CJPના દેખાવોનો સ્થાનિકોએ વિરોધ કરતાં જાવેદ અખ્તર ભડક્યા, સોશિયલ મીડિયા યુઝર્સ ચર્ચાના ચકડોળે ચઢ્યા

Shivaji Park CJP Protest: મુંબઈના શિવાજી પાર્કમાં કોકરોચ જનતા પાર્ટી (CJP)ના સૂચિત પ્રદર્શનને લઈને વિવાદ વધતો દેખાઈ રહ્યો છે. એક તરફ સ્થાનિક લોકો ઘોંઘાટ, ટ્રાફિક અને વિસ્તારની શાંતિ પ્રભાવિત થવાની આશંકા વ્યક્ત કરતા પ્રદર્શનનો વિરોધ કરી રહ્યા છે, તો બીજી તરફ હવે આ મામલે સિનિયર રાઈટર જાવેદ અખ્તરની સોશિયલ મીડિયા પોસ્ટ પર પણ ચર્ચા શરૂ થઈ ગઈ છે.

જાવેદ અખ્તરે X પર લખ્યું કે-

તેમને ખુશી છે કે શિવાજી પાર્કના કેટલાક નિવાસીઓ ઘોંઘાટને લઈને સંવેદનશીલ થઈ રહ્યા છે અને અધિકારીઓ પાસે CJPનું પ્રદર્શન રદ કરવાની માંગ કરી રહ્યા છે. તેની સાથે જ તેમણે લખ્યું કે તેમને આશા છે કે આ જ લોકો મહારાષ્ટ્રની કોઈપણ રાજકીય પાર્ટીના શિવાજી પાર્કમાં થનારા જલસા વખતે પણ આ જ રીતે અને એટલી જ મજબૂતીથી વાંધો નોંધાવશે.

શિવાજી પાર્કના સ્થાનિકો દ્વારા પ્રદર્શનનો વિરોધ

શિવાજી પાર્કની આસપાસ રહેતા લોકોએ પણ પ્રદર્શનનો વિરોધ કર્યો છે. સ્થાનિક લોકોનું કહેવું છે કે મોટા જમાવડાથી વિસ્તારની શાંતિ, ટ્રાફિક અને રોજિંદી જિંદગી પ્રભાવિત થાય છે. નિવાસીઓએ અધિકારીઓને આવેદનપત્ર આપીને પ્રદર્શનને રોકવા માટે કાર્યવાહીની માંગ કરી છે.

સોશિયલ મીડિયા પર એક યુઝરે જાવેદ અખ્તર પર કટાક્ષ કર્યો

જાવેદની પોસ્ટ પર એક યુઝરે જવાબ આપતા તેમની જૂની પોસ્ટનો ઉલ્લેખ કર્યો. યુઝરે કટાક્ષ કરતા કહ્યું કે જો જાવેદે બહાદુર પાયલટ માટે મહાવીર ચક્રની માંગવાળી પોસ્ટ પહેલા ન કરી હોત, તો તેમને આ પોસ્ટ પછી મળનારી આલોચનાને લઈને ડર લાગતો. સાથે જ તેમણે લખ્યું કે જાવેદ 'બેલેન્સિંગ ગેમ' રમતા જાણે છે અને તેમની પાસેથી ઘણું શીખવાની જરૂર છે.

જાવેદ અખ્તરે યુઝર્સની આપત્તિજનક ટિપ્પણીઓ પર કટાક્ષભર્યા જવાબ આપ્યા

જેના પર જાવેદ અખ્તરે જવાબ આપ્યો- ડિયર શાહિદ ખાલિદ, તમારે નિશ્ચિત રૂપે ઘણું શીખવાની જરૂર છે. મારી શુભકામનાઓ. આ પછી એક અન્ય યુઝરે જાવેદ અખ્તરની પોસ્ટ પર આપત્તિજનક ટિપ્પણી કરતાં તેમને 'ઈડિયટ' કહ્યા. જાવેદે પલટવાર કરતાં લખ્યું- તમારો સંદેશ જણાવે છે કે બાળપણમાં તમને કયા સંસ્કાર આપવામાં આવ્યા છે. એક અન્ય યુઝરે દાવો કર્યો કે જાવેદને કદાચ ખબર જ નથી કે પ્રદર્શન કયા મુદ્દાને લઈને થઈ રહ્યું છે. તેમણે આરોપ લગાવ્યો કે તેમના માટે સરકાર વિરુદ્ધ થતું કોઈપણ પ્રદર્શન જ તેને રદ કરાવવાનું કારણ છે.

જાવેદે ચૂંટણી પંચના વિરોધને સરકારનો વિરોધ માનવા પર સવાલ કર્યા

જેના પર જાવેદ અખ્તરે સવાલ કરતા લખ્યું- શું કહી રહ્યા છો. મને લાગ્યું કે આ પ્રદર્શન ચૂંટણી પંચની વિરુદ્ધ છે, જે સંપૂર્ણપણે એક સ્વતંત્ર સંસ્થા હોવી જોઈએ અને સરકારનો ભાગ નથી. મારા દોસ્ત, મને સમજાવો કે ચૂંટણી પંચનો વિરોધ કરવો એ સરકારનો વિરોધ શા માટે માનવામાં આવી રહ્યો છે? મહત્વનું છે કે CJPના પ્રદર્શનને લઈને સોશિયલ મીડિયા પર ચર્ચા હવે માત્ર શિવાજી પાર્કમાં ઘોંઘાટ અને વિરોધ સુધી સીમિત નથી, પરંતુ પ્રદર્શનના મુદ્દા અને ચૂંટણી પંચને લઈને પણ યુઝર્સ વચ્ચે સવાલ-જવાબ ચાલી રહ્યા છે.

CJPનું જેલ ભરો આંદોલન,મુંબઈ પોલીસે નથી આપી મંજૂરી

CJPએ 2 ઓક્ટોબરે મુંબઈના શિવાજી પાર્કથી પોતાનું 'જેલ ભરો આંદોલન' શરૂ કરવાનું એલાન કર્યું છે. સંગઠનના સ્થાપક અભિજીત દીપકેના જણાવ્યા મુજબ પ્રદર્શનનો મુખ્ય મુદ્દો મુખ્ય ચૂંટણી કમિશનર જ્ઞાનેશ કુમારના રાજીનામાની માંગ અને ચૂંટણી પ્રક્રિયા સાથે જોડાયેલા મુદ્દાઓ છે. CJPએ SIR એટલે કે મતદાર યાદીના વિશેષ ગહન પુનરીક્ષણને લઈને પણ સવાલો ઉઠાવ્યા છે. CJPએ સાંજે 4 વાગ્યે શિવાજી પાર્કના ગેટ નંબર 6 પર પ્રદર્શનની વાત કહી છે. જોકે, મુંબઈ પોલીસે પ્રદર્શનની પરવાનગી આપી નથી અને આયોજકોને બીજા સ્થળે પ્રદર્શન માટે અરજી કરવાની સલાહ આપવામાં આવી છે. પોલીસે શિવાજી પાર્કની આસપાસ રહેણાંક વિસ્તાર, ઘોંઘાટ, ટ્રાફિક અને ઈમરજન્સી વાહનોની અવરજવર જેવા મુદ્દાઓનો પણ હવાલો આપ્યો છે.

સ્થાનિક નિવાસીઓએ એ પણ સવાલ ઉઠાવ્યો છે કે શિવાજી પાર્કમાં બિન-રમતગમત પ્રવૃત્તિઓ માટે ઉપયોગને લઈને નિયત નિયમો છે અને વર્ષમાં સીમિત દિવસો સુધી જ આવી પ્રવૃત્તિઓની પરવાનગી આપવામાં આવે છે. તેમણે 2013ના બોમ્બે હાઈકોર્ટના આદેશ અને 2016ના મહારાષ્ટ્ર સરકારના નિર્ણયનો પણ હવાલો આપ્યો છે. પ્રદર્શનને લઈને તણાવ વચ્ચે શિવાજી પાર્ક અને દાદર વિસ્તારમાં સુરક્ષા પણ વધારવામાં આવી છે. હાલમાં CJPનું પ્રદર્શન, સ્થાનિક વિરોધ અને જાવેદ અખ્તરની સોશિયલ મીડિયા ટિપ્પણીઓએ આ સમગ્ર મામલાને વધુ ચર્ચામાં લાવી દીધો છે.