- વરસાદના કારણે રેસ્ક્યૂ ઓપરેશન સાત કલાક ચાલ્યું
- એશિયાના સૌથી ઊંચા રોપ-વેમાં ટેકનિકલ ખામી સર્જાતા 65 કેબિન અધવચ્ચે અટકી ગઈ હતી
શ્રીનગર : ગુલમર્ગ રોપ-વેમાં ટેકનિકલ ગરબડ થતાં જમીનથી ૫૦૦ ફૂટ ઉપર તમામ કેબિનો ઠપ થઈ જતાં ૩૦૦થી વધુ પ્રવાસીઓ ફસાઈ ગયા હતા. આર્મીથી લઈને જુદી જુદી સરકારી એજન્સીઓએ રેસ્ક્યૂ ઓપરેશન શરૂ કર્યું હતું. આખરે તમામ પ્રવાસીઓને સલામત રીતે નીચે ઉતારી લેવાયા હતા.
ગુલમર્ગ રોપ-વે એશિયાનો સૌથી ઊંચો રોપ-વે છે. અચાનક ભરબપોરે કંઈક ટેકનિકલ ખામી સર્જાતા રોપ-વે સર્વિસ ઠપ થઈ ગઈ હતી. ઘણાં પ્રયાસો છતાં રોપ-વેની એરર દૂર કરી શકાઈ ન હતી. તે વખતે ૬૫ કેબિનો હવામાં લટકી પડી હતી. જમીનથી ૫૦૦ ફૂટ દૂરથી કેબિનમાં ફસાયેલા પ્રવાસીઓને નીચે ઉતારવા માટે રેસ્ક્યૂ ઓપરેશન હાથ ધરાયું હતું. આર્મીના જવાનો ઉપરાંત, નેશનલ ડિઝાસ્ટર રિસ્પોન્સ ફોર્સ, સ્ટેટ ડિઝાસ્ટર રિસ્પોન્સ ફોર્સ, પોલીસ જેવી એજન્સીઓએ સંયુક્ત રીતે ઓપરેશન હાથ ધર્યું હતું.
એ જ અરસામાં વરસાદ શરૂ થયો હતો અને વાતાવરણમાં પણ પલટો આવ્યો હતો એટલે રેસ્ક્યૂ ઓપરેશન ધારણા કરતાં વધારે લાંબું ચાલ્યું હતું. સાત કલાકના રેસ્ક્યૂ ઓપરેશન બાદ તમામ પ્રવાસીઓને હેમખેમ નીચે ઉતારી લેવાયા હોવાનું સરકારના સત્તાવાર નિવેદનમાં જણાવાયું હતું. તાત્કાલિક અસરથી ગુલમર્ગ કેબલ-કારની સર્વિસ બંધ કરી દેવાનો આદેશ કરવામાં આવ્યો હતો.
આ ટેકનિકલ ખામીની તપાસ હાથ ધરવામાં આવી છે. અગાઉ ૨૦૧૭માં ગુલમર્ગ રોપ-વેને અકસ્માત નડયો હતો અને એમાં સાત પ્રવાસીઓના મોત થયા હતા. આ વર્ષે જ જાન્યુઆરીમાં પણ ટેકનિકલ ગરબડના કારણે રોપ-વે સર્વિસ એકાએક બંધ કરવાની ફરજ પડી હતી.
