પતિની હત્યા કરી લાશ બાથરૂમમાં દાટી, 46 દિવસ સુધી તેના પર નહાતી રહી પત્ની, આગ્રામાં 'દ્રશ્યમ' જેવો કાંડ

Agra Drishyam Style Murder Case: ઉત્તર પ્રદેશના આગ્રામાંથી રુંવાડા ઉભા કરી દે તેવી ઘટના સામે આવી છે. માર્ચ 2025માં સામે આવેલા મેરઠના ‘નીલા ડ્રમ કાંડ’ની જેમ આગ્રાના આ દ્રશ્યમ કાંડે લોકોને અંદરથી હચમચાવી દીધા છે. આ ઘટનામાં અત્યાર સુધી જે બાબતો સામે આવી છે અને આરોપી પત્ની રૂબી શર્માએ જે રહસ્યો ખોલ્યા છે તે લોકો સરળતાથી સ્વીકારી શકતા નથી. લોકોનું માનવું છે કે ચોક્કસપણે હજુ પણ આરોપી પત્નીના દિલમાં ઘણા રહસ્યો દફન છે. અત્યાર સુધી સામે આવેલી વિગતો મુજબ, પત્નીએ તેના પતિને ખીરમાં એક ડઝનથી વધુ ઊંઘની ગોળીઓ આપીને મોતને ઘાટ ઉતારી દીધો. તેણે પોતે બાથરૂમનું ભોંયતળિયું તોડ્યું. 18 મેના રોજ તે પતિની લાશને પલંગ પરથી ઢસડીને બાથરૂમ સુધી લઈ ગઈ. લાશ પર મીઠું નાખ્યું, પછી માટી નાખીને જગ્યા સમતલ કરી દીધી. બીજા દિવસે તેણે કડિયાને બોલાવીને ફ્લોર પર પ્લાસ્ટર કરાવ્યું. આરોપી પત્ની પૂરા 46 દિવસ તે જ બાથરૂમમાં નહાતી રહી જેની નીચે તેના પતિની લાશ દફન હતી.

હત્યા બાદ પત્નીએ જેઠ પાસે જઈ ખોટું બોલ્યું

પતિની લાશને દફનાવ્યા અને બાથરૂમનું ભોંયતળિયું સુકાયા પછી પત્ની પોતે જ પોતાના જેઠના ઘરે ગઈ. ત્યાં તેણે પતિ ચાર દિવસથી ઘરે ન હોવાની વાત કહી. કહ્યું કે ખબર નથી પતિ ક્યાં ચાલ્યા ગયા છે. હવે સામાન્ય લોકોની જેમ પોલીસને પણ રૂબીની વાત પર પૂરો ભરોસો નથી થઈ રહ્યો. પોલીસ એવું માનીને ચાલી રહી છે કે આ ગુનામાં ચોક્કસપણે અન્ય કોઈ સામેલ હશે. રૂબીએ પોલીસને જણાવ્યું છે કે તેની સાસુ ઊંઘની ગોળીઓ ખાતી હતી. પતિ પણ તેનું સેવન કરતા હતા. આ કારણે ઊંઘની ગોળીઓ ઘરમાં જ હાજર હતી. રૂબીનું કહેવું છે કે તેણે પોતાના પતિથી પરેશાન થઈને આ ઘટનાને અંજામ આપ્યો. લાશને એટલા માટે છુપાવી જેથી જેલમાં ન જવું પડે.

દ્રશ્યમ ફિલ્મ જોઈને રૂબીએ આઈડિયા મેળવ્યો

40 વર્ષની રૂબી શર્માએ શું ખરેખર આ બધું એકલા હાથે કર્યું? તેની કબૂલાતથી આ ક્રાઈમની જે વાર્તા સામે આવી છે તેમાં તેના દુઃસાહસે દરેકને હચમચાવી દીધા છે. ઘરે-ઘરે એક જ વાતની ચર્ચા છે કે આખરે તેણે આટલું બધું એકલા કેવી રીતે કર્યું. લોકોનું કહેવું છે કે નક્કી આ ગુનામાં તેની સાથે અન્ય કોઈ ચોક્કસ સામેલ છે. પોલીસને પણ આ જ સવાલ પરેશાન કરી રહ્યો છે. પોલીસ સતત તેની પૂછપરછ કરી રહી છે. રૂબીનું કહેવું છે કે ફિલ્મ દ્રશ્યમ જોઈને લાશને આ રીતે ઘરમાં જ દફનાવવાનો આઈડિયા આવ્યો હતો.

પોલીસ દ્વારા કોલ ડિટેઈલ અને ગૂગલ સર્ચની તપાસ

પોલીસ મોબાઈલની કોલ ડિટેઈલ કઢાવી રહી છે. વિતેલા દિવસોમાં ગૂગલ પર શું-શું સર્ચ કરવામાં આવ્યું તે સર્ચ હિસ્ટ્રીમાં જોઈ રહી છે. બાળકીઓ સાથે પણ વાતચીત કરી રહી છે. એ જાણવાનો પ્રયાસ કરી રહી છે કે મમ્મીને લઈને ક્યારેય કોઈ શંકા ગઈ હતી કે કેમ. પોલીસે રૂબીને પૂછ્યું કે દ્રશ્યમ ફિલ્મ ક્યારે જોઈ તો તેણે કહ્યું કે ઘણો સમય પહેલા. તેની સ્ટોરી યાદ હતી. પતિની હત્યા બાદ તેની જે સમજમાં આવ્યું તે તેણે કર્યું. પોલીસ એવું માનીને ચાલી રહી છે કે રૂબીએ કાવતરાના ભાગરૂપે પતિની હત્યા કરી છે. એટલે જ દીકરીઓ અને સાસુને ઘરથી જેઠની પાસે મોકલી દીધા હતા.

પોલીસ તપાસથી ડરીને રૂબીએ જેઠ સમક્ષ ગુનો કબૂલ્યો

રૂબી દરરોજ તે જ બાથરૂમમાં નહાતી હતી જેમાં તેના પતિની લાશ દફન હતી. બે દિવસ પહેલા સિકંદરા પોલીસ રૂબીના ઘરે ગઈ હતી. વર્ષ 2017માં તેના પતિ સુરેન્દ્ર કુમાર શર્મા વિરુદ્ધ ટ્રક ચોરીનો કેસ નોંધાયો હતો. ઘર પર રૂબી મળી. પોલીસે પતિ વિશે પૂછ્યું. તેણે કહ્યું કે પતિ તો ઘણા દિવસોથી ગુમ છે. પોલીસે રૂબીનો ફોટો લીધો. કહ્યું કે ઓનલાઈન વેરિફિકેશન છે. રૂબી ગભરાઈ ગઈ. તેણે જેઠને ફોન કરીને ઘરે બોલાવ્યા. જેઠ પહેલાથી જ પેન્શન ન આપવાની વાતથી નારાજ હતો. રૂબી ખરાબ રીતે ડરી રહી હતી. જેઠે પ્રેમથી પૂછ્યું, કંઈ ખબર હોય તો જણાવી દે, તે કોઈને નહીં કહે. રૂબીએ જણાવી દીધું કે તેણે પતિને મારી નાખ્યો હતો.

ઘટના સાથે જોડાયેલા મુખ્ય શંકાસ્પદ સવાલો

• 16 ઊંઘની ગોળીઓ ખાવાથી કોઈનું મોત થઈ શકે ખરું? એવું તો નથી ને કે પત્નીએ ગળું પણ દબાવ્યું હોય.
• મૃતદેહને તે ભાગમાં દફનાવવામાં આવ્યો જ્યાં પરિવારના સભ્યો સ્નાન કરતાં હતા. પહેલાથી પાકો ફ્લોર હતો. તેને તોડવામાં આવ્યો. આશરે અડધો ફૂટ ખોદકામ કરવામાં આવ્યું. શવ દફનાવવામાં આવ્યું. ત્યારબાદ માટી નાખવામાં આવી.
• સવાલ એ ઉઠી રહ્યો છે કે આ એકલી રૂબીએ કેવી રીતે કરી લીધું? કડિયાએ માત્ર સિમેન્ટ જ કર્યું હતું.
• બાથરૂમમાં સિમેન્ટ કરતા પહેલા લેવલ ચેક કરવામાં આવે છે જેથી પાણીના નિકાલમાં કોઈ સમસ્યા ન થાય. રૂબી આ કેવી રીતે કરી શકે?
• સુરેન્દ્ર શર્માની લંબાઈ અને વજન કેટલું હતું? મૃતદેહને બાથરૂમમાં ખાડો ખોદ્યા વિના દફનાવી શકાય નહીં.