રામ મંદિરમાંથી અનુકલ્પ મિશ્રાએ એકલા હાથે એક કરોડની દાન ચોરી કરી, ચાર્જશીટમાં ખુલાસો

Ram Mandir Donation Row: અયોધ્યા રામ મંદિરમાં દાન ચોરી મામલે મોટો ખુલાસો થયો છે. આરોપી અનુકલ્પ મિશ્રાએ એકલા હાથે જ એક કરોડ રૂપિયાથી વધુની દાન ચોરી કરી હોવાનો ખુલાસો થયો છે. પોલીસની ચાર્જશીટમાં આ વિગતો નોંધવામાં આવી છે. તે અગાઉ 2024માં રામ મંદિર ટ્રસ્ટના કાર્યકર્તા તરીકે ગણતરીના કામમાં જોડાયેલો હતો. પછી 2025માં રામ મંદિર ટ્રસ્ટ અને SBI વચ્ચે ગણતરી ખંડની વ્યવસ્થા સાથે ગણતરીની રકમને બેન્કમાં જમા કરાવવા માટે થયેલા કરાર બાદ, બેન્ક દ્વારા નિમાયેલી એજન્સી સેનિક સિક્યોરિટી સર્વિસના એજન્ટ તરીકે પણ કાર્યરત રહ્યો હતો. આ તકે તેણે કુલ કેટલી રકમ પર હાથ સાફ કર્યો હશે, તેનો માત્ર અંદાજ જ લગાવી શકાય છે, કારણ કે રામ મંદિરમાં કુલ કેટલા કરોડની ચોરી થઈ છે, તેનો હિસાબ-કિતાબ ન તો પોલીસ પાસે છે કે ન તો ટ્રસ્ટ પાસે. રાજ્ય સરકાર દ્વારા રચવામાં આવેલી SIT પણ તેની વિગતો એકઠી નથી કરી શકી. SIT એ પણ સુનિશ્ચિત નથી કરી શકી કે રામ મંદિરમાં ચોરીનો આ સિલસિલો ક્યારથી ચાલી રહ્યો હતો.

રામ મંદિરમાંથી અનુકલ્પ મિશ્રાએ એકલા હાથે એક કરોડની દાન ચોરી કરી

પોલીસની ચાર્જશીટને ટાંકીને અનુકલ્પ મિશ્રા પાસેથી પ્રાપ્ત થયેલી ચલ-અચલ સંપત્તિની વિગતો એક કરોડથી થોડી ઓછી છે, પરંતુ તેણે છેલ્લા બે વર્ષમાં કેટલી રકમ પોતાના હાથે ખર્ચી નાખી, તે સ્પષ્ટ નથી. અનુમાન છે કે તેણે એક કરોડ રૂપિયાથી વધુની ચોરી કરી છે. પોલીસે એકઠા કરેલા પુરાવા પ્રમાણે તેણે કૌશલપુરી કોલોનીમાં પોતાના પિતા રવીન્દ્ર મિશ્રાના નામે એક મકાન ખરીદ્યું હતું.

આ મકાનની રજિસ્ટ્રી તેણે વંદના દ્વિવેદી પાસેથી કરાવી હતી, જેની કિંમત લગભગ 55 લાખ રૂપિયા હતી. આરોપી અનુકલ્પે આ રકમ બે વારમાં ચૂકવી હતી. પહેલાં તેણે 29.5 લાખ રૂપિયાની રકમ બેન્ક મારફતે શ્રીમતી દ્વિવેદીને ટ્રાન્સફર કરી હતી. ત્યારબાદ 25 લાખ રૂપિયાની ચૂકવણી રોકડમાં કરી હતી. વંદના દ્વિવેદીએ સોગંદનામા મારફતે પોતાનું નિવેદન નોંધાવ્યું છે, જે મુજબ 50 હજાર રૂપિયાની રકમ હજુ બાકી છે.

ગામમાં રોફ જમાવવા માટે સાડીઓ વહેંચી હતી

રામ મંદિરમાં દાન ચોરીના આરોપી અનુકલ્પ મિશ્રાની રહેણીકહેણીમાં અચાનક બદલાવ આવ્યો હતો. ગામમાં આ અંગે ચર્ચા હતી પરંતુ કોઈને આનો અંદાજ નહોતો. કહેવાય છે કે અનુકલ્પ રામ મંદિર સાથે જોડાયા પછી ગામમાં પોતાનો રોફ જમાવવા માટે પુષ્કળ પૈસા ઉડાવતો હતો અને ગામના યુવાનોને પ્રભાવિત કરવાનો પ્રયાસ કરતો હતો. પ્રાપ્ત માહિતી પ્રમાણે તેણે રામકથાનું ભવ્ય આયોજન ગામમાં કર્યું હતું અને રામ મંદિર ટ્રસ્ટના હોદ્દેદારો ઉપરાંત સંતો તેમજ જનપ્રતિનિધિઓને પણ પોતાના ઘરે આમંત્રિત કર્યા હતા. એટલું જ નહીં તેણે ગામની મહિલાઓને સાડીઓ પણ વહેંચી હતી.