PM મોદીની અધ્યક્ષતામાં આજે યોજાશે હાઇ-લેવલ મિટિંગ : 7 મંત્રાલય સમૂહોની ભલામણો પર થશે મોટો નિર્ણય

PM Modi Chairs High Level Meeting : વડાપ્રધાન નરેન્દ્ર મોદી મંગળવારે સાંજે પ્રમુખ મંત્રાલયોના સચિવો સાથે એક ઉચ્ચસ્તરીય બેઠકની અધ્યક્ષતા કરશે. મળતી માહિતી મુજબ, આ બેઠકમાં ઈરાન-અમેરિકા સંઘર્ષના કારણે ઊભી થયેલી વૈશ્વિક પરિસ્થિતિ અને ભારતની રણનીતિક પ્રતિક્રિયા અંગે ચર્ચા થવાની શક્યતા છે. આ બેઠકમાં નાણાં અને ઉદ્યોગ મંત્રાલયો દ્વારા તૈયાર કરવામાં આવેલી યોજનાઓ પર વિશેષ ધ્યાન આપવામાં આવશે, જે દેશની અર્થવ્યવસ્થાને મજબૂત બનાવવા અને આર્થિક સુધારાઓને આગળ વધારવા માટે અત્યંત મહત્ત્વપૂર્ણ માનવામાં આવે છે. સૂત્રોના જણાવ્યા અનુસાર, સરકારનો મુખ્ય ઉદ્દેશ્ય વૈશ્વિક પડકારો વચ્ચે ભારતીય અર્થવ્યવસ્થાને મજબૂત જાળવી રાખવાનો અને મોટા આર્થિક નિર્ણયો તેમજ સુધારાઓને આગળ ધપાવવાનો છે.

સચિવોના 7 જૂથની ભલામણો પર થશે ચર્ચા

સૂત્રોનું કહેવું છે કે, ઈરાન-અમેરિકા સંકટથી ઊભી થયેલી સ્થિતિ બાદ કેન્દ્ર સરકારે સચિવોના 7 અલગ-અલગ જૂથો બનાવ્યા હતા. મંગળવારે સાંજે યોજાનારી આ મહત્ત્વપૂર્ણ બેઠકમાં આ તમામ જૂથો દ્વારા આપવામાં આવેલી ભલામણો પર વિગતવાર ચર્ચા કરવામાં આવશે. આ બેઠક દરમિયાન નાણાં મંત્રાલય અને ઉદ્યોગ મંત્રાલય દ્વારા તૈયાર કરવામાં આવેલી રણનીતિઓ પર વિશેષ ફોકસ રહેશે. આ મંત્રાલયોની યોજનાઓ દ્વારા દેશના ઔદ્યોગિક ક્ષેત્ર અને આર્થિક મોરચાને મજબૂતી આપવા માટેનો રોડમેપ તૈયાર કરવામાં આવશે.

આ ઉપરાંત, આ ઉચ્ચસ્તરીય સમીક્ષા દ્વારા વૈશ્વિક પડકારો હોવા છતાં ભારતીય અર્થવ્યવસ્થાને સ્થિર અને મજબૂત બનાવી રાખવાની તૈયારીઓ પર ભાર મૂકવામાં આવશે.