દિલ્હી-મુંબઇ પોલીસના ઓપરેશનમાં બે શંકાસ્પદ ઝડપાયા
મુંબઇમાં રહેતા બે શખ્સો ઓનલાઇન જૈશ અને આઇએસના સંપર્કમાં આવ્યા બાદ કટ્ટરવાદી બન્યા
આ બન્ને શંકાસ્પદ આતંકીઓ ટોય કારનો ઉપયોગ કરીને દિલ્હીમાં મોટા વિસ્ફોટને અંજામ આપવાનું કાવતરુ ઘડી રહ્યા હતા. શરૂઆતની તપાસમાં સામે આવ્યું છે કે આ બન્ને આતંકીઓ આઇએસઆઇએસઆઇ અને જૈશ-એ-મોહમ્મદના આતંકીઓના સંપર્કમાં હતા અને ઓનલાઇન બન્નેને ઉશ્કેરવામાં આવ્યા હતા. આ સમગ્ર કાર્યવાહી મહારાષ્ટ્ર એટીએસ અને દિલ્હી સ્પેશિયલ સેલ દ્વારા સંયુક્ત રીતે પાર પાડવામાં આવી છે. ઓપરેશન મુંબઇના કુર્લા અને મુંબઇ પાસે સ્થિત ખડવલી વિસ્તારમાં ચલાવવામાં આવ્યું હતું. અહીંયાથી જ બન્ને શંકાસ્પદો ઝડપાયા હતા.
બન્ને આરોપીઓની આતંકીઓ સાથે સાંઠગાંઠની માહિતી મળ્યા બાદ જ આ ઓપરેશન શરૂ કરવામાં આવ્યું હતું. ધરપકડ કરાયેલા બન્ને શંકાસ્પદ આતંકીઓના નામ મોસ્સાબ અહમદ ઉર્ફ કલામ અને મોહમ્મદ હમાદ કોલરા છે. આ બન્ને શખ્સો મુંબઇના જ રહેવાસી છે. બન્ને ખિલાફત ગુ્રપ અને સોલ્જર્સ ઓફ પ્રોફિટ જેવા કટ્ટરવાદી સંગઠનોમાં પણ સામેલ થયા હતા. બન્ને જૈશ અને આઇએસના આતંકીઓના સંપર્કમાં હોવાની માહિતી પણ સામે આવી છે. આરોપીઓ બોમ્બ બનાવવાની પ્રક્રિયામાં લાગી ગયા હતા, ટોય કાર દ્વારા બ્લાસ્ટ કરવાની ફિરાકમાં હતા. જેના માટે અત્યંત ભીડવાળા વિસ્તારને નિશાન બનાવવાનું કાવતરું હતું.
