'કોકરોચ' બાદ હવે E20 જનતા પાર્ટી મેદાને, 100 ટકા શુદ્ધ પેટ્રોલની માંગ

100 Percent Pure Petrol Demand : જંતર-મંતર પર થયેલા આંદોલનો અને NEET પેપર લીક મામલે કેન્દ્રીય શિક્ષણમંત્રીના રાજીનામા બાદ હવે સોશિયલ મીડિયા પર એક નવી 'પાર્ટી' ચર્ચામાં આવી છે. સોશિયલ મીડિયા પર શેર કરવામાં આવેલી એક લાંબી પોસ્ટ મુજબ, E20 જનતા પાર્ટી પોતાને નાગરિકો દ્વારા ચલાવવામાં આવતું એક ગ્રાહક અધિકાર અભિયાન (કન્ઝ્યુમર રાઈટ કેમ્પેઈન) ગણાવે છે. 'X' અને ઇન્સ્ટાગ્રામ પર આ પાર્ટી સાથે લોકો ખૂબ જ ઝડપથી જોડાઈ રહ્યા છે. આ પાર્ટીની માત્ર એક જ માંગ છે કે ગ્રાહકોને ઇથેનોલ ફ્રી 100% શુદ્ધ પેટ્રોલ પૂરું પાડવામાં આવે.

શું છે E20 જનતા પાર્ટી અને તેની માંગણીઓ?
સોશિયલ મીડિયા પ્લેટફોર્મ 'X' અને ઇન્સ્ટાગ્રામ પર સક્રિય આ ગ્રુપનું કહેવું છે કે ફ્યુઅલ પૉલિસીમાં પારદર્શિતા, સાચી માહિતી અને ઉપભોક્તાઓની પસંદગીનું સન્માન થવું જોઈએ. તેમની મુખ્ય માંગણીઓ :

• દેશના દરેક પેટ્રોલ પંપ પર E20 ફ્યુઅલની સાથેસાથે 100% શુદ્ધ પેટ્રોલ પણ ઉપલબ્ધ કરાવવામાં આવે.
• ગ્રાહકોને પોતાની જરૂરિયાત અને પસંદગીના આધારે પેટ્રોલ પસંદ કરવાની સંપૂર્ણ આઝાદી મળવી જોઈએ.
• ઘણા વાહન માલિકોએ માઇલેજમાં ઘટાડો, એન્જિનની ખરાબી, મેન્ટેનન્સ ખર્ચ અને લાંબા ગાળામાં એન્જિન પર થતી અસર અંગે ચિંતા વ્યક્ત કરી છે.
• તમામ પ્રકારના ફ્યુઅલનું સાફ લેબલિંગ કરવામાં આવે અને અલગ-અલગ ફ્યુઅલ બ્લૅન્ડના ફાયદા તથા નુકસાનથી જોડાયેલ ડેટા સાર્વજનિક કરવામાં આવે.
• માઇલેજ, એન્જિન પર અસર, પ્રદૂષણ અને મેન્ટેનન્સ ખર્ચ પર સ્વતંત્ર રિસર્ચ (ઇન્ડિપેન્ડન્ટ રિસર્ચ) કરાવીને તેનો રિપોર્ટ લોકોની સામે મૂકવામાં આવે.

કોકરોચ જનતા પાર્ટી સાથે કઈ રીતે જોડાય છે નામ?

E20 જનતા પાર્ટીની કામ કરવાની શૈલી ઘણે અંશે અભિજિત દીપકે દ્વારા શરૂ કરવામાં આવેલી કોકરોચ જનતા પાર્ટી જેવી જ છે. આ ગ્રુપ પણ સોશિયલ મીડિયા, મીમ્સ અને વ્યંગ્યના માધ્યમથી લોકોનું સમર્થન મેળવવાનો પ્રયાસ કરી રહ્યું છે. CJP ની શરૂઆત વર્ષ 2026 ના મે મહિનામાં થઈ હતી. જે એક સટાયર કેમ્પેઈન તરીકે શરૂ થયું હતું અને બાદમાં દિલ્હીમાં એક મોટા આંદોલનમાં ફેરવાઈ ગયું હતું. E20 જનતા પાર્ટી પણ સમાન શૈલી અપનાવી રહી છે.

હાલમાં માત્ર ડિજિટલ અભિયાન

હાલના તબક્કે E20 જનતા પાર્ટી કોઈ ઔપચારિક સંગઠન નથી. તેનું કોઈ સત્તાવાર સંસ્થાપક કે મોટા સ્તર પર રસ્તા પરનું આંદોલન નથી. આ એક ડિજિટલ અભિયાન તરીકે સોશિયલ મીડિયા પર સક્રિય છે. પરંતુ 'X' અને ઇન્સ્ટાગ્રામ પર લોકો ઝડપથી આનાથી જોડાઈ રહ્યા છે. અહેવાલ લખાય છે ત્યાં સુધી 'X' પર આ હેન્ડલના અંદાજે 13,000 થી વધુ અને ઇન્સ્ટાગ્રામ પર અંદાજે 8,800 થી વધુ ફોલોઅર્સ થઈ ચૂક્યા છે.