા સ્થિત ખાન સરની કોચિંગ ઇન્સ્ટિટ્યૂટના કેમ્પસ પર હુમલો કરીને ભારે તોડફોડ અને પથરાવ કર્યો હતો. આ ઘટના બાદ સોશિયલ મીડિયા પર એક વીડિયો વાયરલ થયો હતો, જેમાં કોચિંગના બે સિક્યોરિટી ગાર્ડ કથિત રીતે હવામાં ફાયરિંગ કરતાં જોવા મળ્યા હતા. આ મામલે કાર્યવાહી કરીને પટણા પોલીસે ગુરુવારે જ બંને ગાર્ડની અટકાયત કરી લીધી હતી.
એસએસપીએ કરી હતી FIRની પુષ્ટિ
પટણાના સિનિયર સુપ્રિટેન્ડન્ટ ઑફ પોલીસ (SSP) કાર્તિકેય શર્માએ શુક્રવારે સત્તાવાર રીતે પુષ્ટિ કરી હતી કે કોચિંગમાં થયેલા હંગામા અને ફાયરિંગના કેસમાં શિક્ષક ફૈઝલ ખાન(ખાન સર)ને નામજોગ આરોપી બનાવીને એફઆઇઆર નોંધવામાં આવી છે. એસએસપીએ એમ પણ જણાવ્યું હતું કે આ કેસમાં પોલીસ ટૂંક સમયમાં ખાન સરની પૂછપરછ કરશે, જો કે કઈ કઈ કલમો લગાવવામાં આવી છે તેનો ખુલાસો કરાયો નહોતો.
કોચિંગ ઇન્ડસ્ટ્રીમાં આંતરિક યુદ્ધ તેજ
આ ઘટના બાદ પટણાના કોચિંગ જગતમાં ભારે ખેંચતાણ શરૂ થઈ ગઈ છે. ખાન સરે શરૂઆતમાં એવો આક્ષેપ કર્યો હતો કે તેમના ઇન્સ્ટિટ્યૂટ પર થયેલા હુમલા અને ફાયરિંગ પાછળ હરીફ કોચિંગ સંસ્થાઓનો હાથ છે. બીજી તરફ, પ્રતિસ્પર્ધી કોચિંગ સંસ્થાઓના સભ્યોએ ગુરુવારે એક પ્રેસ કોન્ફરન્સ યોજીને વળતો દાવો કર્યો હતો કે ખાન સરે પોતે જ પબ્લિસિટી મેળવવા અથવા અન્ય કોઈ કારણોસર આ આખી ઘટનાની સ્ક્રિપ્ટ રચી હતી અને તેને પ્રાયોજિત (Sponsored) કરાવી હતી. હાલમાં ખાન સર કોર્ટના શરણે પહોંચતા પટણા પોલીસ અને કાનૂની લોબીની નજર આ કેસ પર ટકેલી છે.
