ઈરાન માટે ખતરનાક પ્લાન તૈયાર : અમેરિકા ઈઝરાયેલ સપ્તાહ દરમિયાન 'ગજબ' કરશે ?

ટ્રમ્પને હારવું પોસાય નહીં : ઈઝરાયેલ માટે અસ્તિત્વનો પ્રશ્ન

અમેરિકા  ભાથામાંથી નવા તીર કાઢશે ? નેતન્યાહૂ સાથે મળીને ડોનાલ્ડ ટ્રમ્પ કોઈ ભયંકર યોજના ઘડી રહ્યા છે : ઈરાન તૈયાર છે

નવી દિલ્હી : ઈરાન યુદ્ધ દિવસે દિવસે ખતરનાક બનતું જાય છે. અમેરિકી પ્રમુખ ડોનાલ્ડ ટ્રમ્પે શુક્રવારે કહ્યું હતું કે ઈરાન પાસે માત્ર ૪૮ કલાક રહ્યા છે. તેમણે કહ્યું કે તે મર્યાદા પૂરી થયા પછી ઈરાન ઉપર કેર વરસાવશે. તેવામાં ખબર આવ્યા છે કે અમેરિકા હવે તેનાં સૌથી વધુ સંહારક મિસાઇલ્સ તૈનાત કરી રહ્યું છે. બ્લુમ-બર્ગના રીપોર્ટ પ્રમાણે અમેરિકા પોતાનાં 'એડવાન્સ્ડ સ્ટીલ્થ ક્રૂઝ મિસાઇલ્સ' ઈરાન પર વાપરવા તૈયાર થયું છે.

બ્લુમબર્ગના રીપોર્ટ પ્રમાણે 'જોઈન્ટ-એડવાન્સ્ડ-સ્ટીલ્થ-ક્રૂઝ મિસાઇલ્સ' અમેરિકા ઈરાનમાં તૈનાત કરવાનું છે. બ્લુમબર્ગ વધુમાં જણાવે છે કે અમેરિકાએ 'જોઈન્ટ-એર-ટુ-સેર્ફસ સ્ટેન્ડ ઓફ મિસાઇલ એક્સટેન્ડેડ રેન્જ (જે.એ.એસ.એસ.એમ.ઈ.આર) હવે મધ્ય-પૂર્વમાં મોકલવામાં આવશે. આ ઉપરથી લાગે છે કે ટ્રમ્પ હવે ઈરાનમાં ઘાતક યુદ્ધ લડવાના મૂડમાં છે. ૧૫ લાખ ડોલરની કિંમતનું આ મિસાઇલ એવા ટાર્ગેટ પર હુમલા કરવા ડીઝાઈન કરાયાં છે જે ટાર્ગેટસની સંરક્ષણ વ્યવસ્થા ઘણી મજબૂત હોય. ૬૦૦ માઇલ દૂરથી તે અચૂક નિશાન પાડી શકે છે. અમેરિકાનું આ એક મુખ્ય શસ્ત્ર છે.

બ્લુમબર્ગ વધુમાં જણાવે છે કે આ યુદ્ધમાં અમેરિકાએ તેના શસ્ત્ર ભંડારમાંથી બે તૃતીયાંશ શસ્ત્રો ઈરાન યુદ્ધમાં વાપરી નાખ્યાં છે. તેમાં ઓછા અંતરના જે એ એસ એસ એમ મિસાઇલ્સ પણ આવરી લેવાયા છે.

અમેરિકા ઈઝરાયલનો દાવો છે કે તેણે ઈરાનની એર ડીફેન્સ સીસ્ટીમ તોડી પાડી છે. તે દ્વારા તે મધ્ય વિસ્તાર સુધી અચૂક પ્રહાર કરી શકે તેમ છે.

શુક્રવારે ઈરાને અમેરિકાનાં એફ-૧૫-ઈ યુદ્ધ વિમાનને તોડી પાડયું તે પછી તુર્તજ એક એ-૧૦ હેલિકોપ્ટર તોડી પાડયું તથા તેની સાથેનાં બે રેસ્ક્યુ હેલિકોપ્ટર્સને પણ નુકસાન કર્યું ત્યારથી અમેરિકા ઈરાન પર ખુન્નસે ભરાયું છે. અમેરિકાએ ૧૦૦૦થી વધુ જેએએસએમએમ.ઈ આર મિસાઇલ્સનો ઉપયોગ કર્યો છે. વેનેઝૂએલાના પ્રમુખ માદુરોની ધરપકડ કરવા માટે અમેરિકાએ આ મિસાઇલ્સનો જ ઉપયોગ કર્યો હતો. તેણે આવાં ૪૭ મિસાઇલ્સ છોડયાં હતાં.

અમેરિકાની સાથે ઈઝરાયલે પણ તેનો એક પ્લાન બનાવ્યો છે. રાહ અમેરિકાની લીલી ઝંડી મળે તેટલી જ છે. તે ઇરાનની એનર્જી ફેસીલીટી પર હુમલા કરવા તૈયાર છે.

વિશ્લેષકો કહે છે કે અમેરિકાને વિશેષત: ટ્રમ્પને આ યુદ્ધમાં હાર્યું પોસાય તેમ નથી કારણ કે તો દુનિયામાં તેની ધાક ન રહે. બીજી તરફ સાથી દેશોને તેનો વિશ્વાસ ન રહે. વિશ્લેષકો વધુમાં કહે છે કે ચારે તરફે દુશ્મનોથી ઘેરાયેલાં ઈઝરાયલ માટે તો ઈરાન યુદ્ધ તેના અસ્તિત્વના સવાલ સમાન બની રહ્યું છે, તો બીજી તરફ ઈરાન પણ તેટલું જ તૈયાર છે. બેમાંથી એક પણ પક્ષ નમતું જોખવા તૈયાર નથી. તેલ પર તરતું મધ્યપૂર્વ ભડકે બળે છે. દુનિયા દિગ્મૂઢ થઈ ખતરનાક ખેલ જોયા કરે છે.