સરકારનો મોટો નિર્ણય : ઈ-રિક્ષા બેટરી મામલે ગુગલ અને એપ્પલને 7 એપ્સ બંધ કરવાની નોટિસ
Summarized by AI; it may make mistakes. Check important info
Summarized by AI; it may make mistakes. Check important info
Government Notice E Rickshaw Apps : ઈ-રિક્ષા ચાલકો સાથે સોશિયલ મીડિયા પર થતા ખોટા ‘પ્રૅન્ક’ બંધ કરાવવા માટે સરકારે મોટું પગલું ભર્યું છે. સરકારે ગુગલ એન્ડ્રોઇડ અને એપ્પલને BAT BMS સહિતની લગભગ 7 એપ્સને પોતાના પ્લેટફોર્મ પરથી હટાવવા માટે નોટિસ આપી છે. આ એપ્સનો ખોટો ઉપયોગ કરીને ચાલુ ઈ-રિક્ષાની બેટરીઓ રસ્તા વચ્ચે જ બંધ કરી દેવામાં આવતી હતી.
શું છે આખો મામલો?
છેલ્લા થોડા દિવસોથી ઇન્સ્ટાગ્રામ પર કેટલાક લોકો ઈ-રિક્ષા ચાલકો સાથે પ્રૅન્ક કરીને વીડિયો બનાવતા હતા. આ લોકો BAT BMS જેવી એપ્સની મદદથી ચાલુ ઈ-રિક્ષાને રસ્તા વચ્ચે જ બંધ કરી દેતા હતા અને તેના વીડિયો સોશિયલ મીડિયા પર વાયરલ કરીને વ્યુઝ કમાતા હતા. આ વીડિયો વાયરલ થયા પછી સરકાર એક્શનમાં આવી છે.
એપ્સથી રિક્ષા કેવી રીતે બંધ થતી?
આજકાલની આધુનિક ઈ-રિક્ષામાં લિથિયમ આયન બેટરી આવે છે, જેમાં બ્લૂટૂથ કનેક્ટિવિટી હોય છે. મિકેનિક કે ટેકનિશિયન બેટરીની હેલ્થ અને ચાર્જિંગ ચેક કરવા માટે BMS એટલે કે બેટરી મેનેજમેન્ટ સિસ્ટમનો ઉપયોગ કરે છે. આ એપ્સમાં બેટરીને બંધ કરવાનો ઓપ્શન પણ હોય છે. જે ઈ-રિક્ષામાં બ્લૂટૂથ ઓપન રાખવામાં આવ્યું હોય, તેને લોકો આ એપ્સની મદદથી ફોન દ્વારા જ બંધ કરી દેતા હતા.
ગરીબ ડ્રાઇવરોની રોજીરોટી પર સંકટ
આ બ્લૂટૂથનું કંટ્રોલ બિચારા રિક્ષા ચાલકો પાસે હોતું નથી. આ પ્રૅન્કના કારણે રિક્ષા ચાલકોની રોજીરોટી પર અસર પડી રહી છે. સોશિયલ મીડિયા પર એવા પણ વીડિયો સામે આવ્યા છે જેમાં ગરીબ ડ્રાઇવરો પોતાની રિક્ષા ચાલુ કરવા માટે લોકો સામે કરગરી રહ્યા છે. રિક્ષા ફરી ચાલુ કરાવવા માટે તેમણે મિકેનિકને અલગથી પૈસા પણ ચૂકવવા પડે છે.
સરકારે કઈ એપ્સ સામે લીધું એક્શન?
આઇટી મંત્રાલય દ્વારા મોકલવામાં આવેલી આ નોટિસમાં BAT-BMS, SMART BMS અને LOSSIGY જેવી 7 એપ્સ સામેલ છે. આરોપ છે કે આમાંની કેટલીક એપ્સ ચીનની છે. ચાલુ રિક્ષા અચાનક બંધ થવાથી ડ્રાઈવર અને મુસાફરોનો જીવ જોખમમાં મુકાઈ શકે છે, તેથી મુસાફરોની સુરક્ષાને ધ્યાનમાં રાખીને સરકારે આ નિર્ણય લીધો છે.
ગુગલ અને એપ્પલ સ્ટોરમાંથી હટશે એપ્સ
સરકારે ગુગલ અને એપ્પલને સ્પષ્ટ શબ્દોમાં આ 7 એપ્સ સ્ટોરમાંથી હટાવવા કહ્યું છે જેથી કોઈ તેને સરળતાથી ડાઉનલોડ ન કરી શકે. જોકે, હજુ સુધી આ બંને કંપનીઓ તરફથી કોઈ સત્તાવાર નિવેદન આવ્યું નથી કે આ એપ્સ ક્યાં સુધીમાં સંપૂર્ણપણે હટાવી દેવાશે.
સામાન્ય લોકો માટે જરૂરી સલાહ
જો તમારા ફોનમાં પણ આવી કોઈ એપ ડાઉનલોડ થયેલી હોય તો તેને તરત જ ડિલીટ કરી દો. આ સિવાય જો તમારી ગાડી કે રિક્ષાની બેટરીમાં કોઈ પણ સમસ્યા હોય, તો કોઈ અજાણી એપ વાપરવાને બદલે હંમેશા કંપનીના સત્તાવાર સર્વિસ સેન્ટર અથવા જાણકાર મિકેનિકની જ મદદ લો.
