ભારતના ટોપ-10 પ્રદૂષિત શહેરોમાં ગાઝિયાબાદ ટોચે, નક્કી મર્યાદા કરતાં પણ PM 2.5નું લેવલ ત્રણ ગણું વધારે

Top 10 Polluted Cities In India : દેશભરમાં જાન્યુઆરી મહિનામાં શિયાળા દરમિયાન પણ વાયુ પ્રદૂષણનું સંકટ યથાવત રહ્યું છે, ખાસ કરીને દિલ્હી-NCRના વિસ્તારોમાં સ્થિતિ વધુ કફોડી બની છે. 'સેન્ટર ફોર રિસર્ચ ઓન એનર્જી એન્ડ ક્લીન એર' (CREA) ના રિપોર્ટ અનુસાર, દેશના લગભગ અડધા દેખરેખ હેઠળના શહેરોમાં PM2.5 નું સ્તર રાષ્ટ્રીય સુરક્ષા ધોરણો કરતા ઘણું વધારે નોંધાયું છે.

ગાઝિયાબાદ સૌથી પ્રદૂષિત, દિલ્હી બીજા નંબરે

CREA ના રિપોર્ટ મુજબ, જાન્યુઆરીમાં ગાઝિયાબાદ દેશનું સૌથી પ્રદૂષિત શહેર રહ્યું હતું. અહીં PM2.5 સ્તર 184 માઈક્રોગ્રામ પ્રતિ ઘન મીટર નોંધાયું હતું, જે રાષ્ટ્રીય મર્યાદા કરતા ત્રણ ગણું વધારે છે. ગાઝિયાબાદ બાદ દિલ્હી, નોઈડા, ગુરુગ્રામ અને ગ્રેટર નોઈડા દેશના સૌથી પ્રદૂષિત શહેરોમાં મોખરે રહ્યા હતા. દિલ્હીમાં જાન્યુઆરી મહિનામાં 27 દિવસ સુધી હવાની ગુણવત્તા 'ખૂબ જ ખરાબ' અથવા 'ગંભીર' કેટેગરીમાં રહી હતી.

WHO ના ધોરણો પર એક પણ શહેર ખરું ઉતર્યું નહીં

પ્રદૂષણના મામલે ટોપ-10 શહેરોમાં ધારુહેડા છઠ્ઠા સ્થાને રહ્યું, જ્યારે સિંગરૌલી, ભિવાડી, નારનોલ અને ગંગટોકનો પણ આ યાદીમાં સમાવેશ થયો છે. આમાંથી છ શહેરો ઉત્તર પ્રદેશ અને હરિયાણાના છે. નોંધનીય છે કે, સર્વેક્ષણ કરાયેલા 248 શહેરોમાંથી એક પણ શહેર વિશ્વ આરોગ્ય સંસ્થા (WHO) ના સુરક્ષિત ધોરણો પર ખરું ઉતર્યું નથી. રાષ્ટ્રીય સ્વચ્છ હવા કાર્યક્રમ (NCAP) હેઠળના 97 શહેરોમાંથી 46 શહેરોએ ધોરણોનું ઉલ્લંઘન કર્યું છે.

રાજ્યોની વાત કરીએ તો, પ્રદૂષણના નિયમોના ઉલ્લંઘનમાં રાજસ્થાન સૌથી ઉપર રહ્યું છે, જ્યાં 34 માંથી 23 શહેરોમાં પ્રદૂષણનું પ્રમાણ વધુ હતું. ત્યારબાદ હરિયાણા, બિહાર, ઓડિશા અને ઉત્તર પ્રદેશનો ક્રમ આવે છે.

દેશના માત્ર 21 શહેરોમાં જ હવા 'સ્વચ્છ'

દેશભરના માત્ર 21 શહેરોમાં હવાની ગુણવત્તા 'સારી' રહી છે. મધ્યપ્રદેશનું દમોહ દેશનું સૌથી સ્વચ્છ શહેર રહ્યું છે, જ્યાં સરેરાશ PM2.5 સ્તર માત્ર 17 માઈક્રોગ્રામ નોંધાયું હતું. સૌથી સ્વચ્છ 10 શહેરોમાંથી પાંચ શહેરો કર્ણાટકના છે. મહાનગરોમાં દિલ્હી અને કોલકાતામાં પ્રદૂષણ વધારે રહ્યું, જ્યારે ચેન્નાઈ, મુંબઈ અને બેંગલુરુમાં સ્થિતિ નિયંત્રણમાં જોવા મળી હતી.

ભારતના સૌથી વધુ પ્રદૂષિત 10 શહેરોની યાદી:

ગાઝિયાબાદ

દિલ્હી

નોઈડા

ગુરુગ્રામ

ગ્રેટર નોઈડા

ધારુહેડા

સિંગરૌલી

ભિવાડી

નારનોલ

ગંગટોક