ઉજ્જૈનમાં રસ્તો પહોળો કરવાના અભિયાન વચ્ચે શાહી મસ્જિદને લઇને વિવાદ, પથ્થરમારા બાદ ટિયરગેસનો મારો ચલાવાયો

Ujjain Masjid Demolition: મધ્યપ્રદેશના ઉજ્જૈનમાં સિંહસ્થ-2028 માટેના રોડ વાઈડનિંગ (સડક પહોળીકરણ) પ્રોજેક્ટના રસ્તામાં આવી રહેલી શાહી મસ્જિદનો એક ભાગ પાડવાની યોજનાને લઈને મોટો વિવાદ થઈ ગયો છે. મસ્જિદ પાસે એકઠા થયેલા લોકોની ભારે ભીડ અને પોલીસ વચ્ચે ઉગ્ર ઝઘડો અને ઘર્ષણ જોવા મળ્યું છે. પથ્થરમારા જેવી ઘટના બાદ સ્થિતિ પર કાબૂ મેળવવા માટે પોલીસે ટીયર ગેસના ગોળા છોડ્યા છે. આ વિસ્તારમાં સુરક્ષા માટે ભારે પોલીસ બળ તૈનાત કરવામાં આવ્યું છે અને પોલીસના ઉચ્ચ અધિકારીઓ પણ સ્થળ પર પહોંચીને પરિસ્થિતિને સંભાળવામાં લાગેલા છે.

પોલીસે આ મામલે અત્યાર સુધીમાં 10 લોકો સામે એફઆઈઆર દાખલ કરી હતી જેમાંથી પાંચ તો સોશિયલ મીડિયાના ઈન્ફ્લુએન્સર હોવાની જાણકારી સામે આવી છે. તેમના પર શાંત વાતાવરણને ડહોળવાનો પ્રયાસ કર્યાનો આરોપ લાગ્યો છે. જોકે અન્ય પાંચ લોકોની ધરપકડ કરી લેવામાં આવી છે. માહિતી અનુસાર મુસ્લિમ સમાજના લોકોએ જાતે જ મસ્જિદનો હિસ્સો તોડવાની પ્રક્રિયા શરૂ કરી દીધી છે.

અગાઉ થયો હતો સમજૂતીનો દાવો

મળતી માહિતી મુજબ, રાત્રે પોલીસ પ્રશાસન સાથે થયેલી સમજૂતી બાદ મુસ્લિમ સમુદાયના લોકો આજે જાતે જ મસ્જિદનો ભાગ હટાવવા માટે તૈયાર થઈ ગયા હતા. પરંતુ બાદમાં તેમણે તેનો વિરોધ કરીને મસ્જિદ હટાવવાનો ઇનકાર કરી દીધો હતો.

સડક પહોળીકરણ પ્રોજેક્ટ અને મુખ્યમંત્રીની પહેલ

મધ્યપ્રદેશના મુખ્યમંત્રી ડૉ. મોહન યાદવે રવિવારે અબ્દાલપુરા સ્થિત પોતાના પિતૃક મકાન પર પોતાના હસ્તે તોડીને સિંહસ્થ-2028 માટેના સડક પહોળીકરણના કામની શરૂઆત કરાવી હતી. ખજૂરવાળી મસ્જિદથી જીવાજીગંજ પોલીસ સ્ટેશન સુધીના આ રસ્તાને 32 ફૂટ પહોળો કરવામાં આવનાર છે. આ સડકની બંને બાજુ રહેતા લોકોએ પણ પોતાના મકાનો પાછળ ખસેડીને રોડ વાઈડનિંગના કામમાં સહયોગ આપવાની એક ઉત્તમ મિસાલ પ્રસ્તુત કરી છે. મુખ્યમંત્રી સવારે 10 વાગ્યે અબ્દાલપુરા પહોંચ્યા હતા અને પૂજા-અર્ચના બાદ રોડ પહોળા કરવાનું કામ શરૂ કરાવ્યું હતું.

અબ્દાલપુરા ઉજ્જૈનનો એક જૂનો વિસ્તાર છે, જ્યાં ખજૂરવાળી મસ્જિદથી જીવાજીગંજ પોલીસ સ્ટેશન વચ્ચે 272 મકાનો આવેલા છે અને અહીં હિન્દુ, મુસ્લિમ તેમજ બોહરા સમુદાયના લોકો રહે છે. સડક પહોળી કરવા માટે આ વિસ્તારના રહેવાસીઓ સ્વેચ્છાએ પોતપોતાના મકાનોનો ભાગ હટાવવા માટે તૈયાર થયા છે.