ગુજરાતના પાડોશી રાજ્યમાં 75% હિસ્સામાં દુષ્કાળ, 32થી વધુ જિલ્લામાં પાણીની ભારે અછત

Maharashtra Drought 2026 : મહારાષ્ટ્રમાં ઓછા વરસાદની અસર હવે સ્પષ્ટ જોવા મળી રહી છે. રાજ્ય સરકારે 358માંથી 265 તાલુકાને દુષ્કાળગ્રસ્ત જાહેર કર્યા છે, જે રાજ્યના આશરે 74 ટકા વિસ્તારને આવરી લે છે. વરસાદની અછતને કારણે ખાસ કરીને ખેડૂતોને ભારે મુશ્કેલીનો સામનો કરવો પડી રહ્યો છે. રાજ્ય સરકારના આ નિર્ણય બાદ અસરગ્રસ્ત ખેડૂતો માટે વિવિધ રાહત પગલાં અમલમાં મૂકવામાં આવશે.

સરેરાશ કરતાં ઓછો વરસાદ

મહારાષ્ટ્રમાં આ વર્ષે વરસાદ સામાન્ય કરતાં ઓછો રહ્યો છે. તાજેતરના અહેવાલો મુજબ રાજ્યમાં વરસાદની અછતને કારણે અનેક વિસ્તારોમાં પાણી અને ખેતી સંબંધિત સંકટ ઊભું થયું છે. કેટલાક વિસ્તારોમાં લાંબા સમય સુધી વરસાદ ન પડતાં ઊભા પાકને નુકસાન થયું છે. ખાસ કરીને સોયાબીન, કપાસ અને અન્ય ખરીફ પાકને અસર થઈ છે. વિદર્ભ, મરાઠવાડા અને ઉત્તર મહારાષ્ટ્રના કેટલાક વિસ્તારોમાં સ્થિતિ વધુ ગંભીર હોવાનું સામે આવ્યું છે. યવતમાળ, જલગાંવ, અહિલ્યાનગર, નાંદેડ, અમરાવતી અને નાગપુર સહિતના જિલ્લાઓના અનેક તાલુકા દુષ્કાળગ્રસ્ત જાહેર કરવામાં આવ્યા છે. સરકારી નિર્ણય હેઠળ કુલ 265 તાલુકાને દુષ્કાળગ્રસ્ત જાહેર કરવામાં આવ્યા છે.

ખેડૂતો માટે સરકારના રાહત પગલાં

દુષ્કાળગ્રસ્ત વિસ્તારો માટે રાજ્ય સરકારે પાક લોનનું પુનર્ગઠન, જમીન મહેસૂલમાં રાહત અને કૃષિ સંબંધિત લોનની વસૂલાત મોકૂફ રાખવા જેવા પગલાં જાહેર કર્યા છે. ખેતીના પંપના વીજળી બિલમાં રાહત અને વીજ જોડાણ નહીં કાપવાની જોગવાઈ પણ કરવામાં આવી છે. આ ઉપરાંત વિદ્યાર્થીઓને પરીક્ષા ફીમાં રાહત, રોજગાર ગેરંટી યોજના હેઠળ વધુ કામ શરૂ કરવું, જરૂરિયાત મુજબ પીવાના પાણી માટે ટેન્કર પહોંચાડવા અને પશુઓ માટે ચારા-પાણીની વ્યવસ્થા કરવા જેવા પગલાં પણ જાહેર કરવામાં આવ્યા છે.

પાક નુકસાનના પંચનામા અને ડેટા એકત્રિત કરાશે

રાજ્ય સરકારે અસરગ્રસ્ત વિસ્તારોમાં પાકની સ્થિતિનું મૂલ્યાંકન કરવા પંચનામાની પ્રક્રિયા ઝડપી પૂર્ણ કરવાનો નિર્ણય લીધો છે. પાક નુકસાનની તસવીરો અને અન્ય ડેટા એકત્રિત કરીને આગળની રાહત પ્રક્રિયા હાથ ધરવામાં આવશે. મુખ્યમંત્રી દેવેન્દ્ર ફડણવીસે તાજેતરમાં દુષ્કાળગ્રસ્ત વિસ્તારોની મુલાકાત લઈને ખેડૂતો સાથે વાતચીત કરી હતી. લાતૂર અને ધારાશિવ જેવા વિસ્તારોમાં તેમણે નુકસાનગ્રસ્ત પાક અને પાણીની સ્થિતિનું નિરીક્ષણ કર્યું હતું. આ નિર્ણયથી મહારાષ્ટ્રના વરસાદની અછતથી અસરગ્રસ્ત 265 તાલુકાઓમાં ખેડૂતો અને ગ્રામ્ય વિસ્તારો માટે તાત્કાલિક રાહત પહોંચાડવાનો માર્ગ ખૂલ્યો છે.