Forbes World Billionaires 2026 List: ફોર્બ્સે દુનિયાના સૌથી અમીર વ્યક્તિઓની લેટેસ્ટ યાદી જાહેર કરી છે, જે મુજબ ભારતમાં અબજોપતિઓની સંખ્યા સતત વધી રહી છે. છેલ્લા એક વર્ષમાં દેશમાં 24 નવા અબજોપતિઓ ઉમેરાયા છે, જેનાથી વૈશ્વિક અમીરોની યાદીમાં ભારતની સ્થિતિ વધુ મજબૂત બની છે. આ યાદીમાં વિશ્વના સૌથી ધનિક વ્યક્તિઓના રેન્કિંગ પણ સામે આવ્યા છે, જેમાં ઘણા મોટા ઉદ્યોગપતિઓની સંપત્તિમાં ભારે ઉતાર-ચઢાવ જોવા મળ્યો છે.
ભારતમાં અબજોપતિઓની સંખ્યા
ફોર્બ્સ વર્લ્ડ્સ બિલિયોનેર્સ 2026ની યાદી મુજબ, ભારતમાં અબજોપતિઓની સંખ્યા વર્ષ 2025ની સરખામણીએ વધીને આ વર્ષે 229 થઈ ગઈ છે. જો કે, ફોર્બ્સ ઇન્ડિયાની યાદી 2025 મુજબ ભારતના 100 સૌથી ધનિક લોકોની નેટવર્થમાં 9 ટકાનો ઘટાડો થયો છે, જે હવે 1 ટ્રિલિયન ડૉલર (આશરે 88 લાખ કરોડ) રહી ગઈ છે. ઉલ્લેખનીય છે કે ગયા વર્ષે તેમની નેટવર્થ 1.1 ટ્રિલિયન ડૉલર એટલે કે આશરે 97 લાખ કરોડ હતી.
મુકેશ અંબાણી ભારતમાં નંબર 1 પર
ફોર્બ્સ વર્લ્ડ્સ બિલિયોનેર્સ 2026ની યાદી અનુસાર, રિલાયન્સ ઇન્ડસ્ટ્રીઝના ચેરમેન મુકેશ અંબાણી ભારતના સૌથી ધનિક વ્યક્તિ તરીકે પ્રથમ સ્થાને રહ્યા છે. રિલાયન્સ ઇન્ડસ્ટ્રીઝના નફામાં છેલ્લા એક વર્ષમાં આશરે 12%ના વધારા સાથે મુકેશ અંબાણી એશિયા અને ભારતના સૌથી અમીર વ્યક્તિ તરીકે યથાવત્ છે. જો કે, તેઓ બે વર્ષ પહેલાની જેમ 100 અબજ ડૉલરની સંપત્તિવાળા ક્લબમાં ફરી સામેલ થવાથી થોડા પાછળ રહી ગયા છે.
ભારતના અબજોપતિનું લિસ્ટ
અબજોપતિઓની યાદીમાં ભારતની સ્થિતિ
ફોર્બ્સની 2026ની વિશ્વના અબજોપતિઓની યાદી મુજબ, ભારતમાં હવે 229 અબજોપતિ છે, જે ગયા વર્ષે 205 હતા. આ વધારાનું મુખ્ય કારણ શેરબજારમાં નવી કંપનીઓનું લિસ્ટિંગ રહ્યું છે, જેણે બજારને વેગ આપ્યો. ભારતીય અબજોપતિઓની કુલ સંપત્તિ પણ વધીને 1 ટ્રિલિયન ડૉલરથી વધુ થઈ ગઈ છે, જે 2025માં 941 અબજ ડૉલર હતી. દેશના ટોચના 10 સૌથી ધનિક લોકોની કુલ સંપત્તિ 368 અબજ ડૉલર છે, જે કુલ સંપત્તિના ત્રીજા ભાગ કરતાં પણ વધુ હિસ્સો ધરાવે છે. છેલ્લા એક વર્ષમાં તેમની સંપત્તિમાં આશરે 32 અબજ ડૉલરનો વધારો થયો છે. ભારતના બે સૌથી મોટા ઉદ્યોગપતિ મુકેશ અંબાણી અને ગૌતમ અદાણીની સંપત્તિમાં પણ સંયુક્ત રીતે 14.7 અબજ ડૉલરનો વધારો નોંધાયો છે.
વિશ્વના ટોપ 3 અમીર વ્યક્તિ
લક્ષ્મી મિત્તલની સંપત્તિમાં સૌથી વધુ વધારો
સાવિત્રી જિંદાલ, જેઓ ઓ.પી. જિંદાલ ગ્રૂપના ચેરમેન છે, તેઓ ભારતના ત્રીજા સૌથી ધનિક વ્યક્તિ અને દેશના સૌથી ધનિક મહિલા તરીકે યથાવત્ છે. ભારતમાં કુલ 20 મહિલા અબજોપતિઓના જૂથમાં તેઓ ટોપ પર છે. ભારતીય અબજોપતિઓમાં આ વર્ષે સૌથી વધુ સંપત્તિ વધવાનો રૅકોર્ડ સ્ટીલ ઉદ્યોગપતિ લક્ષ્મી મિત્તલના નામે રહ્યો છે. ભારતના ચોથા સૌથી ધનિક વ્યક્તિ મિત્તલ હાલમાં બ્રિટનના નવા ટેક્સ નિયમો લાગુ થયા બાદ સ્વિટ્ઝરલેન્ડ શિફ્ટ થઈ ગયા છે. તેમની કંપની ArcelorMittalના શેર ગયા વર્ષની સરખામણીમાં 80%થી વધુ વધ્યા છે. આ ઉછાળાને કારણે મિત્તલની સંપત્તિ 11.8 અબજ ડૉલર (આશરે 61%) વધીને 31 અબજ ડૉલર થઈ ગઈ છે. જો કે, આ સંપત્તિ હજુ પણ 2008માં તેમની 45 અબજ ડૉલરની સર્વોચ્ચ સંપત્તિ કરતાં ઓછી છે, જ્યારે તેઓ વિશ્વના ચોથા સૌથી ધનિક વ્યક્તિ હતા.
